- تاريحي-مادەني كەشەندەر اۋماعىندا جۇرگىزىلەتىن جۇمىستار ادىسنامالىق كەڭەس اياسىندا رەتتەلەدى جانە بارلىق تاريحي قايتا قۇرۋ جانە ارحەولوگيالىق جۇمىستار يۋنەسكو وكىلدەرىمەن كەلىسىلەدى. «رۋحاني جاڭعىرۋ» باعدارلاماسى وڭىرلەردەگى تاريحي-مادەني وبەكتىلەردىڭ ينفراقۇرىلىمىن كۇشەيتۋگە سەرپىن بەردى. 2019 جىلى ەلىمىز بويىنشا 2 مۋزەي, 7 مادەنيەت ءۇيى, 11 اۋىلدىق كىتاپحانا اشىلدى, - دەدى اقتوتى رايىمقۇلوۆا.
وسى رەتتە مينيستر ماڭعىستاۋ وبلىسىنىڭ بەلگىلى مەملەكەت جانە قوعام قايراتكەرى ءابىش كەكىلباەۆ اتىنداعى ورتالىقتى ەرەكشە اتاپ ءوتتى.
- ءابىش كەكىلباەۆ اتىنداعى ورتالىقتىڭ سالتاناتتى اشىلۋىنا مەملەكەت باسشىسى قاتىستى. ورتالىق جانىنان مۋزەي اشىلىپ, جىل سوڭىنا دەيىن كىتاپحانا مەن تەاتر قۇرىلىسىن اياقتاۋ جوسپارلانۋدا. سونداي-اق تۋريستىك قىزىعۋشىلىقتى دامىتۋدىڭ تىرەك نۇكتەلەرى رەتىندە ۆيزيت-ورتالىقتار قۇرىلىسى جۇرگىزىلۋدە. بۇل ۆيزيت-ورتالىقتار ءوڭىردىڭ تاريحي-مادەني مۇراسىن قازاقستاندىق جانە شەتەلدىك ازاماتتار اراسىندا ىلگەرىلەتۋگە ىقپال ەتەتىن بولادى, - دەدى ول.
ونىڭ ايتۋىنشا, ەلىمىزدىڭ بارلىق جەتەكشى مۋزەي-قورىقتارىنىڭ اۋماعىندا ۆيزيت-ورتالىقتاردىڭ قۇرىلىسى, مۋزەيفيكاتسيا جۇمىستارى ءجۇرىپ جاتىر. وتكەن جىلى تۇركىستان وبلىسىنداعى «وتىرار» جانە الماتى وبلىسىنداعى «تاڭبالى» ۆيزيت-ورتالىقتارىنىڭ قۇرىلىسى اياقتالعان. بيىلعى جىلى « ۇلىتاۋ», «گاۋحار انا», «ورداباسى» جانە «ساۋران» مۋزەي-قورىقتارىنىڭ ۆيزيت-ورتالىقتارى قۇرىلىسىن اياقتاۋ جوسپارلانىپ وتىر. 2021 جىلدان باستاپ بۇل قاتارعا «ەسىك», «بەرەل», «شىلىكتى» قوسىلادى.
