ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, مەملەكەت باسشىسىنىڭ 2020 جىلعى 30 ناۋرىزداعى تاپسىرماسى بويىنشا زەينەتاقى تولەمدەرى مەن جاردەماقىلاردى جىلدىق ماندە 10%-عا قوسىمشا يندەكستەۋ جۇرگىزىلدى. وسىلايشا, 2020 جىلعى 1 قاڭتاردان باستاپ جۇزەگە اسىرىلعان بازالىق زەينەتاقى مەن مەملەكەتتىك جاردەماقىلار 5%-عا, ال جاسىنا بايلانىستى زەينەتاقى 7%-عا ارتقان كەزدە, 1 ساۋىردەن باستاپ بارلىق تولەمدەر قوسىمشا تاعى 5%-عا ءوستى.
ساۋىردەگى ءوسىم اۆتوماتتاندىرىلعان رەجيمدە جۇزەگە اسىرىلدى (قوسىمشا قۇجاتتاردى تالاپ ەتپەستەن), ال مامىردا ازاماتتار ءوسىمدى ەسكەرە وتىرىپ تولەمدەر الدى. سونىمەن قاتار, ازاماتتاردىڭ ءساۋىر ايىندا الماعان زەينەتاقىنىڭ جاڭا جانە ەسكى مولشەرى اراسىنداعى ايىرماشىلىق مامىر ايىندا كەزەكتى زەينەتاقى تولەمىمەن بىرگە تولەندى.
مىسالى, ەگەر 2020 جىلعى قاڭتاردان باستاپ زەينەتاقى تولەمدەرىنىڭ مولشەرى (جاسىنا بايلانىستى زەينەتاقى + بازالىق زەينەتاقى) 90 400 تەڭگەنى قۇراسا, اعىمداعى جىلعى 1 ساۋىردەن باستاپ زەينەتاقى تولەمدەرىنىڭ جاڭا مولشەرى 94 920 تەڭگەنى (90 400 تەڭگە + 5% ارتتىرۋ) قۇرايدى. بۇل رەتتە تولەم مامىر ايىندا 99 440 تەڭگەنى (94 920 تەڭگە + ءساۋىر ايىنا قوسىمشا اقى 4520 تەڭگە) قۇرادى. ماۋسىم ايىندا زەينەتاقى تيىسىنشە 94 920 تەڭگەنى قۇرادى.
ەستەرىڭىزگە سالا كەتەيىك, 2020 جىلعى 1 ساۋىردەن باستاپ ەڭ تومەنگى زەينەتاقى تولەمى 58 082 تەڭگە, ونىڭ ىشىندە بازالىق زەينەتاقى تولەمىنىڭ ەڭ تومەنگى مولشەرى – 17 641 تەڭگە بولىپ بەلگىلەنگەن.
