"مەملەكەتتىك قىزمەتشى كۇنىمەن قۇتتىقتايمىن! ەلگە قىزمەت ەتۋ – مارتەبەلى مىندەت. نەگىزگى قاعيداسى – ءوز ىسىنە ادال بولىپ, ابىروي بيىگىنەن كورىنۋ. ەڭ باستىسى – حالىق ۇنىنە قۇلاق اسىپ, ەل مۇددەسى ءۇشىن ەڭبەك ەتەمىز. دەنساۋلىق پەن تابىس تىلەيمىن", دەپ جازدى ب. ساعىنتاۆ.
ەسكە سالساق, باقىتجان ساعىنتاەۆ الماتى اكىمى لاۋازىمىنداعى العاشقى جۇمىس كۇنى قالا تۇرعىندارىنا ۇندەۋ جاساپ, Facebook, Instagram جانە Twitter-دە ءوزىنىڭ پاراقشالارىن اشاتىندىعىن حابارلاعان بولاتىن.
"الماتى ارقايسىمىزدىڭ جۇرەگىمىزدەن ەرەكشە ورىن العان قالا, الماتىعا دەگەن ءار قازاقستاندىقتىڭ ىقىلاسى ەرەكشە. مەنىڭ باستى ماقساتىم – الماتىنىڭ ءار تۇرعىنى بەرەكەلى ءومىر سۇرەتىن, قاۋىپسىز دە قولايلى, زامانعا ساي مەگاپوليسكە اينالدىرۋ. ءبىز وعان تەك بىرگە, تىزە قوسىپ ەڭبەك ەتۋ ارقىلى جەتە الامىز. سوندىقتان سىزدەردىڭ تالاپ-تىلەكتەرىڭىزدى ءبىلىپ, ۋاقىتىلى جاۋاپ بەرۋ مەن ءۇشىن وتە ماڭىزدى. قالانىڭ پروبلەمالارى مەن دامۋ ستراتەگياسىن سىزدەرمەن بىرگە اشىق تالقىلاعىم كەلەدى. بارلىعىمىزدىڭ تاعدىرىمىزبەن بايلانىستى ماڭىزدى شەشىمدەردى ازىرلەپ, قابىلداۋ كەزىندە سىزدەردىڭ قولداۋلارىڭىز مەن ءۇشىن ماڭىزدى. اقىلداسا وتىرىپ, بىرگە جۇمىس ىستەيىك!", - دەگەن بولاتىن سول كەزدە قالا اكىمى.
ب. ساعىنتاەۆ الەۋمەتتىك جەلىلەردەگى ءوزىنىڭ پاراقشالارىندا قالا تۇرعىندارىنا ارناعان ماڭىزدى مالىمدەمەلەر مەن ۇندەۋلەردى جاريالايدى, قابىلدانعان شەشىمدەر تۋرالى اڭگىمەلەپ, ازاماتتىق قوعامداستىقتى ديالوگقا شاقىرادى. مىسالى, Instagram-داعى پاراقشاسىندا 233 جازبا جاريالاعان, اتالعان پاراقشانىڭ 253 مىڭنان استام وقىرمانى بار. Facebook-تاعى وقىرماندار سانى 13 مىڭنان استام, ال Twitter-دەگى وقىرماندار قاتارى 3,5 مىڭنان اسادى.
ەل پرەزيدەنتى اتاپ وتكەندەي "ەستيتىن مەملەكەت" قاعيداسىنا سايكەس قالا اكىمى ازاماتتاردى اكىمدىكتە جانە Nur Otan پارتياسىنىڭ قالالىق فيليالىنداعى قوعامدىق قابىلداۋدا جەكە قابىلدايدى. مۇنداي جەكە قابىلداۋلارعا الماتىنىڭ 181 تۇرعىنى قاتىستى.
مەگاپوليس باسشىسى قالا اكىمى بولىپ تاعايىندالعان كۇننەن باستاپ قالانىڭ بارلىق اۋداندارىنىڭ تۇرعىندارىمەن 16 كەزدەسۋ وتكىزدى. ال 2019 جىلدىڭ قورىتىندىسى بويىنشا وتكەن قالا اكىمىنىڭ ەسەپتىك كەزدەسۋىنە شامامەن ءتورت مىڭعا جۋىق قالا تۇرعىندارى قاتىستى.
كەزدەسۋلەر ناتيجەسى بويىنشا ايتىلعان ماسەلەلەردى شەشۋ ءۇشىن جۇزەگە اسىرىلاتىن شارالاردىڭ جوسپارلارى بەكىتىلەدى. اعىمداعى جىلى ونلاين-كونفەرەنتسيالار ارقىلى ازاماتتاردى قابىلداۋ پراكتيكاسى قولعا الىندى.
