اتالعان شارا ويلاعانداي اسەرلى ءارى جوعارى دەڭگەيدە ءوربىدى. ەكسپەديتسيانىڭ اشىلۋىندا قوناقتار نازارىنا كونە جادىگەرلەر, حالىق قولونەرى بۇيىمدارى ۇسىنىلىپ, ۇلتتىق سالت-داستۇرلەر تۋرالى باياندالدى.
جامبىل وبلىستىق تاريحي-ولكەتانۋ مۋزەيى ازىرلەگەن كورمەگە XII-XIII عاسىرلارداعى 50-دەن استام ارحەولوگيالىق جادىگەرلەر قويىلعان دەسەك, ولار كونە تارازدىڭ وتكەنىنەن سىرت شەرتە ءبىلدى.
ەتنواۋىلدا قوناقتار كوشپەلى قازاقتاردىڭ تىرشىلىگىنە بويلاي الدى. وبلىستىق "ARAI" گازەتىنىڭ فوتوگرافى التىنبەك قارتابايدىڭ فوتوكورمەسى ءوڭىر تابيعاتىنىڭ سۇلۋلىعىن پاش ەتتى.
سونداي-اق, "رىسباەۆا ي ك" كومپانياسى جامبىلدىڭ كورنەكى ورىندارى بەينەلەنگەن سۋۆەنيرلەر توپتاماسىن كورسەتسە, "ASPARA" ءسان ءۇيى ۇلتتىق ايەلدەر كيىمىنىڭ ءسان كورسەتىلىمىن وتكىزدى.
"ەكى مىڭ جىلدىق تاريحى بار تاراز قازاقستاندىق جانە شەتەلدىك تۋريستەردى تارتاتىن ورتالىققا اينالۋى ءتيىس. الەمنىڭ كوپتەگەن ەلدەرى مەملەكەتتىك قازىناسىنان قوماقتى قاراجات قاراستىرا وتىرىپ, تۋريستىك جوبالاردى ءساتتى جۇزەگە اسىرىپ كەلەدى. بۇل ورايدا ءبىزدىڭ ءوڭىرىمىزدىڭ دە الەۋەتى جوعارى. دجيپ-سافاري ەكسپەديتسياسى ىشكى ءتۋريزمدى دامىتۋدا ۇلكەن ءرول اتقاراتىنىنا سەنىمدىمىن. شارا الداعى ۋاقىتتا ءداستۇرلى تۇردە جىل سايىن ۇيىمداستىرىلاتىن بولادى", - دەدى وبلىس اكىمى بەردىبەك ساپارباەۆ.
ايماق باسشىسى قوناقتارعا "قار-الما" تاۋ شاڭعىسى كەشەنىنىڭ قۇرىلىسى جانە ىشكى جانە بالالار ءتۋريزمىن دامىتۋ تۋرالى جوسپارلارىمەن ءبولىستى.
قوناقتاردىڭ ءبىرى, بەلگىلى ءانشى ساكەن مايعازيەۆ بارلىق قازاقستاندىقتار ەجەلگى تارازدىڭ باي تاريحى بارشا قازاقستاندىقتاردىڭ ماقتانىشى ەكەندىگىن اتاپ ءوتتى.
"بۇگىن ءبىز جامبىل وبلىسىنىڭ كوپتەگەن تۋريستەردى تارتۋدىڭ قاينار كوزى جانە دامىعان تۋريستىك كلاستەردىڭ ينفراقۇرىلىمىن قۇرۋعا نەگىز بولا الاتىندىعىنا تاعى ءبىر مارتە كوز جەتكىزدىك.
بۇل حالىقارالىق ارەنادا ايماقتىڭ بىرەگەي ءيميدجىن قالىپتاستىرۋعا مۇمكىندىك بەرەدى", - دەپ ءانشى اعىنان جارىلدى.
قۇرمەتتى قوناقتاردىڭ قاتارىندا ءانشى كەنجەبەك ءجانابىلوۆ, اقىن رينات زايتوۆ, ءانشى دوسىمجان تاڭاتاروۆ, اكتەر قايرات ادىلگەرەي, ءانشى ينديرا راسىلحان, بوكسشى جانقوش تۇراروۆ, پالۋان بەيبىت ىستىباەۆ, مما جاۋىنگەرى قۋات حاميتوۆ, فوتوگراف ماقسات ەلىباي, كاسىپكەر دوسبول مالىكومار, بلوگەر وركەن كەنجبەك, ZTB.kz جوباسىنىڭ نەگىزىن قالاۋشى مارعۇلان تۇرسىنوۆ بولدى.
رەسمي اشىلۋ راسىمىنەن كەيىن قوناقتار جول تالعامايتىن كولىكتەرمەن ەكسپەديتسياعا اتتاندى. ولار مارشرۋت بويىنشا قاسيەتتى "توپاعاش" توعايى, "ارعىنكول" جاعالاۋى جانە "سۇمقايتى" جازىعى ارقىلى ءوتتى.
دجيپ-ءسافاريدىڭ قاتىسۋشىلارى ايماقتىڭ كليماتتىق, گەوگرافيالىق جانە گەولوگيالىق جاعدايلارىنىڭ ەرەكشەلىگىنە كوز جەتكىزە الدى. شەرحان مۇرتازا اتىنداعى "رۋحانيات جانە تاريحي زەرتتەۋلەر" ورتالىعىنىڭ قىزمەتكەرلەرى اتالعان جەرلەرگە قاتىستى اڭىزدار تۋرالى اڭگىمەلەپ بەردى.
كەلەسى كۇنى قاتىسۋشىلارعا ايماقتىڭ تاريحي جانە مادەني ەسكەرتكىشتەرىنە ەكسكۋرسيا ۇيىمداستىرىلدى دەسەك, وندا قاتىسۋشىلار "اقىرتاس" ساراي كەشەنى, "تەكتۇرماس" ەتنومادەني كەشەنى, "قاراحان", "داۋىتبەك", "ايشا ءبيبى" جانە "بابادجا حاتۋن" كەسەنەلەرى, قازاق حاندىعىنىڭ 550 جىلدىعىنا ارنالعان ەسكەرتكىشتەردى ارالاپ, تانىستى.
وبلىس اۋماعىندا 3441 تاريحي-مادەني قۇندىلىعى بار ەسكەرتكىش تىركەۋگە الىنعان. ونىڭ ىشىندە ۇلى جىبەك جولى بويىندا ورنالاسقان 5 نىسان يۋنەسكو-نىڭ دۇنيەجۇزىلىك مادەني مۇرا تىزىمىنە ەنگەن ("اقتوبە" (بالاساعۇن), "ورنەك", "قۇلان", "قوستوبە" قالاشىعى جانە "اقىرتاس" ساراي كەشەنى), 6 – ەرەكشە قورعالاتىن مەملەكەتتىك ايماق ("بەرىكقارا", "مەركە", "اڭدىساي", "جۋساندالا", "ۇمبەت", "قاراقوڭىز") جانە 37-نەگىزگى تۋريستىك نىسان بار.
بۇگىنگى تاڭدا وڭىردەگى 37 نەگىزگى تۋريستىك نىسان بويىنشا 22 ارنايى تۋريستىك باعىت ازىرلەندى.
