مامىر ايىندا جاردەماقىنىڭ بۇل ءتۇرىن 396,5 مىڭ وتباسى جالپى سوماسى 20,4 ملرد تەڭگەگە الدى.
اتالعان مەملەكەتتىك جاردەماقىعا تابىسىنا قاراماستان 4 جانە ودان كوپ بىرگە تۇراتىن كامەلەتكە تولماعان نەمەسە كۇندىزگى بولىمدە وقيتىن 23 جاسقا دەيىنگى ستۋدەنت بالالارى بار كوپبالالى وتباسىلار ۇمىتكەر بولا الادى. تولەم مولشەرى 44 532 مىڭ تەڭگەدەن (4 بالا) 77 951 مىڭ تەڭگەگە دەيىن (7 بالا) قۇرايدى, 8 جانە ودان دا كوپ بالاسى بار وتباسىلار ءۇشىن ءار بالا ءۇشىن سارالانعان تۇردە 4 اەك مولشەرىندە بولادى.
وسىلايشا, بۇگىنگى تاڭدا ءتيىستى جاردەماقىنىڭ ۇلعايۋى 8 جانە ودان دا كوپ بالالارى بار وتباسىلار ءۇشىن جەكە مولشەردى بەلگىلەۋ ارقىلى قامتاماسىز ەتىلەدى. ءتيىستى زاڭعا مەملەكەت باسشىسى وسى جىلدىڭ 13 مامىرىندا قول قويدى.
8 بالاسى بار وتباسى ءۇشىن جاردەماقى 88 896 تەڭگەنى قۇرايدى, 9 بالاعا – 100 008 تەڭگە, 10 – 111 120 تەڭگە, 11 - 122 232 تەڭگە, 12 – 133 344 تەڭگە, 13 – 144 456 تەڭگە, 14 – 155 568 تەڭگە, 15 - 166 680 تەڭگە, 16 – 177 792 تەڭگە تولەنەدى.
زاڭ 2020 جىلعى 1 قاڭتاردان باستاپ كۇشىنە ەنەدى, وسىعان بايلانىستى كوپبالالى وتباسىلارعا بەرىلەتىن جاردەماقى مولشەرى ول تاعايىندالعان كەزدەن باستاپ قايتا ەسەپتەلەدى. وسىلايشا, تولەنبەگەن سوما اعىمداعى جىلدىڭ شىلدە ايىندا اۋدارىلادى.
جالپى, 2020 جىلى كوپبالالى وتباسىلارعا مەملەكەتتىك جاردەماقى تولەۋگە رەسپۋبليكالىق بيۋدجەتتەن 191,1 ملرد تەڭگە قاراستىرىلعان.
ەسكە سالا كەتەيىك, قازاقستانداعى كوپبالالى وتباسىلارعا ولاردىڭ كىرىستەرىن ەسەپكە الماي بەرىلەتىن جاڭا مەملەكەتتىك جاردەماقى 2020 جىلدىڭ 1 قاڭتارىنان باستاپ اتاۋلى الەۋمەتتىك كومەك كورسەتۋدىڭ جاڭا تەتىكتەرىندە قاراستىرىلعان تابىسى از جانە كوپبالالى وتباسىلاردى قولداۋدىڭ ءۇش نەگىزگى باعىتى اياسىندا ەنگىزىلدى.
