ايماقتار • 19 ماۋسىم، 2020

الماتى دارىگەرلەرى كوروناۆيرۋستى قالاي ەمدەپ جاتىر؟

254 رەت كورسەتىلدى

بۇگىن الماتى قالاسىنىڭ وڭىرلىك كوممۋنيكاتسيالار قىزمەتىنىڭ الاڭىندا وتكەن ونلاين-بريفينگ بارىسىندا اسفەندياروۆ اتىنداعى قازۇمۋ ينفەكتسيالىق جانە تروپيكالىق اۋرۋلار كافەدراسىنىڭ پروفەسسورى راۆيليا ەگەمبەرديەۆا مەن ينفەكتسيونيست دارىگەر تامارا ۋتاگانوۆا كوروناۆيرۋستى ەمدەۋ جانە دياگنوستيكالاۋ حاتتامالارىن ءتۇسىندىردى، سونىمەن بىرگە ءۇي كارانتينىن ۇيىمداستىرۋ، اۋرۋحاناعا جاتقىزۋ جانە كوروناۆيرۋس زارداپتارىنا بايلانىستى سۇراقتارعا جاۋاپ بەردى، دەپ حابارلايدى Egemen.kz

راۆيليا ەگەمبەرديەۆا ۆيرۋس جۇقتىرعاندارعا ءۇي كارانتينىندە، امبۋلاتورلىق جانە رەانيماتسيالىق دەڭگەيدە كۇتىم كورسەتۋ جولدارى تولىق جازىلعان كوروناۆيرۋس ينفەكتسياسىن دياگنوستيكالاۋ جانە ەمدەۋدىڭ كلينيكالىق حاتتاماسى بار ەكەنىن ءتۇسىندىردى. وسىلايشا، ول كوروناۆيرۋس ينفەكتسياسىنىڭ جۇقتىرعانداردىڭ ىشىندە اۋرۋ بەلگىلەرى جوق جانە اۋرۋى جەڭىل ءوتىپ جاتقان ناۋقاستار ءۇي كارانتينىندە جاتقانىن جەتكىزدى. امبۋلاتورلىق بولىمدەگى نەگىزگى مىندەت اۋرۋدىڭ اۋىر فورماسىنىڭ الدىن الۋ بولىپ تابىلادى، ال جانساقتا بولىمىندە اۋرۋ جۇقتىرۋ سوڭى اسقىنۋعا ۇلاسپاۋ ءۇشىن قارقىندى تەراپيا جۇرگىزىلەدى.

اۋرۋحانادان شىعارىلعاننان كەيىن دە پاتسيەنتتەر قاشىقتىقتان مەديتسينالىق باقىلاۋدا بولادى. سونداي-اق تامارا ۋتاگانوۆا كوروناۆيرۋس ينفەكتسياسىنىڭ اۋرۋ بەلگىلەرى بايقالمايتىن ءتۇرى تۋرالى كوپ قويىلاتىن ساۋالدارعا جاۋاپ بەرىپ، اۋرۋدىڭ زارداپتارى جانە ينفەكتسيالىق اۋرۋلاردىڭ جالپى كورسەتكىشى جايلى ايتتى.

"اۋرۋ بەلگىلەرى بايقالمايتىن ينفەكتسيا تاراتۋشىلاردىڭ قاۋپى نەدە، سونداي-اق، مەديتسينالىق باقىلاۋ مەن ەمدەۋ قالاي جۇرگىزىلەدى؟"

"ۆيرۋستىڭ اۋرۋ بەلگىلەرى جوق فورماسىن جۇقتىرعاندار قانداي دا ءبىر السىزدىكتى سەزىنبەگەنىمەن، باستى قاۋىپ ولاردىڭ ۆيرۋستى تاسىمالداۋشى ەكەندىكتەرىندە، ياعني ينفەكتسيا قوزدىرعىشى بولىپ تابىلادى. ەسكە سالىپ وتكىم كەلەتىنى، مۇنداي ناۋقاستارعا قانداي دا ءبىر ەم جۇرگىزىلمەيدى. اۋرۋ بەلگىلەرى بايقالمايتىن ناۋقاستار، سونىمەن بىرگە، اۋرۋى جەڭىل تۇردە ءوتىپ جاتقان ازاماتتار ەگەر ۇيلەرىندە قارت ادامدار مەن سوزىلمالى اۋرۋلارى بار ادامدار بولماسا، ءۇي كارانتينىندە بولۋلارى كەرەك. ۇيدە قالۋعا مۇمكىندىكتەرى بولماسا، كارانتيندىك ستاتسيونارلار بار"، دەيدى ت.ۋتاگانوۆا.

تامارا ۋتاگانوۆا ازاماتتاردىڭ كوبىنەسە اۋرۋدىڭ تەمپەراتۋرا بولماسا، باسقا بەلگىلەرىنە نازار اۋدارمايتىنىن اتاپ ءوتتى. "تەمپەراتۋرا كوروناۆيرۋس ينفەكتسياسىنىڭ جالعىز بەلگىسى ەمەس. ەگەر سىزدە باسقا دا ءبىر اۋرۋ بەلگىلەرى بايقالسا، جاعدايدىڭ قيىنداۋىن كۇتۋدىڭ قاجەتى جوق. ءوزىڭىزدىڭ جالپى تاجىريبەلىك دارىگەرىڭىزبەن حابارلاسۋ كەرەك"، دەدى ول.

"ەپيدەميالىق كەزەڭدە تۇماۋ جانە قىزىلشا اۋرۋلارى تىركەلگەن جاعدايلار بولدى ما؟"

ونىڭ ايتۋىنشا، كوروناۆيرۋسقا بايلانىستى ەنگىزىلگەن وقشاۋلانۋ جالپى اۋىرۋ دەڭگەيىنىڭ تومەندەۋىنە سەبەپ بولعانى ءسوزسىز. تۇماۋمەن اۋىرۋ جاعدايلارى تىركەلگەنمەن، كوبىنەسە كوروناۆيرۋس ينفەكتسياسىمەن سايكەس كەلمەدى. سونداي-اق بۇگىنگى تاڭدا قىزىلشامەن اۋىرۋ وقيعالارى جوق.دارىگەرلەر جەكە گيگيەنا تالاپتارىن ساقتاۋ اۋرۋلاردىڭ الدىن الۋدا قاشاندا ءجون ءىس بوپ سانالاتىنىن، سوندىقتان دا ول تۇرعىندار اراسىندا ادەتكە اينالسا، ءارتۇرلى ينفەكتسيالىق اۋرۋلارعا شالدىعۋ دەڭگەيىن تۇسىرۋگە اكەلەر ەدى دەپ وي قوستى. ولار ءدال قازىرگى ۋاقىتتا قاجەتتى سانيتارلىق-ەپيدەميولوگيالىق تالاپتاردى ساقتاۋ مەن ادامدار كوپ جينالاتىن جەرلەرگە بارماۋدىڭ وتە ماڭىزدى ەكەنىن دە اتاپ ءوتتى.

"كورىپ تۇرعاندارىڭىزداي كوروناۆيرۋسپەن اۋىرۋدىڭ سالدارى وتە اۋىر بولۋى مۇمكىن. دارىگەرلەر پاتسيەنتتەردىڭ دەنساۋلىعى ءۇشىن كۇن سايىن كۇرەس جۇرگىزۋدە، الايدا تۇرعىندار ءوز ارەكەتتەرىنە، اسىرەسە قازىرگىدەي اۋرۋعا ۇشىراۋ بىردەن ءورشي تۇسكەن ساتتە، جاۋاپكەرشىلىكپەن قاراۋى كەرەك. سوندىقتان دا ءبىز سىزدەرگە قاراستىرىلىپ وتىرعان شارالاردى ۇستانۋدىڭ ماڭىزدى ەكەنىن ەسكەرتە كەتكىمىز كەلىپ وتىر"، دەپ تۇيىندەدى راۆيليا ەگەمبەرديەۆا.

سوڭعى جاڭالىقتار

شيرەك فينالعا ءوتتى

تەننيس • كەشە

ۇقساس جاڭالىقتار