ەلىمىزگە بەلگىلى فوتوسۋرەتشى اسىلحان ءابدىرايىم ۇلى باستاعان «فوتوونەر» قوعامدىق بىرلەستىگى مۇشەلەرى ماڭعىستاۋدىڭ كەرەمەت جەرلەرىن ارالاپ, فوتوعا ءتۇسىردى.
7-10 ماۋسىم ارالىعىندا وتكەن فوتو-ەكسپەديتسيانىڭ نەگىزگى ماقساتى – ءار ولكەنىڭ تىلسىم تابيعاتىن, ادەمى, كوركەم جەرلەرىن, ۇلتتىق ونەرىن, ءداستۇرى مەن مادەنيەتىن كورسەتىپ, شەت مەملەكەتكە تانىتۋ. «فوتوونەر» قوعامدىق بىرلەستىگى مۇشەلەرى ءتورت كۇن ىشىندە تۇپقاراعان, ماڭعىستاۋ, قاراقيا اۋدانىندا بولىپ, العاش رەت ءوڭىردىڭ كيەلى جەرلەرىنە تاڭعى جانە تۇنگى ادىسپەن ءفوتوتۇسىرىلىم جاسادى. ولار بوزجىرا, توبىقتى, تامشىلى, جىعىلعان, ساۋرا, شەرقالا, ايراقتى سەكىلدى ماڭعىستاۋدىڭ سىرلى جەرلەرىن سۋرەتكە ءتۇسىردى.
– ماڭعىستاۋ تابيعاتىنىڭ كوركەمدىگىنە كوز تويمايدى. سالت-ءداستۇردى وتە بەرىك ۇستانعان جەر. تۇيە شارۋاشىلىعى دامىعان. شۇباتتىڭ وتانى سانالادى. وسىنىڭ ءبارىن بولاشاق ۇرپاققا قالدىرعىمىز كەلەدى. مىڭ ءسوزدى ءبىر سۋرەتپەن جەتكىزۋ بار ماقساتىمىز, – دەدى تۇركىستان وبلىسىنىڭ فوتوگرافى, «فوتوونەر» قب مۇشەسى ماقسات شاعىرباي.
ەكسپەديتسيا مۇشەلەرى ماڭعىستاۋدىڭ كەرەمەتتەرىمەن قوسا ساپاردىڭ سوڭعى كۇنىن اقتاۋ ىرگەسىندەگى كاسپي جاعالاۋىنداعى كورىنىسكە ارنادى. شاھار تۇرعىندارىنىڭ تەڭىز جاعاسىنداعى سەرۋەنىن, جاستاردىڭ ءان ايتىپ, بوبەكتەردىڭ باقىتتى كۇلكىگە بوككەن ساتتەرىن كادرعا ءتۇسىردى.
ەكسپەديتسيا بارىسىندا جاس فوتوگرافتارعا شەبەرلىك ساعاتىن وتكىزۋ جوسپارلانعان بولاتىن, الايدا كارانتينگە بايلانىستى بۇل شارا كەيىنگە قالدىرىلىپ, ونلاين تۇردە وتەتىن بولدى. وسىلايشا ءار ايماقتا وتكىزىلگەن «فوتوونەر» قب مۇشەلەرىنىڭ 7-ەكسپەديتسياسى كيەلى ولكەدە وتكىزىلدى.
– فوتوگرافيا – ءبىر ۇعىم بولعانىمەن ونىڭ جانرى ءارتۇرلى. ءبىزدىڭ قۇرامداعى شەبەر مامانداردىڭ ءبىرى تابيعاتتى, ءبىرى ادامنىڭ بەينەسىن, ەندى ءبىرى تۋريستىك الەۋەتىن فوتوتۇزاققا الدى. شەتەلدىڭ كەرەمەت جەرلەرى مەن نىساندارىن عالامتوردان ىزدەگەندە كاسىبي سۋرەتتەرگە تاپ بولاسىڭ. ال بىزدە كوبىنەسە اۋەسقوي تۇسىرگەن ساپاسىز سۋرەتتەر شىعادى. وسى ولقىلىقتىڭ ورنىن تولتىرۋ ءۇشىن دە اتالعان جۇمىستى قولعا الدىق, – دەيدى ت.جۇرگەنوۆ اتىنداعى ونەر اكادەمياسىنىڭ ۇستازى, الماتى قالاسىنىڭ «فوتوونەر» قب جەتەكشىسى وڭعاربەك الحاروۆ.
ىزگى شارا الداعى ۋاقىتتا جالعاسىن تابادى.
ماڭعىستاۋ وبلىسى
