زاماناۋي اۆتورلاردىڭ قالاماقىسى قانشا؟

ادەبيەت • 25 ماۋسىم، 2020

زاماناۋي اۆتورلاردىڭ قالاماقىسى قانشا؟

31 رەت كورسەتىلدى

بىلتىر Forbes جۋرنالى الەمدەگى ەڭ كوپ قالاماقى الاتىن 100 اتاقتى ادامنىڭ رەيتينگىن جاساعان بولاتىن. ونىڭ ىشىندە ەكى-اق جازۋشى بار، - دەپ حابارلايدى Egemen.kz.

مارجان ءابىش

ايگىلى باسىلىم ايدارىنداعى وتىزىنشى ورىندى گارري پوتتەردىڭ قىزىقتى وقيعالارىنا قۇرىلعان روماندار سەرياسىن جازعان بريتاندىق اۆتور دجوان روۋلينگ الىپ وتىر. ونىڭ وتكەن جىلعى تابىسى 92 ميلليون دوللاردى قۇراعان. بۇل تاسىعان بايلىقتىڭ ءبارى گارري پوتتەردىڭ ارقاسى دەۋگە سەنۋ قيىن. دەگەنمەن، ول كىتاپ 500 ميلليون دانادان اسىپ جىعىلىپ باسىلىپ شىققانى ەسىمىزدە. ءتىپتى، تيراجى جاعىنان بيبليادان دا وزدى. بىراق، روۋلينگ سىباعاسىنىڭ ەڭ ۇلكەنى – فرانشيزالار مەن پەسا قويىلىمدارىنىڭ تولەمى بولىپ شىقتى.

تابىستى ءرومانيستىڭ تەاتر ساحناسىندا قويىلعان پەساسى ءبىر اپتادا 2،3 ميلليون دوللار تابىس اكەلگەن. بۇل برودۆەي تاريحىنداعى رەكوردتىق كورسەتكىش. ال گارري پوتتەردىڭ عاجايىپ الەمى تۋرالى ونىنشى فيلم – «فانتاستيكالىق جانۋارلار: گرين-دە-ۆالدتىڭ قىلمىسى» كۇللى الەم بويىنشا 650 ميلليون دوللار قارجى جيناعان.

Forbes-ءتىڭ 28-ءشى ورىنىندا ەڭ كوپ قالاماقى الاتىن امەريكاندىق اۆتور دجەيمس پاتتەرسون 70 ميلليون دوللار كىرىسپەن تۇر. ونىڭ كىتاپتارىنىڭ 5،5 ميلليوننان اسا داناسى ساتىلعان.

كورولدىك ادەبي ۇيىمنىڭ (Royal Society of Literature) زەرتتەۋلەرىنە سۇيەنسەك، ۇلىبريتانيادا 70 پايىزعا جۋىق كاسىبي جازۋشىلار 2018 جىلى 10 مىڭ فۋنت ستەرلينگ تابىس تاپقان.

ال ىرگەمىزدەگى رەسەيدە جوعارىدا اتالعان اۋقىمدى كورسەتكىشتەر قايتالانبايدى. رەسەيدە قازىر ءبىر كىتاپ ورتا ەسەپپەن 4،5 مىڭ تيراجبەن جارىق كورىپ وتىر. تەك تانىمال دەتەكتيۆشى داريا دونتسوۆانىڭ عانا تيراجى جالپى العاندا 200 ميلليون داناعا جەتەدى.

جازۋشىلىققا جاڭا قادام باسقان اۆتوردىڭ قالاماقىسى 25 مىڭ رۋبلدان اسپايدى. ال الەمدىك ارەناعا شىعىپ جۇرگەن جازۋشىلارعا ميلليون تولەنۋى دە ابدەن مۇمكىن. ماسەلەن، جاڭاعى دونتسوۆانىڭ ءبىر شىعارماسىنىڭ قالاماقىسى 140 مىڭ دوللارعا دەيىن جەتەدى. دەتەكتيۆتىك روماندارىمەن تانىلعان الەكساندرا مارينيناعا 100 بەن 150 مىڭ دوللاردىڭ اراسىندا تولەنىپ ءجۇر. بۇدان بولەك بوري اكۋنين ورتاشا ەسەپپەن 30 مىڭ دوللار، ال تاتيانا ۋستينوۆا 25 مىڭ دوللار كولەمىندە قالاماقى الا الادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز