ەندى كومبينات تاريحىمەن تانىسقىسى كەلگەن كەز كەلگەن ادام كەلەسى سىلەتەمە بويىنشا ونلاين فوتوتاسپاعا تۇسەدى - history.arcelormittal.kz. سايت ءۇشىنشى شىلدە كۇنى 15 ساعات 7 مينۋتتا جۇمىس ىستەي باستادى, ءدال العاشقى شويىن شىعارىلعاننان 60 جىلدان كەيىن.
كومبيناتتىڭ ءفوتوارحيۆى دومنا العاشقى شويىنىن بەرگەننەن بۇرىن باستالعان. 1959 جىلى تۇسىرىلگەن سۋرەتتەردەن قارا مەتاللۋرگيا الىبى بوي كوتەرگەن جەردە بۇرىن يەڭ دالا بولعانىن كورۋگە بولدى. "مەتاللۋرگ" گازەتىندە كومبيناتتىڭ تاريحي كادرلارى ءجيى جاريالانىپ تۇرادى, بىراق ولاردىڭ ءبارىن تولىقتاي ءبىر جەردەن كورۋ مۇمكىن ەمەس بولاتىن. ونىڭ ۇستىنە, زاماناۋي تەحنولوگيالار قولدا بار اقپاراتتى جۇيەلەندىرىپ, ماڭگى ساقتاۋدىڭ مۇمكىندىگىن بەردى.
اتالمىش ينتەرنەت-رەسۋرستى ازىرلەۋ يدەياسى كەنەتتەن كەلىپ, كومپانيانىڭ ءىت-ماماندارى تاراپىنان قولداۋ تاپتى. ءساۋىر ايىندا باعدارلاماشىلار دايىندىق جۇمىستارىنا كىرىستى, ال ءباسپاسوز قىزمەتىنىڭ قىزمەتكەرلەرى تۇڭعىش پرەزيدەنتتىڭ تاريحي-مادەني ورتالىعىنىڭ عىلىمي قىزمەتكەرلەرىمەن بىرلەسىپ سايتتى تولتىرۋ ءۇشىن اقپارات جيناۋمەن جانە وڭدەۋمەن اينالىسا باستادى.
– ءبىز ءاردايىم بۇنداي يگى باستامالاردى قولدايمىز جانە تاريحتى ساقتاۋ - ەڭ الدىمەن وزىمىزگە جانە ءوز وتانىمىزعا دەگەن قۇرمەت دەپ ەسەپتەيمىز, - دەيدى تۇڭعىش پرەزيدەنت تاريحي-مادەني ورتالىعىنىڭ ديرەكتورى سايدا سارگيزوۆا. – ءبىز ەلباسى ەڭبەك جولىن باستاعان كومبيناتتىڭ تاريحىن "ارسەلورميتتال تەمىرتاۋ" اق باسشىلىعىنىڭ حالىققا جەتكىزۋ نيەتىن قولدادىق.
- بۇل وتە قىزىقتى تاجىريبە بولدى. سايتتى ازىرلەۋ كەزىندە مەن تەحنيكالىق جۇمىسپەن عانا اينالىسىپ قويماي, مەتاللۋرگيا كومبيناتى مەن تەمىرتاۋ تاريحىمەن تانىستىم, - دەيدى سەكتور باستىعى رۋستام اكيشەۆ.
ونىڭ سەرىكتەسى - ينجەنەر-باعدارلاماشى, قوسىمشالاردى ازىرلەۋشى ۆلاد دولگوپولوۆ ەلەكتروندى فوتوشەجىرە دايىنداۋعا قاتىستى.
- جۇمىس جەڭىل بولمادى, بىراق وتە قىزىقتى بولدى, - دەپ قورىتىندىلادى ۆلاد.
