قوعام • 28 ماۋسىم، 2020

"باقىتتى وتباسى" سەرتيفيكاتىنا كىمدەر ءۇمىتتى؟

64 رەت كورسەتىلدى

مەملەكەتتىك باعدارلامانىڭ قاتىسۋشىلارىنا تۇرعىن ءۇي سەرتيفيكاتتارىن بەرۋگە وتىنىشتەر قابىلدانىپ جاتىر. بۇل تۋرالى "اتامەكەن" ۇكپ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

قازىرگى تاڭدا مەملەكەت اتىنان تۇرعىن ءۇي سەرتيفيكاتتارى "باقىتتى وتباسى" يپوتەكالىق باعدارلاماسىنا قاتىسۋشى ازاماتتارعا ۇلەستىرىلۋدە. اتالعان باعدارلاما بويىنشا يپوتەكالىق نەسيە 2 پايىزبەن 20 جىلعا دەيىنگى ۋاقىتقا بەرىلەدى.

سونداي-اق العاشقى جارنا باسپانا قۇنىنىڭ 10 پايىزى بولۋى ءتيىس. وعان كوپبالالى، تولىق ەمەس جانە مۇمكىندىگى شەكتەۋلى بالا تاربيەلەپ وتىرعان وتباسىلار قاتىسا الادى. سايكەسىنشە، تۇرعىن ءۇي سەرتيفيكاتتارى دا وسى ساناتتاعى تۇرعىندارعا بەرىلەدى. پاۆلودار قالالىق جۇمىسپەن قامتۋ جانە الەۋمەتتىك باعدارلامالار ءبولىمى باسشىسىنىڭ ورىنباسارى لاريسا كۋزمەنوۆانىڭ ايتۋىنشا، بيىل 29 ساۋىردە تۇرعىن ءۇي سەرتيفيكاتتارىن بەرۋ ەرەجەسىنە وزگەرىستەر ەنگىزىلگەن.

"مەملەكەتتىك قىزمەتتىڭ ناقتى مەرزىمدەرى مەن تاپسىرىلاتىن قۇجاتتار ءتىزىلىمى بەكىتىلدى. بۇرىن سەرتيفيكات تەك جاڭا ۇيلەر ساتىپ الۋعا بەرىلسە، ەندى قايتالاما نارىقتان الىناتىن باسپانالارعا دا ۇلەستىرىلمەك. قۇجاتتا جوعارىدا اتالعان ساناتتاردان بولەك، ءبىلىم بەرۋ، دەنساۋلىق ساقتاۋ، مادەنيەت، سپورت سالاسىندا سۇرانىسقا يە ماماندار، الەۋمەتتىك قامسىزداندىرۋ، قۇقىق قورعاۋ ورگاندارىنىڭ قىزمەتكەرلەرى، مەملەكەتتىك قىزمەتشىلەر دە تۇرعىن ءۇي سەرتيفيكاتى بەرىلەتىندەر قاتارىنا كىرگىزىلدى. بىراق ولار "7-20-25" باعدارلاماسى ارقىلى باسپانالى بولعاندا بۇل كومەكتى الا الادى. اتالعان باعدارلاما اياسىندا سەرتيفيكاتتار ۇلەستىرۋ جىلدىڭ ەكىنشى جارتىسىنان كەيىن باستالماق"، – دەيدى لاريسا كۋزمەنوۆا.

"باقىتتى وتباسى" باعدارلاماسىنا قاتىسۋشىلار سەرتيفيكاتقا ءوتىنىش بەرەرگە دەيىن ولاردىڭ يپوتەكالىق نەسيەسى ماقۇلدانعان بولۋى ءتيىس. سونداي-اق ساتىپ الاتىن ناقتى پاتەردىڭ دە بەلگىلى بولۋى شارت.

"ايتا كەتۋ كەرەك، سەرتيفيكاتتىڭ ەكى ءتۇرى بار. ءبىرىنشىسى – قايتارىمسىز الەۋمەتتىك كومەك رەتىندە بەرىلەدى. ونىڭ كولەمى باستاپقى جارنانىڭ 100 پايىزى كولەمىندە، بىراق، 1 ملن تەڭگەدەن اسپايدى. مۇنداي سەرتيفيكات الۋعا وتباسىنىڭ تابىسى ونىڭ مۇشەلەرىنە شاققاندا ارقايسىسىنا كۇنكورىس مينيمۋمىنىڭ ەكى ەسەلەنگەن مولشەرىنەن اسپاۋى تالاپ ەتىلەدى. بۇل – 65 376 تەڭگە. ال وتباسىنىڭ ءاربىر مۇشەسىنە كىرىس كولەمى اتالعان سومادان جوعارى بولسا، وندا "باقىتتى وتباسى" قاتىسۋشىسىنا تۇرعىن ءۇي سەرتيفيكاتىنىڭ باسقا ءتۇرى – بيۋدجەتتىك نەسيە بەرىلەدى. ياعني مەملەكتەتتىڭ قايتارىمدى الەۋمەتتىك قولداۋى. ونىڭ مولشەرى باستاپقى جارنانىڭ 50 پايىزىن قۇرايدى، الايدا 1 ملن تەڭگەدەن اسپايدى. بيۋدجەتتىك بۇل نەسيە تۇرعىندارعا 15 جىلعا دەيىن 0،01 پايىزبەن بەرىلەدى"، – دەيدى ول.

تۇرعىن ءۇي سەرتيفيكاتىن الۋ ءۇشىن ازاماتتار پاۆلودار قالاسى اكىمىنىڭ اتىنا بەلگىلەنگەن تارتىپتەگى ءوتىنىش جازۋى كەرەك. ءوتىنىش بەرۋشىنىڭ جەكە كۋالىگى، بالالارىنىڭ تۋ تۋرالى كۋالىكتەرى، وتباسىنىڭ سوڭعى التى ايداعى تابىسى تۋرالى انىقتاما، يپوتەكالىق نەسيەنىڭ بانكتە ماقۇلدانعانى تۋرالى انىقتاما تاپسىرادى.

ول انىقتامادا ازاماتتىڭ الاتىن ناقتى باسپاناسى، باستاپقى جارنانىڭ مولشەرى جانە اي سايىنعى تولەمى كورسەتىلۋى ءتيىس. ءوتىنىش ءۇش كۇن ىشىندە قارالىپ، تۇرعىنعا جاۋاپ بەرىلەدى. ياعني ماقۇلدانعانى نەمەسە ماقۇلدانباسا، سەبەبى كورسەتىلىپ، حات جىبەرىلەدى.

"بيىل قالالىق بيۋدجەتتەن اتالعان تۇرعىن ءۇي سەرتيفيكاتتارىن ۇلەستىرۋگە 93،4 ملن تەڭگە ءبولىندى. وعان قوسا، بيۋدجەتتىك نەسيەلەر بەرۋگە 200 ملن تەڭگە قاراستىرىلىپ وتىر. ارينە، قاجەتتىلىك تۋىنداپ، سۇرانىس ارتسا، بەرىلەتىن سەرتيفيكاتتار سانى قايتا قارالۋى مۇمكىن. قازىرگى تاڭدا 17 ادام ءوتىنىش ءبىلدىردى. بىلتىر قالامىزدا 37 بيۋدجەتتىك نەسيە بەرىلگەن بولاتىن"، – دەيدى لاريسا كۋزمەنوۆا.

سوڭعى جاڭالىقتار

عارىشتان انىقتالعان قوقىستار

ەكولوگيا • بۇگىن، 08:24

ۆيرۋس جۇقتىرۋ توقتاماي تۇر

كوروناۆيرۋس • بۇگىن، 08:16

ءورت سوندىرگەن وجەتتەر

ايماقتار • بۇگىن، 08:12

ەرلىككە بەرگىسىز ەڭبەك

قوعام • بۇگىن، 08:09

جاساندى جۇرەك سالىندى

الەم • بۇگىن، 08:02

نۇروتاندىقتاردىڭ ايقىن جەڭىسى

ساياسات • بۇگىن، 07:43

شامانىڭ ءانى

ونەر • كەشە

سوتتالعان جىرلار

ادەبيەت • كەشە

9 اي «تولعاتقان» 9 پايىز

ەكونوميكا • كەشە

ۇقساس جاڭالىقتار