وسى ورايدا, «سەمەينوە» ءدارىحانالار جەلىسىنىڭ ديرەكتورى رۋسلان سارسەنوۆتىڭ ايتۋىنشا, تۇرعىندار «بەلگىلى ءبىر دارىلەردى قابىلداۋ ينفەكتسيا جۇقتىرۋدىڭ الدىن الادى نەمەسە اۋرۋ سالدارىن ازايتادى» دەگەن جالعان اقپاراتقا سەنىپ ءجۇر.
– مۇنداي دۇربەلەڭ شامامەن ءبىر اپتا بۇرىن باستالدى. بۇرىن كۇنىنە 50 دانا پاراتسەتامول ساتىلسا, قازىر ونىڭ سانى 1 مىڭ داناعا دەيىن جەتەدى. كوپ ادامدار تۋىستارى مەن دوستارىنىڭ نەمەسە WhatsApp جەلىسىندەگى جالعان حابارلامالاردىڭ اسەرىنەن ءدارى-دارمەكتى اۋىرعاندا ەمەس, الدىن الا ساتىپ الادى. بۇگىندە «قاۋىپتى دەرتتىڭ بەتىن قايتارۋ ءۇشىن پاراتسەتامول كومەكتەسەدى» دەگەن جالعان اقپارات تارالىپ كەتتى. كارانتين كەزىندە ءزىمبىردى كوپتەپ ساتىپ العانداي, ونى دا ساتىپ الا باستادى. ال ادامدا ديارەيا نەمەسە انگينا بولۋى مۇمكىن. ءبىز ءدارى-دارمەك ساتىپ الۋعا تىيىم سالا المايمىز. ويتكەنى ءبىراز ادام اۋىلداردان كەلىپ, ساتىپ الىپ جاتادى. قازىرگى ۋاقىتتا دەنە قىزۋىن تۇسىرەتىن دارىلەرگە بۇرىنعىدان دا كوپ مولشەردە تاپسىرىس بەرۋگە تىرىسىپ جاتىرمىز. ءبىر اپتادان كەيىن ءدارى-دارمەك تاپشىلىعى ماسەلەسى شەشىلەدى, دەيدى «سەمەينوە» ءدارىحانالار جەلىسىنىڭ ديرەكتورى ر.سارسەنوۆ.
سونداي-اق وڭىردە پتر-تەست قورىتىندىسىنىڭ كەشىگۋىنە شاعىم ايتۋشىلار دا جوق ەمەس. وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنافيس تاڭباەۆانىڭ ءمالىم ەتۋىنشە, بۇعان ۋاقىتتىڭ تاپشىلىعى سەبەپ بولىپ وتىر.
– بۇگىنگە دەيىن اتىراۋ وبلىسىنا 29 620 پتر تەست الىندى. كوروناۆيرۋس ينفەكتسياسىن انىقتاۋ ءۇشىن 20 238 رەت تەست جاسالدى. قازىرگى ۋاقىتتا تەستىلەۋ ناتيجەسىنىڭ مەرزىمى كەشىكتىرىلىپ جاتقانى تۋرالى شاعىمدار كوپتەپ تۇسۋدە. وسى ورايدا, ازاماتتارعا زەرتحانالاردا الىنعان بارلىق سىنامالاردى وڭدەۋگە ۋاقىتتىڭ تاپشى ەكەنىن ايتقىم كەلەدى. ماماندار تاۋلىك بويى جۇمىس ىستەۋدە. وكىنىشكە قاراي, ۇلتتىق ساراپتاما ورتالىعى قىزمەتكەرلەرىنىڭ 90 پايىزى كوروناۆيرۋس ينفەكتسياسىن جۇقتىرىپ, قازىر ولار ءتيىستى ەم قابىلداۋدا. بارلىعىنىڭ دا وتباسى, قارت اتا-اناسى, تۋىستارى بار. سوندىقتان, تۇرعىندار بولىپ جاتقان جاعدايلارعا تۇسىنىستىكپەن قاراۋى قاجەت, – دەدى گۇلنافيس تاڭباەۆا.
ونىڭ ايتۋىنشا, تشو كومپانياسى مەن وبلىستىق دەنساۋلىق ساقتاۋ باسقارماسى پتر اپپاراتىن كاسپي مەديتسينالىق جەكە كلينيكاسىنىڭ بالانسىنا بەرۋ تۋرالى كەلىسىم جاساستى. زەرتحانانىڭ تولىق جۇمىس ىستەۋى ءۇشىن قاجەتتى جاعدايدىڭ بارلىعى قاراستىرىلعاننان كەيىن, جۋىق ارادا ەمحانادان كوروناۆيرۋسقا تەست تاپسىرىپ, ناتيجەسىن الۋعا بولادى. ال قازىرگى ۋاقىتتا پتر سىنامالارىن وڭدەۋمەن «Invivo» مەديتسينالىق زەرتحاناسى اينالىسىپ جاتىر.
الايدا اتىراۋدا ىندەتتىڭ ورشۋىنە بايلانىستى جاڭا ينفەكتسيالىق ستاتسيوناردىڭ قاجەتتىگى تۋىنداپ وتىر. ويتكەنى بارىنىڭ ءوزى ناۋقاستارعا تولىپ قالدى. ەندى وسىعان وراي وبلىستىق اۋرۋحانادان 400 ورىندىق ستاتسيونار اشۋ جوسپارلانعان. وبلىس اكىمىنىڭ ورىنباسارى باقىتگۇل حامەنوۆانىڭ ايتۋىنا قاراعاندا, وسىعان بايلانىستى وبلىستىق اۋرۋحاناداعى بارلىق ءبولىم باسقا ەمدەۋ ورىندارىنا اۋىستىرىلادى. قازىر وبلىستىق اۋرۋحانادا 120 پروۆيزورلىق ورىن, كارديوورتالىقتا 70 پروۆيزورلىق كەرەۋەت بار. سونداي-اق گەولوگ ەمحاناسىندا 100 پروۆيزورلىق كەرەۋەت دايىندالۋدا.قالالىق جانە قالا ماڭىنداعى ەمحانالاردا 267 پروۆيزورلىق ورىن اشۋ جوسپارلانۋدا. بۇعان قوسا, ءبىز وبلىستىق اۋرۋحاناداعى بولىمشەلەردى باسقا مەديتسينالىق مەكەمەلەرگە اۋىستىرىپ, مۇندا 400 ورىندىق پروۆيزورلىق ستاتسيونار اشۋدى كوزدەپ وتىرمىز, دەدى باقىتگۇل حامەنوۆا.
ونىڭ ءمالىم ەتۋىنشە, وسىعان دەيىن قاۋىپتى ىندەتكە شالدىققان ناۋقاستاردى ەمدەۋگە كومەگى تيەتىن 111 وكپەنى جاساندى جەلدەتۋ اپپاراتى الىنعان. الايدا اتالعان اۋرۋحاناعا ءدال وسىنداي اپپارات اۋاداي قاجەت. وسىعان بايلانىستى ءوڭىر كاسىپكەرلەرى دەمەۋشىلىك كومەكپەن وبلىستىق اۋرۋحاناعا اسا قاجەتتى ەكى اپپاراتتى الىپ بەردى.
راس, كاسىپكەرلەر دەمەۋشىلىك تانىتۋدان تىس قالىپ جاتقان جوق. سولاردىڭ قاتارىندا ءبىر رەتتىك شپريتس شىعاراتىن «براندو» جشس-نىڭ قۇرىلتايشىسى ماحمۋت مەراليەۆ تا بار. ول ءبىر رەتتىك شپريتستەردى تەگىن تاراتۋ اكتسياسىن قولعا الدى.
– قازىرگى احۋال قولدان كەلگەن كومەكتى كورسەتۋدىڭ قاجەتتىگىن بايقاتتى. سەبەبى ىندەتتىڭ تارالۋ جىلدامدىعى ءورشىپ بارادى. سوعان بايلانىستى جالپى سانى 2 950 000 ءبىر رەتتىك ءشپريتستى تەگىن تاراتۋعا ۇيعارىم جاسادىق. العاشقى لەگى – 500 مىڭ دانا. ال قىزىلقوعا اۋدانىنىڭ ءار تۇرعىنى ءۇشىن 10 دانادان 300 مىڭ داناسىن تەگىن بەرەمىز, – دەيدى ماحمۋت مەراليەۆ.
كاسىپكەر بۇعان دەيىن قىزىلقوعا اۋداندىق اۋرۋحاناسىنا 1 ملن 345 مىڭ تەڭگەنىڭ ءدارى-دارمەگىن, 1 ملن تەڭگەنىڭ وتتەگى باللونىن الىپ بەرگەن. سونداي-اق اۋداندىق اۋرۋحاناداعى 10 پاتسيەنتتىڭ ارقايسىسىنا ماتەريالدىق كومەك كورسەتتى. شىلدەنىڭ العاشقى كۇنى كاسىپكەر ۇسىنعان ءبىر رەتتىك 500 مىڭ ءشپريتستى ۆولونتەرلەر اتىراۋ قالاسىنىڭ تۇرعىندارىنا تەگىن تاراتتى. ءبىر ادامعا – 15 دانا شپريتستەن. ەندى ولار قالا ماڭىنداعى 7 اۋىلدىق وكرۋگ تۇرعىندارىنا دا تەگىن تاراتۋدى كوزدەپ وتىر.
ارينە اتىراۋداعى احۋال كۇردەلى كۇيىندە قالا بەرمەيتىن شىعار. تۇرعىندار تاراپىنان ساقتىق شارالارى قاتاڭ ساقتالسا, جاعداي كەشىكپەي تۇراقتالارى داۋسىز.
اتىراۋ وبلىسى
