ەلورداداعى «قازمەدياورتالىعى» عيماراتىندا «قازاقستاندىق مەديا سالانىڭ دامۋ بولاشاعى» تاقىرىبىندا دوڭگەلەك ۇستەل ءوتتى. سانيتارلىق-ەپيدەميولوگيالىق رەجيمنىڭ سالدارىنان سەلەكتورلىق جاعدايدا وتكەن جيىنعا مەديا سالا وكىلدەرى, نۇر-سۇلتان جانە الماتى اكىمدىكتەرى عيماراتتارىنان, سونداي-اق الماتى قالاسىنداعى «قازتەلەراديو» كەڭسەسىنەن عالىمدار مەن زيالى قاۋىم بەينەبايلانىس ارقىلى قوسىلدى.
سپيكەرلەر اقپارات جانە قوعامدىق دامۋ ءمينيسترى ايدا بالاەۆا, پارلامەنت ءماجىلىسىنىڭ دەپۋتاتى دارحان مىڭباي, «QAZAQSTAN» رترك اق باسقارما توراعاسى ءلاززات تانىسباي, «قازاق ادەبيەتى» گازەتىنىڭ باس رەداكتورى داۋرەن قۋات, Salem Social Media باس ديرەكتورى الەكساندر اكسيۋتيتس, سۇلەيمەن دەميرەل ۋنيۆەرسيتەتىنىڭ الەۋمەتتىك عىلىمدار كافەدراسىنىڭ مەڭگەرۋشىسى ماديار ساۋداباەۆ بولدى. دوڭگەلەك ۇستەلدىڭ تىزگىنشىسى رەتىندە بەلگىلى جۋرناليست, قر پارلامەنتى سەناتىنىڭ دەپۋتاتى نۇرتورە ءجۇسىپ ءسوز سويلەدى.
ا. بالاەۆا «كەشەگى توتەنشە جاعداي كەزىندە قيىندىقتاردى جەڭە وتىرىپ, ءبىزدىڭ تىلشىلەرىمىز بەن ماماندارىمىز دارىگەرلەرمەن, پوليتسەيلەرمەن جانە اسكەري قىزمەتشىلەرمەن قاتار وزدەرىنىڭ ازاماتتىق پوزيتسياسىن وزگەرتپەي, الدىڭعى قاتاردا بولىپ, قوعامدى جەدەل جانە شىنايى اقپاراتپەن قامتاماسىز ەتتى», - دەي كەلىپ, توتەنشە جاعداي كەزىندە كورسەتكەن ازاماتتىق ەرلىگى ءۇشىن بارشا ءباسپاسوز قىزمەتكەرلەرىنە العىسىن ءبىلدىردى.
جيىن بارىسىندا مينيستر ا.بالاەۆا داعدارىستان كەيىنگى كەزەڭدەگى باق-تى قولداۋ شارالارىنا, وتاندىق باق-تىڭ باسەكەگە قابىلەتتىلىگىن ارتتىرۋعا, جوعارى بىلىكتى كادرلاردى دايارلاۋعا (ونىڭ ىشىندە سالالىق جۋرناليستيكادا), مەملەكەتتىك اقپاراتتىق تاپسىرىستى قايتا قالىپتاستىرۋ سەكىلدى بىرقاتار ماڭىزدى ماسەلەلەردى كوتەردى.
پارلامەنت ءماجىلىسىنىڭ دەپۋتاتى د. مىڭباي ناقتى جانە دۇرىس اقپاراتتى مول تيراجبەن تاراتۋ ءۇشىن اقپاراتتىق سۇزگى قۇرۋ قاجەتتىگىن اتاپ ءوتتى. سونداي-اق, ونىڭ پىكىرىنشە, جۋرناليستەر مەن بلوگەرلەردىڭ بىلىكتىلىگىن ارتتىرىپ وتىرۋ ءۇشىن, اقپاراتتىق جاڭاشىلدىقتاردان قالىس قالماۋعا مۇمكىندىك بەرەتىن كوپ سالالى ترەنينگتەر قۇرۋ قاجەت.
«قازاق ادەبيەتى» گازەتىنىڭ باس رەداكتورى داۋرەن قۋات كوروناۆيرۋس ىندەتىنەن قازىرگى ۋاقىتتا مەرزىمدى ءباسپاسوزدىڭ اۋىر داعدارىسقا ۇشىراعانىن تىلگە تيەك ەتتى. ونىڭ ايتۋىنشا, باسپاحانالاردىڭ جۇمىسى توقتادى, باسپا ونىمدەرىن وتكىزۋ نارىعى بۇعاتتالدى, ەكىنشى جارتىجىلدىققا جازىلۋ سوزىلدى, تاراتۋ (اتاپ ايتقاندا, «قازپوشتا») جانە ت. ب. جۇمىس ىستەمەي قالدى.
باياندامادان كەيىن وتاندىق باق-تاردىڭ پروبلەمالارى مەن پەرسپەكتيۆالارى, قازاقستاندىق جۋرناليستيكانىڭ ءالسىز جانە كۇشتى جاقتارى, ونىڭ تابىستى مەملەكەت قۇرۋداعى ماقساتى مەن ءرولى تالقىلاندى. ناقتى سيپاتتاعى (سالالىق جۋرناليستيكانىڭ ساپاسى, ماتەريالداردىڭ دۇرىس ەمەستىگى), سونداي-اق جاھاندىق (مەملەكەت يدەولوگياسىن قالىپتاستىرۋداعى جۋرناليستيكانىڭ ءرولى, ونىڭ بيلىك پەن قوعام اراسىنداعى مەدياتورلىق قىزمەتى جانە ت.ب.) ماسەلەلەر كوتەرىلدى.
«مادەنيەت» جۋرنالىنىڭ باس رەداكتورى, جازۋشى دۋلات يسابەكوۆ ء«باسپاسوزدىڭ سانى قانشا كوپ بولعانمەن, ءبىر-بىرىنەن اۋمايتىن ماتەريال جاريالايدى» دەگەن سىن ايتتى.
جازۋشى تولەن ابدىك قازىرگى باسىلىمداردا ساۋاتسىزدىق بىلاي تۇرسىن, كونستيتۋتسياعا قارسى جاريالىمدار ءجيى كەزدەسەتىنىن جانە بۇعان توزۋگە بولمايتىنىن اتاپ ءوتتى.
مەديا مەنەدجەر قانات ساحاريانوۆ وڭىرلىك اكىمدىكتەر باق-تا جانە الەۋمەتتىك جەلىلەردە بيۋدجەت قاراجاتى ەسەبىنەن ءوز جۇمىسىن ناسيحاتتاماۋى ءتيىس ەكەنىن ايتتى.
دوڭگەلەك ۇستەلدىڭ جۇمىسىن قورىتىندىلاي كەلە, ا.بالاەۆا ءىس-شاراعا قاتىسۋشىلار كوتەرگەن بارلىق پروبلەمالىق ماسەلەلەر ەسكەرىلەتىنىن, تالداناتىنىن جانە ولار بويىنشا ناقتى شەشىمدەر الگوريتمى جاسالاتىنىن اتاپ ءوتتى.
«جەمىستى جۇمىستارىڭىز ءۇشىن العىس ايتامىن. اقپارات جانە قوعامدىق دامۋ مينيسترلىگى جانىنداعى دوڭگەلەك ۇستەل ءداستۇرلى تۇردە جالعاساتىن بولادى. ءبىز تەك اقپاراتقا قاتىستى عانا ەمەس, قوعامدى تولعاندىراتىن باسقا دا ماسەلەلەردى تالقىلايتىن بولامىز», - دەدى مينيستر.
