بۇگىن قازاقستاندىق ءتارتىپ ساقشىلارى كاسىبي مەرەكە – پوليتسيا كۇنىن اتاپ وتۋدە.
1992 جىلعى 23 ماۋسىمدا جوعارعى كەڭەس “قازاقستان رەسپۋبليكاسىنىڭ ىشكى ىستەر ورگاندارى تۋرالى” زاڭ قابىلدادى, ول ءبىزدىڭ مەملەكەتىمىزدىڭ تاريحىندا پوليتسيانىڭ مىندەتتەرى مەن فۋنكتسيالارىن, ونىڭ قۇقىقتارى مەن فۋنكتسيالارىن انىقتاعان, پوليتسيانىڭ پراكتيكالىق قىزمەتى ءۇشىن قۇقىقتىق الاڭدى قالىپتاستىرعان العاشقى اكت بولدى. ىشكى ىستەر ورگاندارى قىزمەتىنىڭ نەگىزگى قاعيداتتارى رەتىندە زاڭ جاريالىلىقتى, زاڭدىلىقتى جانە ەڭ باستىسى ازاماتتاردىڭ قۇقىقتارىن قۇرمەتتەۋ مەن ساقتاۋدى بەكىتتى.
بۇگىندە ىشكى ىستەر مينيسترلىگى – ەلدەگى ەڭ كوپفۋنكتسيونالدى مەملەكەتتىك ورگانداردىڭ ءبىرى, وندا 140 مىڭعا جۋىق قىزمەتكەر, قۇتقارۋشىلار مەن اسكەري قىزمەتشىلەر ەڭبەك ەتەدى.
كۇن سايىن ىشكى ىستەر ورگاندارىنىڭ قىزمەتكەرلەرى مەن اسكەري قىزمەتشىلەرى داعدارىس جاعدايىنا تاپ بولعان ادامدارعا كومەككە كەلەدى, قىلمىستاردى اشىپ, قوعامدىق ءتارتىپتى قورعايدى.
ىشكى ىستەر ورگاندارى قىزمەتكەرلەرىنىڭ قايسارلىعى مەن ەرلىگىن ەل باسشىلىعى ءاردايىم جوعارى باعالايدى. تەك بيىل مەملەكەت باسشىسىنىڭ جارلىعىمەن 94 قىزمەتكەر مەملەكەتتىك ناگرادالارمەن ماراپاتتالدى. ىشكى ىستەر ورگاندارىنىڭ 2757 قىزمەتكەرى, ونىڭ ىشىندە كارانتيندىك ءىس-شارالار كەزىندە كوزگە تۇسكەندەر ۆەدومستۆولىق ناگرادالارمەن ماراپاتتالدى.
"پوليتسيا قىزمەتكەرلەرىنە ۇلكەن جاۋاپكەرشىلىك جۇكتەلەدى. بۇل قازاقستاندىقتاردىڭ تىنىشتىعى مەن قاۋىپسىزدىگىن, سونداي-اق كوشەلەردەگى ءتارتىپتى قامتاماسىز ەتۋ. ول ءۇشىن بىزدە بارلىعى: تاۋەلسىزدىك جىلدارى ۇلت كوشباسشىسى نۇرسۇلتان ءابىش ۇلى نازارباەۆ قالىپتاستىرعان قۋاتتى مەملەكەتتىك جۇيە, سونداي-اق ءبىزدىڭ پرەزيدەنتىمىز قاسىم-جومارت كەمەل ۇلى توقاەۆتىڭ جان-جاقتى قولداۋى بار. ىشكى ىستەر ورگاندارىن ماتەريالدىق-تەحنيكالىق جاراقتاندىرۋ جاقساردى. قازىرگى زامانعى قۇرالدار مەن تەحنيكانى پايدالانا وتىرىپ, پوليتسيا ءموبيلدى قۇرىلىمعا اينالدى. بۇل قىلمىسپەن ءتيىمدى كۇرەسۋگە مۇمكىندىك بەرەدى. بۇگىنگى تاڭداعى ءبىزدىڭ باستى مىندەتىمىز – قۇقىق بۇزۋشىلىقتىڭ الدىن الۋ. بۇل باعىتتاعى جۇمىستاردىڭ ناتيجەسى كوزگە انىق كورىنە باستادى", دەپ اتاپ ءوتتى ىشكى ىستەر ءمينيسترى ەرلان تۇرعىمباەۆ ارىپتەستەرى مەن ارداگەرلەرگە ارناعان ءوز قۇتتىقتاۋىندا.
"پوليتسيا قىزمەتكەرلەرى كۇن سايىن ءوز ءومىرىن ويلانباستان قاتەرگە تىگىپ, قيىن جاعدايعا تاپ بولعان وتانداستارىنا كومەككە كەلەدى دەپ اتاپ ءوتتى ۆەدومستۆو باسشىسى. وكىنىشكە قاراي, تاۋەلسىزدىك جىلدارى قىزمەتتىك بورىشىن اتقارۋ كەزىندە 791 قىزمەتكەر قازا تاۋىپ, 2555 ادام جاراقات الدى. ءبىز انتىنا ادال بولىپ قالعان ارىپتەستەرىمىزدى ەشقاشان ۇمىتپايمىز", دەپ تۇيىندەدى ول قۇتتىقتاۋ سوزىندە.
ىشكى ىستەر ورگاندارىنىڭ داستۇرلەرى ونداعان جىلدار بويى قالىپتاسقان. سوندىقتان دا بۇل كۇنى ەل ءۇشىن كوپ ەڭبەك سىڭىرگەن جانە جاس قىزمەتكەرلەردى تاربيەلەۋگە ۇلەس قوسىپ جۇرگەن ارداگەرلەردى ءاردايىم ۇلكەن ىلتيپاتپەن اتاپ وتۋگە ءتيىسپىز.
ەرلان تۇرعىنباەۆ بۇدان ءارى ىشكى ىستەر ورگاندارى قىزمەتكەرلەرىنىڭ وتباسى مۇشەلەرىن قۇتتىقتاپ, ولارعا مىقتى دەنساۋلىق پەن باقىت تىلەدى.
