الماتى اكىمى المالى اۋدانىن اباتتاندىرۋ بارىسىمەن تانىستى

ايماقتار • 09 ماۋسىم، 2020

الماتى اكىمى المالى اۋدانىنىڭ اباتتاندىرىلۋىمەن تانىستى

38 رەت كورسەتىلدى

الماتى اكىمى باقىتجان ساعىنتاەۆ جۇمىس ساپارى بارىسىندا "جۇمىسپەن قامتۋدىڭ جول كارتاسى" باعدارلاماسى جانە "بيۋدجەتكە قاتىسۋ" جوباسى اياسىندا قولعا الىنعان المالى اۋدانىنىڭ كوعامدىق كەڭىستىكتەرىن اباتتاندىرۋ بارىسىمەن تانىستى، - دەپ حابارلايدى Egemen.kz.

ارمان وكتيابر

ب. ساعىنتاەۆ Instagram-داعى پاراقشاسىندا "بيۋدجەتكە قاتىسۋ" جوباسى ارقىلى تۇرعىنداردىڭ وزدەرى تاڭداپ العان قوعامدىق كەڭىستىكتەردى اباتتاندىرۋ جۇمىستارىنىڭ بارىسىمەن تانىسقانىن جازدى. ولار - جامبىل اتىنداعى سكۆەر، جامبىل كوشەسى بويىنداعى جانە روزىباكيەۆ كوشەسى مەن قوجامقۇلوۆ كوشەسىنىڭ قيىلىسىنداعى جاسىل ايماقتار. مۇندا جايلى ورىندىقتار، ترەناجەرلىك كەشەندەر قويىلىپ، ويىن الاڭدارى، گۇلزارلار جاسالۋدا، جاياۋ جۇرگىنشى جولدارى اباتتاندىرىلۋدا.

الماتى اكىمى سونداي-اق "تاستاق" ىقشاماۋدانىنداعى پروكوفەۆ كوشەسىن جوندەۋ جۇمىسىنىڭ بارىسىمەن تانىستى. مۇندا ويىن جانە سپورت الاڭدارى، دەمالاتىن ورىندارى بار زاماناۋي جاياۋ جۇرگىنشى ايماعى سالىنادى. جوعارىدا اتالعان كوشە قايتا جاڭارعان دۇيسەنوۆ كوشەسىمەن قيلىسادى، مۇندا دا وتكەن جىلى جايلى جاياۋ جۇرگىنشى ايماعى پايدا بولعان ەدى.

"وسىلايشا المالى اۋدانىنىڭ وسى بولىگىندەگى تۇرعىنداردىڭ ءوز "تولەبايى" پايدا بولادى"، - دەپ اتاپ ءوتتى قالا اكىمى.

ب. ساعىنتاەۆ جۇمىس ساپارى كەزىندە «جۇمىسپەن قامتۋدىڭ جول كارتاسى» باعدارلاماسى اياسىندا قولعا الىنعان گاگارين بۋلۆارىنىڭ اباي داڭعىلىنان تولە بي كوشەسىنە دەيىنگى اۋماعىنىڭ جانە ماقاتاەۆ اتىنداعى سكۆەردىڭ قالاي جوندەلىپ جاتقانىن كوردى.

"بۇل سكۆەر شىعارماشىل زيالى قاۋىمنىڭ، جاس اقىندار مەن جازۋشىلاردىڭ مەكەنىنە اينالۋى ءتيىس. ءتىپتى مۇنداعى اتموسفەرانىڭ ءوزى شىعارماشىلىققا شابىتتاندىراتىنداي جاعداي جاساۋ مىندەتىن قويدىم" -، دەپ جازدى ب. ساعىنتاەۆ.

اعىمداعى جىلى المالى اۋدانىندا "بيۋدجەتكە قاتىسۋ" جوباسى بويىنشا 15 جوبا ىسكە اساتىن بولادى، ول ءۇشىن 240 ملن تەڭگە بولىنگەن. ايتا كەتەرلىگى، سكۆەرلەر مەن جاسىل ايماقتاردى، اۋلالاردى جوندەۋ، قوزعالىسى شەكتەۋلى ازاماتتار ءۇشىن جەر استى وتپەلى جولدارعا كوتەرگىش تەتىكتەردى ورناتۋ بويىنشا بىرقاتار جوبالار دا جۇزەگە اسادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز