وتىرىستا ءسوز العان ورتالىق سايلاۋ كوميسسياسىنىڭ توراعاسى بەرىك يماشەۆ 2020 جىلعى 12 تامىزعا تاعايىندالعان پارلامەنت سەناتىنىڭ دەپۋتاتتارىن سايلاۋ جونىندەگى سايلاۋ ناۋقانىنىڭ بارىسىمەن قىسقاشا تانىستىردى.
«بيىلعى 25 ماۋسىمداعى جاعداي بويىنشا دەپۋتاتتىققا 88 ادام ۇسىنىلدى. ورتاشا العاندا ءبىر دەپۋتاتتىق ورىنعا 5 ادام ۇمىتكەر بولىپ وتىر», دەپ اتاپ ءوتتى ب.يماشەۆ.
وتىرىستا ورتالىق سايلاۋ كوميسسياسىنىڭ حاتشىسى ءسابيليا مۇستافينا بايانداما جاسادى. ونىڭ ايتۋىنشا, مەملەكەت كانديداتتارعا بۇقارالىق اقپارات قۇرالدارىندا ءوز باعدارلامالارىن تانىستىرۋ ءۇشىن تەڭ قاراجات بولىنۋىنە كەپىلدىك بەرەدى. كانديداتتاردىڭ باعدارلامالارىن تانىستىرۋعا تەلەارنالار ءۇشىن 10 مينۋت, راديولار ءۇشىن 10 مينۋت, مەرزىمدى باسىلىمدار مەن جەلىلىك باسىلىمدارداعى جاريالانىم ءۇشىن ەكى ماقالا كولەمىندە مۇمكىندىك بەرىپ وتىر.
سونداي-اق رەسپۋبليكالىق بيۋدجەت قاراجاتىنان كانديداتتاردىڭ سايلاۋ الدىنداعى جاريالى ءىس-شارالارىن وتكىزۋگە, ۇگىت ماتەريالدارىن شىعارۋعا ارنالعان شىعىستارى مەن كولىك شىعىستارى ورتالىق سايلاۋ كوميسسياسى بەلگىلەگەن مولشەردە وتەلەدى», دەدى س.مۇستافينا.
وسك ءوز قاۋلىسىمەن پارلامەنت سەناتىنىڭ دەپۋتاتتىعىنا كانديداتتىڭ رەسپۋبليكالىق بيۋدجەت قاراجاتىنان وتەلەتىن شىعىستارىن 450 000 تەڭگە كولەمىندە بەلگىلەگەن. ونىڭ 300 000 تەڭگەسى تەلەديداردان, راديودان ءسوز سويلەۋ جانە مەرزىمدى باسپا باسىلىمدارىندا 2 ماقالا جاريالاۋ ءۇشىن, سايلاۋ الدىنداعى كوپشىلىك ءىس-شارالاردى وتكىزۋ جانە ۇگىت ماتەريالدارىن شىعارۋ ءۇشىن 70 000 تەڭگە, ال كولىك شىعىندارى ءۇشىن 80 000 تەڭگە بولەك قاراستىرىلعان.
سونداي-اق س.مۇستافينا پارلامەنت سەناتىنىڭ دەپۋتاتتىعىنا كانديداتتاردىڭ سايلاۋ قورلارى تۋرالى اقپاراتتى ءتۇسىندىردى. باياندامادان بەلگىلى بولعانداي, كانديداتتىڭ مەنشىكتى قاراجاتىنىڭ جالپى سوماسى زاڭنامامەن بەلگىلەنگەن ەڭ تومەنگى جالاقىدان ەكى ءجۇز ەسە مولشەردەن اسپاۋى ءتيىس, ياعني بۇل 8 500 000 تەڭگەنى قۇرايدى. سونىمەن بىرگە باسقا دا ازاماتتار مەن ۇيىمداردىڭ كورسەتەتىن قولداۋى زاڭنامادا بەلگىلەنگەن ەڭ تومەنگى جالاقى مولشەرىنەن بەس ءجۇز ەسەدەن اسپاۋى ءتيىس, ال بۇل 21 250 000 تەڭگە.
وسك توراعاسى ب.يماشەۆ «سەنات دەپۋتاتتارىنىڭ جاناما سايلاۋىن وتكىزۋ كەزىندە قازىرگى زامانعى اقپاراتتىق تەحنولوگيالاردى قولدانۋ سايلاۋ پروتسەسىنىڭ اشىقتىعى مەن جاريالىلىعىن قامتاماسىز ەتەدى», دەپ اتاپ ءوتتى.
