ەسىنە ماسكەۋدەگى تيميريازەۆ اتىنداعى اۋىلشارۋاشىلىق اكادەمياسىن قىزىل ديپلوممەن بىتىرگەننەن كەيىنگى ەڭبەك جولىن باستاعان سولتۇستىك قازاقستان وبلىسىنداعى «مارەۆسكي» سوۆحوزى ءتۇستى. ونىڭ الدىندا اۋدان باسشىلارى ەرەكەڭنىڭ ماسكەۋدەگى تيميريازەۆ اكادەمياسىن بىتىرگەن قىزىل ديپلومىن كورىپ, ونى شارۋاشىلىقتىڭ باس اگرونومى ەتىپ تاعايىندادى. ال ەگىن وراعى كەزىندە سوۆحوزدىڭ ديرەكتورى باسقا جۇمىسقا اۋىسىپ كەتۋىنە بايلانىستى اۋدان باسشىلىعى ەركىن نۇرجان ۇلىنا ديرەكتوردىڭ مىندەتىن قوسا اتقارۋدى تاپسىردى. ءدال سول كەزدە ەرەكەڭ بار-جوعى 25 جاستا بولاتىن. ول بىردەن شارۋاشىلىق جۇمىسىنا قىزۋ ارالاسىپ, ءوزىنىڭ ءبىلىمى مەن بىلىكتىلىگىن كوپشىلىككە تانىتا ءبىلدى. ەگىن وراعى تابىستى اياقتالىپ, شارۋاشىلىق جۇمىسىن قورىتىندىلاعان وبلىس جانە اۋدان باسشىلارى ەركىن اۋەلبەكوۆتى سوۆحوز ديرەكتورى ەتىپ بەكىتتى.
ديرەكتورلىق قىزمەتكە كىرىسىسىمەن ەرەكەڭ حالىقتىڭ الەۋمەتتىك تۇرمىسىن جاقسارتۋدى قولعا الدى. تىڭ يگەرۋ جىلدارى جاڭا سالىنعان ۇيلەر سول كەزدە وداقتاس رەسپۋبليكالاردان كەلگەن باسقا ۇلت وكىلدەرىنە ءبىرىنشى كەزەكتە بەرىلىپ, ءوزىمىزدىڭ قازاقتار شەتقاقپاي قالاتىن. سول جاعدايدى بايقاعان ەرەكەڭ, اۋىلداستارىمەن اقىلداسا كەلە اسارلىق ادىسكە كوپشىلىكتى جۇمىلدىرا ءبىلدى. بۇكىل اۋىل بولىپ, سەنبى, جەكسەنبىدەگى بوس ۋاقىتتارىن ءۇي تۇرعىزۋعا ارناپ, لاي يلەپ, سامان قۇيعان جىگىتتەرگە ءوزى باس بولىپ جۇرگەن سوڭ, قالعان جۇرت تا تىس قالماي, ۇيىمشىلىقتىڭ ارقاسىندا ءبىر ماۋسىمدا باسپانالارىن جاقسارتىپ الدى.
ەركىن اۋەلبەكوۆتىڭ لاۋازىمىنىڭ تەز ءوسۋى اعا ۇرپاق وكىلدەرىنىڭ كوز الدىندا ءوتتى. وعان بىردەن-ءبىر سەبەپ, ونىڭ ءوزى جەتەكشىلىك ەتەتىن شارۋاشىلىق تۇرعىندارىنىڭ الەۋمەتتىك تۇرمىستارىن كوتەرە ءبىلۋى, ءونىم ءوندىرۋدىڭ قوسىمشا كوزدەرى ىزدەستىرىلىپ, ەڭبەك ادامدارىنىڭ كۇش-جىگەرى سونداي ۇرىمتال تۇستارعا جۇمىلدىرا بىلۋىندە ەدى. وتكەن عاسىردىڭ الپىسىنشى جىلدارى كادرلاردى تاڭداۋداعى قوعامدا قالىپتاسقان تالاپ بويىنشا ۇيىمداستىرۋ قابىلەتى بار, قاي قىزمەتتە بولسىن ءوزىن جاقسى قىرىنان كورسەتە بىلگەن ادامدارعا ءاردايىم جول اشىق بولاتىن. ەرەكەڭ سولتۇستىك قازاقستان وبلىسىندا ىستەگەن قىسقا ۋاقىتتا ءوزىن سونداي قىرىنان كورسەتە ءبىلدى. قاراپايىم حالىقتىڭ اراسىندا قىزۋ ەڭبەكتە قايناپ ءپىستى. بولمىسىنداعى العىر مىنەز دە, جان-جاقتى ىسكەرلىك تە, وجەتتىلىك پەن ەرلىك تە, مىنە, وسى تۇستا بوي كورسەتىپ, جاس ەركىننىڭ ازاماتتىق تۇلعاسىن ەرەكشەلەندىرە ءتۇستى.
بار-جوعى سەگىز جىلعا جەتەر-جەتپەس ۋاقىتتا ەرەكەڭ وسى وبلىستاعى لاۋازىمدى قىزمەتتەردىڭ ءبارىن جەمىستى اتقارىپ شىقتى. 1961 جىلى ول سولتۇستىك قازاقستان وبلىسى اتقارۋ كوميتەتى توراعاسىنىڭ ورىنباسارى قىزمەتىنە تاعايىندالدى, سودان سوڭ ەرەكەڭ وبلىستىق پارتيا كوميتەتىنىڭ ەكىنشى حاتشىلىعىنا جوعارىلاتىلدى, كوپ ۇزاماي وبلىستىق اتقارۋ كوميتەتىنىڭ توراعاسى بولىپ بەكىتىلدى. وسىنشاما لاۋازىمدى قىزمەتتەردى ءمىنسىز اتقارىپ, سالاۋاتتى دا ساليقالى قالپىنان اينىمايتىن ەرەكەڭنىڭ تۇلعاسىنان پاراسات-پايىمى جانە بايىپتى ىسكەرلىگى سەزىلىپ تۇراتىن. وبلىس جۇرتشىلىعى ەركىن اۋەلبەكوۆتى وسىنداي قىرىنان تاني ءبىلدى. قابىلداۋعا كەلگەندەر اقىل-كەڭەس سۇرايدى. ونداي جاندار قاشاندا ريزا كوڭىلمەن العىسىن ايتىپ شىعاتىن. وسىنداي قۇرمەتكە يە بولۋ ەكىنىڭ ءبىرىنىڭ ماڭدايىنا جازىلا بەرمەس باقىت جانە ول اكەسى نۇرجاننىڭ قانىمەن, اناسى قاليمانىڭ اق سۇتىمەن دارىعان ونەگەلى تاربيەدەن بولاتىن. ەركىن نۇرجان ۇلىنىڭ باسشىلىقتاعى تاباندىلىعى مەن دارىندىلىعى, ادامدارمەن تەز ءتىل تابىسىپ, ولاردى ورتاق ىسكە جۇمىلدىرا ءبىلۋى جونىندەگى ىسكەرلىگى رەسپۋبليكا باسشىلىعىنا دا جەتتى. وردا بۇزاتىن وتىز جاسقا جاڭا تولعان ەركىن اۋەلبەكوۆتى سول جىلدارى قازاق كسر مينيسترلەر كەڭەسىنىڭ توراعاسى بولعان ءماسىمحان بەيسەباەۆتىڭ ۇسىنىسىمەن اۋىل شارۋاشىلىعى ءمينيسترىنىڭ ءبىرىنشى ورىنباسارى ەتىپ تاعايىندادى. وسىنداي جاۋاپكەرشىلىگى زور رەسپۋبليكالىق كولەمدەگى قىزمەتتى اتقارۋعا ەركىن نۇرجان ۇلى تاس ءتۇيىن دايىن ەدى. وزىنە دە, باسقالارعا دا قاتاڭ تالاپ قويا بىلەتىن اۋەلبەكوۆ بۇل جۇمىستى ءۇيىرىپ اكەتتى.
تىڭ يگەرۋ جىلدارى, اسىرەسە سولتۇستىك وبلىستارداعى كادر ساياساتىنىڭ ورەسكەل بۇرمالانۋى, كەلىمسەكتەردىڭ لاۋازىمدى قىزمەتتەرگە وڭدى-سولدى جاپپاي تاعايىندالۋى كەزىندە, ونىڭ تەگەۋرىندى ءىس-ارەكەتى مەن ازاماتتىق جىگەر تانىتا ءبىلۋى ەكىنىڭ ءبىرىنىڭ قولىنان كەلە بەرمەيتىن باتىلدىق بولاتىن. ءوزىنىڭ باستىعى, مينيستر موتوريكامەن يىق قاعىستىرا ءجۇرىپ, ەر-اعا قيقار مىنەزدى ءمينيستردى ءوز دەگەنىنە كوندىرە ءبىلدى. ونىڭ ءبىر دالەلى مينيستر ەڭبەك دەمالىسىنا كەتكەن كەزدە, ءمينيستردىڭ مىندەتىن اتقارا ءجۇرىپ, مينيسترلىكتەگى جەتەكشى ەكى باسقارمانىڭ باسشىلىعىنا قازاق كادرلارىن تاعايىندادى.
ەركىن اۋەلبەكوۆتىڭ مينيسترلىكتەگى كادر ساياساتىنا باتىل ارالاسۋى مينيستر موتوريكاعا ۇناي قويعان جوق. اشىق تارتىسقا بارماسا دا ارالارىنا ءبىر سىزاتتىڭ تۇسكەنى بايقالىپ تۇردى. ە.اۋەلبەكوۆ بولسا تەوريالىق ۇزدىك ءبىلىمىن ساناۋلى جىلداردا وزات تاجىريبەمەن ۇشتاستىرىپ, بىلىكتىلىگىن ءىس جۇزىندە رەفورماتور ەكەنىن دالەلدەپ ۇلگەردى. جانە قاي جەردە جۇرسە دە, قانداي باسشىلىق قىزمەتتە بولسا دا ءومىر بويى ۇستاز بولىپ قىزمەت جاساعان نۇرجان اكەسىنىڭ وسيەت ەتىپ ايتىپ كەتكەن: «بالام, قولىڭدا بيلىك بولا قالسا, قاراپايىم ادامدارعا قامقورشى بولا ءبىل, ۇلتىڭنىڭ نامىسىن ەشكىمگە تاپتاتپايتىن بول» دەگەن ناقىلىن ەشقاشان ەستەن شىعارمايتىن. سوندىقتان دا بولار, ەرەكەڭ قازاقستاننىڭ دامۋى مەن ۇلتىنىڭ ءوسىپ-وركەندەۋىنە ۇلەس قوسۋدى ومىرلىك ماقسات ەتىپ قويسا, مينيستر موتوريكا كونسەرۆاتورلىق كوزقاراستان ارىلا المايتىن جانە قازاق ماماندارىنا مەنسىنبەي قارايتىن. ەركىن نۇرجان ۇلى مينيسترلىككە كەلگەن بەتتە وسىنى بىردەن بايقاعان بولاتىن. ال مينيستر موتوريكا اشىق ايقاسقا بارۋدا ەركىن نۇرجان ۇلىنىڭ بىلىمپازدىعى مەن قيىننان قيىستىرىپ سويلەيتىن شەشەندىگىنەن سەسكەنەتىن ەدى. سوندىقتان ول د.قوناەۆپەن كەزدەسكەن سايىن اۋەلبەكوۆكە قامقورشى بولعانسىپ, ونى ءوسىرۋ كەرەك ەكەندىگىن ءجيى-ءجيى ديمەكەڭە ايتىپ جۇرەتىن. ەكى باسشىنىڭ اراسىنداعى تارتىستىڭ تامىر جايۋىن قالاماعان دىنمۇحامەد احمەت ۇلى بولاشاعىنان ۇلكەن ءۇمىت كۇتتىرەتىن ەركىن اۋەلبەكوۆتى موتوريكاعا جىعىپ بەرمەي, ونى قازاق كسر استىق ونىمدەرى جانە قۇراما جەم ونەركاسىبى ءمينيسترى ەتىپ جوعارىلاتىپ جىبەردى.
تىڭ يگەرۋ جىلدارى قازاقستاننىڭ اۋىل شارۋاشىلىعى مەن ونەركاسىبى زور قارقىنمەن دامي باستادى. وسىعان وراي قازاقستانعا بەت بۇرىپ رەسەي مەن باسقا رەسپۋبليكالاردان اعىلعان كادرلاردا ەسەپ بولمادى. اسىرەسە سولتۇستىك وبلىستارداعى جاعداي ەش سىن كوتەرمەيتىن حالگە جەتتى. مۇنداي كەلەڭسىز كورىنىس سول جىلدارداعى رەسپۋبليكانىڭ ءبىرىنشى باسشىسى ديماش اعا قوناەۆتىڭ نازارىنان تىس قالمادى. كوكشەتاۋ وبلىستىق پارتيا كوميتەتىنە ءبىرىنشى باسشىنى تاعايىنداۋ كەزىندە, دىنمۇحامەد احمەت ۇلى جاس تا بولسا باسشىلىق قىزمەتتىڭ ءتۇرلى ساتىسىندا ىسىلىپ ۇلگەرگەن اۋەلبەكوۆكە ۇسىنىس جاسادى. ۇزاق جىلداردان بەرى كوكشەتاۋ وبلىسىندا ءبىرىنشى باسشىنىڭ باسقا ۇلتتان بولۋىنا بايلانىستى, جەرگىلىكتى كادرلاردىڭ ۇنەمى نازاردان تىس قالاتىنىن, جاس قازاق ماماندارىن ءوسىرىپ, شارۋاشىلىقتىڭ ءتۇرلى سالالارىنا ورنالاستىرۋ كەرەكتىگىن, ولارعا قولدان كەلگەنشە جاعداي جاساۋ قاجەتتىلىگىن ەسكەرتتى. شىنىندا, ە.اۋەلبەكوۆ وسى وبلىسقا كەلگەنشە كوكشەتاۋ وبلىسىندا لاۋازىمدى قىزمەتتەگى قازاق كادرلارىنىڭ ۇلەس سالماعى جوقتىڭ قاسى ەدى. ولاردىڭ بىرەن-سارانى عانا سوۆحوز-كولحوزدارداعى پارتيا كوميتەتتەرىنىڭ حاتشىلىعىنان اسپايتىن.
ءبىرىنشى باسشىلىق قىزمەتتە ءجۇرىپ, ەركىن نۇرجان ۇلى وبلىستىڭ ەكونوميكاسى مەن اۋىل شارۋاشىلىعىن رەسپۋبليكاداعى الدىڭعى قاتارلى ايماقتاردىڭ قاتارىنا قوستى, ۇلتتىق كادرلاردىڭ ءبىلىم الىپ, قىزمەتتەرىنىڭ وسۋىنە ۇنەمى قامقورلىق جاساپ وتىردى. ديقاندار اراسىنان ۇزدىك جەتىستىكتەرگە جەتكەن قازاق جىگىتتەرىنە سوتسياليستىك ەڭبەك ەرى اتاعىن الۋىنا سەپتىگىن تيگىزدى. كوپتەگەن اۋپارتكومنىڭ ءبىرىنشى حاتشىلىعى مەن اۋداندىق اتقارۋ كوميتەتتەرى توراعالىعىنا جەرگىلىكتى كادرلار تارتىلدى.
ەر-اعانىڭ وسىنداي ادال ەڭبەگىن وبلىسقا دەمالۋعا ارا-تۇرا كەلەتىن لەونيد يليچ برەجنەۆ تە, رەسپۋبليكانى ۇزاق جىلدار باسقارعان دىنمۇحامەد قوناەۆ تا بايقادى, سوعان وراي ولار ءادىل باعاسىن بەردى دە. قىرىق بەسكە كەلگەن شاعىندا ەركىن اۋەلبەكوۆكە ۇزاق جىلعى جەمىستى ەڭبەگى ءۇشىن سوتسياليستىك ەڭبەك ەرى اتاعى بەرىلدى. وسىنداي جاستا مۇنداي اتاققا رەسپۋبليكاداعى وبكوم حاتشىلارىنىڭ بىردە-ءبىرى جەتپەگەن ەدى.
قازاق «اركىمنىڭ ءوزى شىعار بيىگى بار» دەپ بەكەر ايتپاعان. بۇل ناقىلدىڭ اۋەلبەكوۆكە تىكەلەي قاتىستى ەكەنىن ءومىردىڭ ءوزى دالەلدەدى. ەرەكەڭە ەڭبەك ەرى اتاعى بەرىلىسىمەن, اسىرەسە الماتىدا ونىڭ ارتىنان پىش-پىش ءسوز ايتۋشىلار كوبەيدى. قازاقتىڭ «جاقسى بايقاپ سويلەر, جامان شايقاپ سويلەر» دەگەنى شىندىققا اينالدى.
قوناەۆ توڭىرەگىندە جۇرگەندەر جاي سويلەپ ەمەس, شايقاپ سويلەي باستادى, «ەلۋگە جەتپەي ەڭبەك ەرى اتاعىن العان اۋەلبەكوۆ ەندى ءبىر ەكى جىلدان سوڭ ەكىنشى جۇلدىز السا, ءوزىڭدى تاعىڭنان كەتىرەدى» دەگەندى ديمەكەڭە جەتكىزۋگە اسىقتى, سوعان بار كۇشتەرى مەن قۋلىق-سۇمدىقتارىن سالىپ باقتى. اقىرى ءسوز تاسۋشىلار ءوز ويلاعاندارىنا جەتتى.
اۋەلبەكوۆ الدىمەن ارتتا قالعان تورعاي وبلىسىن كوتەرۋگە جىبەرىلسە, ەكى جىل تولار-تولماستان سوڭ «قىزىلوردا وبلىسىنىڭ ەكونوميكاسى مەن الەۋمەتتىك سالاسىن كوتەرۋ ءۇشىن» دەگەن ۇسىنىسپەن سىر وڭىرىنە جىبەرىلدى.
قيىندىقتان قايمىقپايتىن اۋەلبەكوۆ ءۇشىن مۇنداي «تاعايىنداۋ» ونىڭ جىگەرىن جاسىتا المادى. قايتا ول ەكى وبلىستا دا پروبلەمالاردى شەشۋدىڭ جولدارىن تاۋىپ, ونى بۇكىل رەسپۋبليكاعا جاريا ەتتى. مىسال رەتىندە, قازاقستان كومپارتياسى حVI سەزىندە سويلەگەن سوزىندە اۋەلبەكوۆ دەلەگاتتار نازارىن قىزىلوردا وبلىسىنىڭ نە سەبەپتى ۇنەمى ارتتا قالىپ كەلگەنىن, وعان رەسپۋبليكا باسشىلىعى تاراپىنان جەتكىلىكتى كوڭىل بولىنبەگەنىن, ۋاقىت تالابىنا ساي حالقىنىڭ باسىم بولىگىن قازاقتار قۇرايتىن ايماققا ەرەكشە نازار اۋدارۋ قاجەتتىگىن اشىنا جەتكىزدى.
ەلدىڭ ەكونوميكاسى مەن ساياسي جۇيەسىن گورباچەۆشە رەفورمالاۋ بارىسىندا كسرو حالىق دەپۋتاتتار سەزىنە بالامالى كانديداتتاردى ۇسىنۋ باستالدى. نەگە ەكەنى بەلگىسىز, كەڭەس ەلىنىڭ جوعارعى ورگانىنا جۇمىس دەسە ىشكەن اسىن تاستاي سالۋعا داعدىلانعان, ۇنەمى ىزدەنىستە جۇرەتىن جانە ءاردايىم ناتيجەگە جەتۋدى ماقسات تۇتاتىن ە.اۋەلبەكوۆ الماتىدا جاسالعان ستسەناري بويىنشا قىزىلوردا وبلىسىنان كسرو حالىق دەپۋتاتى بولىپ, كسرو جوعارعى كەڭەسىنىڭ ايماقتىق دامۋ كوميتەتى توراعاسىنىڭ ورىنباسارى قىزمەتىنە سايلاندى.
مەن ءوزىم 1989-1991 جىلدار ارالىعىندا قازاق راديوسىنىڭ ماسكەۋدەگى كسرو جوعارعى كەڭەسىندە پارلامەنت ءتىلشىسى بولعان كەزدە, كوميتەت وتىرىسىندا ونىڭ مۇشەلەرى ەلدىڭ, حالىقتىڭ كوكەيكەستى ماسەلەلەرىن شەشۋمەن ەمەس, ساياسي ويىنعا بەرىلىپ, اركىم ءوز كورپەسىن وزىنە قاراي تارتۋمەن اينالىساتىنىن بايقادىم. قاراقان باستارىنىڭ قامدارى ءۇشىن عانا تىرلىك جاساۋدىڭ ارەكەتتەرىنە كوڭىلى تولماي جۇرگەن ەر-اعانى تالاي كەزدەستىردىم.
ءبىر جولىققاندا «مىنانداي كۇيىمىزبەن ەلدەن ايىرىلىپ, حالىقتى تەنتىرەتىپ جىبەرەتىن شىعارمىز» دەپ ىشىندەگى كۇيىگىن جاسىرماپ ەدى. شىنىندا دا كوپشىلىكتى ۇشقىر ويىمەن, وتكىر سوزىمەن, قونىمدى ۇسىنىستارىمەن وزىنە قاراتىپ الاتىن اسىل اعانىڭ وسىنداي كۇيزەلىس جاعدايدا جۇرگەنىن كورۋ بىزگە ءارى وكىنىشتى, ءارى اۋىر ەدى.
جالپى, ەركىن اۋەلبەكوۆ بۇكىل بولمىسىمەن ادىلەتسىزدىك پەن زاڭدى اياققا باساتىندارمەن اياۋسىز كۇرەسەتىن قايراتكەر, بىربەتكەي باسشى ەدى. 1986 جىلدىڭ كوكتەمىندە بايقوڭىر اسكەري بولىمشەسىنىڭ كىناسىنەن سىرداريانىڭ تومەنگى ساعاسىنداعى وبلىس حالقىنىڭ جارتىسىنا جۋىعى تۇراتىن قارماقشى, قازالى جانە ارال اۋداندارى مەن بايقوڭىر قالاسىن ۋلاندىرۋ قاۋپى ءتوندى.
وسى جاعدايعا بايلانىستى ە.اۋەلبەكوۆ سوكپ ورتالىق پارتيا كوميتەتىنىڭ ءبىرىنشى حاتشىسى م.گورباچەۆكە شىعىپ, ءمان-جايدى ءتۇسىندىردى. دەرەۋ ماسكەۋدەن «گلاۆكوسموس» باسشىسى گەنەرال-لەيتەنانت, ەكىنشى كوسموناۆت گەرمان تيتوۆ باستاعان كوميسسيا كەلدى. اتالعان ماسەلە وبلىستىق پارتيا كوميتەتىنىڭ بيۋروسىندا قارالىپ, ەركىن نۇرجان ۇلى كوسمودروم باسشىسى گەنەرال-لەيتەنانت يۋري ادۆەركەەۆيچ جۋكوۆتى اياۋسىز سىنادى. مۇنداي قىلمىستى اياقسىز قالدىرۋعا بولمايتىنىن, زاڭ بويىنشا وسىعان جاۋاپتى كوسمودروم باسشىسى جۋكوۆ پارتيادان شىعارىلىپ, سوتقا بەرىلەتىنىن مالىمدەدى.
«ساسقان ۇيرەك ارتىمەن سۇڭگيدى» دەگەندەي, گەنەرال جۋكوۆ ولەرمەن جاعدايعا ءتۇسىپ, اۋەلبەكوۆتەن كەشىرىم سۇراۋمەن بولدى. بۇدان بىلاي جەرگىلىكتى بيلىك ورگاندارى مەن تۇرعىندار مۇددەسىنە قول سۇقپايتىنىن, ايماقتىڭ ەكولوگيالىق تالاپتارىن قاتاڭ ساقتايتىنىن, تاعى اڭداردى ەندىگارى اتۋعا بارمايتىنىن ايتىپ, انت-سۋ ءىشتى. وسىلايشا ءجون-جوسىقسىز كەتكەن كوسمودروم باسشىسىن ەركىن نۇرجان ۇلى ساباسىنا ءتۇسىردى.
ماسكەۋدەن ەگەمەن ەلىنە كەلگەن ەر-اعانى مۇندا ەشكىم كۇتپەپ ەدى. سوندىقتان ءبىراز ۋاقىتقا دەيىن ەرەكەڭ جۇمىسسىز ءجۇردى. الايدا بيلىك باسىندا وتىرعاندار ە.اۋەلبەكوۆتى ۇزاق ۋاقىت بويى قىزمەتسىز قالدىرۋعا داتتەرى شىدامادى. ونىڭ ۇستىنە رەسپۋبليكالىق گازەتتەردە «ەسىمى بۇكىل ەلگە بەلگىلى مەملەكەت قايراتكەرى ەركىن اۋەلبەكوۆ نە سەبەپتى جۇمىسسىز وتىر, بۇل دەگەنىڭىز تاۋەلسىزدىگىمىزگە داق تۇسىرەتىن جاعداي عوي» دەپ دابىل قاققان ماقالالار شىعا باستادى. ويتكەنى ەركىن اۋەلبەكوۆ سياقتى تانىمال ازاماتتىڭ ءالى دە بولسا بەدەلى زور ەدى. بۇل دابىل بيلىكتەگىلەردىڭ قۇلاعىنا دا جەتكەن بولار. اقىرى, ەر-اعاعا پرەزيدەنت كەڭەسشىسى قىزمەتى ۇسىنىلدى.
مەنىڭ قىزمەت ورنىم ساتباەۆ پەن جەلتوقسان كوشەلەرىنىڭ قيىلىسىندا بولعاندىقتان, تاڭەرتەڭ نەمەسە كەشكە قاراي ەر-اعانى جۇمىسىنا كەتىپ بارا جاتقاندا نەمەسە ۇيىنە كەلە جاتقاندا ءجيى كەزدەستىرۋشى ەدىم. وزىنە جاراسىمدى قوڭىر داۋسىمەن سالەمىمدى الىپ, حال-جاعدايدى سۇراپ جاتاتىن. سوزگە تارتىپ, دەنساۋلىعىڭىز قالاي دەگەندە دە «قۇدايعا شۇكىر» دەپ قىسقا عانا جاۋاپ قايتاراتىن.
شىنىندا دا ەر-اعانىڭ سىرقاتتانىپ, اۋرۋحاناعا ءتۇستى دەگەنىن ەستىگەن ەمەسپىن. ارىقشا, سىمباتتى كەلگەن تىك بويىنان ءوزىن ءوزى كۇتىپ ۇستايتىنى ءبىلىنىپ تۇراتىن. تەك قانا وتكىر جانارىنان الدە ءبىر سىرتقا شىقپاي جاتقان شەر جاتقانداي كورىنەتىن...
بىلەتىندەردىڭ ايتۋىنشا, ەركىن نۇرجان ۇلى پاراساتتى, ادال ازامات, العىر تۇلعا. ول سول بولمىسىنان وزگەرمەي سولايشا ءومىر ءسۇردى, سولايشا قايراتكەر رەتىندە قالىپتاستى, سولايشا ومىردەن وزدى. ونىڭ ونەگەلى ۇلتتىق تاريح پەن قۇندىلىقتاردى ساقتاي بىلەتىن ازاماتتىق بەينەسى اۋەلبەكوۆتى بىلەتىن بارشا جۇرتتىڭ جادىندا ساقتالاتىنى ءسوزسىز.
مەيرام بايعازين,
نۇر-سۇلتان قالالىق ارداگەرلەر كەڭەسىنىڭ مۇشەسى, قازاقستاننىڭ قۇرمەتتى ءجۋرناليسى
