"بارشاڭىزعا ءمالىم, قازاقستان پرەزيدەنتى قىزمەتىن اتقارعان ءبىر جىل وڭاي بولعان جوق. اتالعان مەرزىمدى اسا كۇردەلى سىناقتاردى ەڭسەرگەن جىل دەپ ايتۋعا بولادى. دەگەنمەن, مەن حالىقتىڭ قولداۋىن ءاردايىم سەزىندىم. بۇل ماعان كۇش-جىگەر بەرىپ, مەملەكەت باسقارۋ ءىسىن تابىستى جۇرگىزۋىمە ىقپال ەتتى. جىل بويى ساياسي جانە ەكونوميكالىق سالالار بويىنشا كوپتەگەن رەفورمالار جۇزەگە اسىرىلدى. بۇل ساياسات الداعى كەزەڭدەردە دە جالعاسا بەرەدى. ەلىمىزدى ودان ءارى جاڭعىرتۋعا, دامىتۋعا قاتىستى يدەيالارىم بار, ول يدەيالاردى حالىق ءىس جۇزىندە سەزىنگەنىن قالايمىن", - دەدى مەملەكەت باسشىسى.
پرەزيدەنت ءبىز مەملەكەت رەتىندە دە, ۇلت رەتىندە دە ءبىر ورىندا توقتاپ قالماۋىمىز كەرەكتىگىن ايتىپ ءوتتى.
"ونداي جاعدايدا ەل توقىراۋعا ۇشىرايدى. ونىڭ زاردابى مەملەكەتتىگىمىزگە تيەدى. اۋىر تيەدى. اششى دا بولسا ايتايىن, ءبىز – قازاقتار, وسىناۋ الماعايىپ كۇردەلى الەمدە, تۇپتەپ كەلگەندە, ەشكىمگە سونشالىقتى قاجەت ەمەسپىز. ءوز مەملەكەتىمىزگە عانا قاجەتپىز. وسى ءبىر قاراپايىم قاعيدانى ەشقاشان ەستەن شىعارماۋىمىز قاجەت. الەمدەگى قازاقستاننىڭ جەتىستىگىن كورە المايتىن, "مىسىقتىلەۋ" ساياساتكەرلەر, ءتىپتى مەملەكەتتەر دە بىزدەن الىستاپ كەتكەن جوق, ماڭايىمىزدان ۇزاماي, ءار قادامىمىزدى باعىپ وتىر. سوندىقتان ەلىمىزدى وركەندەتۋ, كوركەيتۋ – تەك قانا ءوز قولىمىزدا. ءبىزدىڭ وسىنداي سىندارلى ساتتە قاتەلەسۋگە ەش قاقىمىز دا, قۇقىمىز دا جوق. جانە مەملەكەت قۇرۋشى ۇلت رەتىندە بۇل ماسەلەنى ءبىرىنشى كەزەكتە ءوزىمىز تەرەڭ سەزىنۋىمىز قاجەت. ويتكەنى قازاق حالقىنىڭ تاعدىرى تاريح تارازىسىندا تۇر…", - دەدى مەملەكەت باسشىسى.
