ەۋروكۋبوكتا ەڭ كوپ توپ جارعاندار

سپورت • 10 ماۋسىم، 2020

ەۋروكۋبوكتا ەڭ كوپ توپ جارعاندار

36 رەت كورسەتىلدى

فۋتبولدان ۋەفا اياسىندا ۇيىمداستىرىلاتىن چەمپيوندار ليگاسىن (بۇرىنعى ەۋروپا چەمپيوندارىنىڭ كۋبوگى) ايتپاعاننىڭ وزىندە، ەۋروپا ليگاسى (ۋەفا كۋبوگى)، ۋەفا سۋپەركۋبوگى مەن كۋبوك يەلەرىنىڭ كۋبوگى سەكىلدى دودالارعا جانكۇيەرلەردىڭ ىقىلاسى ەرەكشە (سوڭعىسى 1999 جىلدان كەيىن ۇيىمداستىرىلماعان). ءتىپتى ەۋروپالىق كوماندالاردىڭ ءوزى بۇل تۋرنيردە توپ جارۋدى الدىنا ماقسات قويادى. بىراق قوس قۇلاقتى كۋبوكتى باسىنان اسىرا كوتەرۋ كەز كەلگەن كلۋبقا بۇيىرا بەرمەيدى. ەۋروپا كلۋبتارىنىڭ تاريحىنا زەر سالساق، جوعارىدا اتالعان ءتورت تۋرنيردە تەك بەس قانا كوماندا جەڭىمپاز اتانعان ەكەن.

ءالي بيتورە

وتكەن عاسىردىڭ باسىندا قۇرىلعان نيدەرلاند كومانداسىنىڭ ايى 70-ءشى جىلدارى وڭىنان تۋدى. رينۋس ميحەلستىڭ قول استىندا جاتتىققان كوماندا ءۇش جىل قاتارىنان ەۋروپا چەمپيوندارىنىڭ كۋبوگىندا (1971، 1972، 1973) قارسىلاس شىداتپاي، كۋبوگتى ەشكىمگە بەرگەن جوق. كەيىن توقىراۋعا تاپ بولعان «اياكستى» يوحان كرويفف قۇتقاردى. كوماندانىڭ اڭىز ويىنشىسى بولعان ول كلۋبقا باس باپكەر بوپ كەلگەن سوڭ 1987 جىلى كۋبوك يەلەرىنىڭ كۋبوگىندا جاسىنداي جارقىلداپ، كوماندانىڭ ەڭسەسىن قايتا تىكتەدى. ال 1992 جىلى لۋي ۆان گال امستەردام ۇجىمىمەن ۋەفا كۋبوگىندا جانە 1995 جىلى ەۋروپا چەمپيوندارىنىڭ كۋبوگىندا جەڭىس تويىن تويلادى. سونداي-اق «اياكس» 1972 جىلى ۋەفا سۋپەركۋبوگىن جەڭىپ العان.

«اياكس» ەۋروپا چەمپيوندارىنىڭ كۋبوگىندا ءۇش مارتە توپ جارعان سوڭ ەستافەتانى «باۆاريا» كلۋبىنا «جولدادى». بۋندەستيم كومانداسى 1974، 1975، 1976 جىلدارى اتالعان تۋرنيردە ءۇش دۇركىن جەڭىمپاز اتاندى. بۇعان دەيىن «باۆاريا» تەك كۋبوك يەلەرىنىڭ كۋبوگىندا عانا جەڭىسكە جەتكەن-ءدى. ال 1996 جىلى ۋەفا كۋبوگىندا دارا شىقتى. «باۆاريا» جاڭا عاسىردى دا ۇلكەن جەتىستىكپەن باستادى. 2001 جانە 2013 جىلى چەمپيوندار ليگاسىندا باس جۇلدەگە قول جەتكىزىپ، قاجىرلى ەڭبەكتىڭ ارقاسىندا سول جىلى (2013) سۋپەركۋبوگتى جەڭىپ، ۋەفا اياسىنداعى بارلىق تۋرنيردە باس جۇلدەنى يەلەنگەن كوماندا اتاندى.

اعىلشىن كومانداسى ەۋروكۋبوك باسەكەلەرىندەگى ەڭ العاشقى جەڭىسىنە (ەۋروپا چەمپيوندارىنىڭ كۋبوگىن) 1968 جىلى قول جەتكىزدى. ال كەيىنگى جەتىستىكتەرگە كوماندا تىزگىنىن الەكس فەرگيۋسون ۇستاعان سوڭ جەتە باستادى. مىسالى، 1991 جىلى كۋبوك يەلەرىنىڭ كۋبوگى مەن ۋەفا سۋپەركۋبوگىندا، 1999 جانە 2008 جىلى چەمپيوندار ليگاسىندا جەڭىمپاز اتاندى. «مانچەستەر يۋنايتەد» كومانداسىنا ۋەفا-نىڭ بارلىق ءتۋرنيرىن جەڭگەن كوماندا اتانۋ ءۇشىن تەك ەۋروپا ليگاسىنىڭ كۋبوگى جەتپەي تۇر ەدى. «ميۋ» بۇل جەتىستىككە 2017 جىلى جوزە موۋرينيۋ باسقارعان ۋاقىتتا جەتتى.

«چەلسي» كلۋبى XXI عاسىرعا كۋبوك يەلەرىنىڭ كۋبوگىن (1971، 1998) جانە ۋەفا سۋپەركۋبوگىن جەڭىپ قادام باستى. لوندون كلۋبى كەيىنگى جۇلدەسىنە 2012 جىلدان كەيىن عانا قول جەتكىزە باستادى. سول جىلى چەمپيوندار ليگاسىندا جەڭىمپاز اتانسا، كەلەسى جىلى ەۋروپا ليگاسىندا جۇلدىزى جاندى. وسىلايشا «چەلسي» ۋەفا-نىڭ بارلىق كۋبوك كوللەكتسياسىن جينادى. سونداي-اق بىلتىر دا ەۋروپا ليگاسىندا ۇزدىك شىقتى.

«يۋۆەنتۋس» جوعارىداعى كوماندالارعا قاراعاندا ۋەفا-نىڭ ءتورت «تاپسىرماسىن» ورىنداعان العاشقى كوماندا. تۋرين كلۋبى ەۋرودوداعى ءبىرىنشى كۋبوگىن 1977 جىلى ۋەفا كۋبوگىندا جەڭىپ الدى. سونداي-اق اتالعان تۋرنيردە 1990 جانە 1993 جىلدارى دا دارا شىقتى. 1984 جىلى كۋبوك يەلەرىنىڭ كۋبوگى مەن ۋەفا سۋپەركۋبوگىندا ۇزدىك دەپ تانىلدى. ال 1985 جىلى ەۋروپا چەمپيوندارىنىڭ كۋبوگىندا باس جۇلدەنى ولجالاپ، مەرەيلى مەجەگە ءبىرىنشى بولىپ جەتتى. سونىمەن قاتار «يۋۆەنتۋس» 1996 جىلى چەمپيوندار ليگاسى مەن ۋەفا سۋپەركۋبوگىندا ەكىنشى رەت چەمپيون اتاندى.

بۇل اتاققا قانداي كوماندالار جاقىن تۇر؟

بارلىق تۋرنيردە توپ جارعان التىنشى كوماندا اتانۋعا «اتلەتيكو» كلۋبى وتە جاقىن تۇر. ول ءۇشىن مادريد كومانداسى تەك چەمپيوندار ليگاسىندا جەڭىمپاز اتانۋى كەرەك. ال قالعان جەتىستىكتىڭ بارىنە جەتىپ قويعان. سونداي-اق «اندەرلەحت»، «پارما» جانە «ۆالەنسيا» كوماندالارىنا دا جوعارىداعى كلۋبتاردىڭ قاتارىنا قوسىلۋ ءۇشىن دە چەمپيوندار ليگاسىنىڭ كۋبوگى جەتىسپەيدى.

بىلتىر «توتتەنحەم» كومانداسى بارلىق ماسەلەسىن شەشىپ تاستاۋعا ەكى قادام قالعاندا ءسۇرىندى. لوندون كلۋبى چەمپيوندار ليگاسىنىڭ فينالىندا «ليۆەرپۋل» كومانداسىن جەڭىپ، كەيىن ۋەفا سۋپەركۋبوگىندا قوس قۇلاقتى كۋبوگتى يەلەنگەندە بارلىق ماسەلەنى شەشىپ قويار ەدى. سونداي-اق ەليتالى كوماندالاردىڭ قاتارىنا قوسىلۋعا «ميلان» مەن «بارسەلونا» دا ءبىر تابان جاقىن تۇر. ەكى كومانداعا دا ەۋروپا ليگاسىنىڭ كۋبوگى جەتپەي تۇر. «ميلان» بۇل تۋرنيردە جىل سايىن باق سىناسا، «بارسا» ەڭ كەيىنگى رەت 2003-2004 جىلعى ماۋسىمدا 1/8 فينالدا «سەلتيكتەن» جەڭىلگەن-ءدى.

ال «رەال»، «ليۆەرپۋل»، «ينتەر» جانە «پورتۋ» كوماندالارى كۋبوك يەلەرىنىڭ كۋبوگىندا جەڭىسكە جەتە الماعانى ءۇشىن جوعارىداعى كوماندالاردىڭ قاتارىنا ەندى مۇلدە قوسىلا المايدى. جوعارىدا ايتىپ وتكەنىمىزدەي، بۇل تۋرنير 1999 جىلدان باستاپ ءوز ميسسياسىن اياقتاعان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز