وبلىستىق توتەنشە جاعدايلار دەپارتامەنتىنىڭ مالىمەتىنشە, 1 ماۋسىم كۇنگى قاتتى جەل وڭىردەگى بىرنەشە عيماراتتىڭ شاتىرلارىن ۇشىرىپ اكەتسە, وبلىس ورتالىعىنداعى ءبىر دۋالدى قۇلاتقان. كوپتەگەن اعاش بۇتاقتارى سىنىپ, قالا كوشەلەرىندە قولايسىز جاعداي تۋعىزدى.
قاتتى جەلدەن اقسۋ قالاسى جانە قالا اۋماعىنا قاراستى جولقۇدىق اۋىلىنداعى عيماراتتىڭ شاتىرى ۇشىپ كەتتى. تابيعي اپات سالدارىنان اقسۋ قالاسى م.اۋەزوۆ كوشەسى بويىنداعى «شولپان» قوناقۇي كەشەنىنىڭ 600 شارشى مەتر اۋماقتاعى شاتىرى ۇشىپ تۇسكەن. قوناقۇي كەشەنىنىڭ شاتىرىمەن بىرگە قالالىق اۋرۋحانانىڭ 300 شارشى مەتر اۋماقتاعى شاتىرىن دا ۇشىرىپ اكەتتى. زارداپ شەككەندەر مەن قۇربان بولعاندار جوق.
تاعى ءبىر وقيعا قالاعا قاراستى جولقۇدىق اۋىلىندا ورىن الدى. قاتتى جەل اۋىلدىق مادەنيەت ءۇيىنىڭ شاتىرىن ۇشىرىپ تۇسىرگەن. مادەنيەت ءۇيىنىڭ عيماراتى 1968 جىلى سالىنعان, جالپى اۋدانى 500 شارشى مەتر.
وسى كۇنى جەلەزين اۋدانى ەڭبەكشى اۋىلىندا سوققان قاتتى جەلدىڭ ەكپىنى اۋىلدىق مەكتەپتىڭ 240 شارشى مەتر اۋماقتاعى شاتىرىن جارتىلاي ۇشىرىپ اكەتتى. مەكتەپتىڭ ەكى قاباتتى عيماراتى 1982 جىلى سالىنعان, جالپى اۋدانى – 1736 شارشى مەتر.
وبلىس ورتالىعىندا قاتتى جەل «قىلمىستىق-اتقارۋ جۇيەسى دەپارتامەنتى» مەكەمەسىنىڭ ۇزىندىعى 25 مەتردى قۇرايتىن مەتالل قورشاۋى مەن كىرپىشتەن جاسالعان قورشاۋ باعانالارىن قۇلاتتى.
ال بۇعان دەيىن وبلىستىق توتەنشە جاعدايلار دەپارتامەنتى «دارمەن» قوسىمشاسى ارقىلى قاتتى جەل تۇرىپ, ونىڭ ەكپىنى سەكۋندىنا 18 مەتردەن اساتىنى تۋرالى اقپارات تاراتقان بولاتىن.
وبلىس اۋماعىندا قاتتى جەل تۇراتىنى تۋرالى ەسكەرتۋ ۇيالى بايلانىس وپەراتورلارىنىڭ بارلىق ابونەنتتەرىنە تاراتىلعان ەدى.
بىراق, ماسەلە نەدە؟.. ۇشىپ كەتكەن شاتىرلارمەن بىرگە قىرۋار قارجى دالاعا كەتكەنىن كوردىك, «ۇشاتىن شاتىرلار» قازىر تۇرعىنداردىڭ ومىرىنە قاۋىپ توندىرۋدە. وبلىستاعى بىلتىر عانا كۇردەلى جوندەۋدەن وتكەن عيماراتتاردىڭ بىردە-ءبىرىنىڭ شاتىرى داۋىل ەكپىنىنە شىداي المادى. بۇل ماسەلە وڭىردە سالىنعان, كۇردەلى جوندەۋدەن وتكەن ساپاسىز قۇرىلىستاردا كەمشىلىك جەتەدى دەگەن ءسوز.
پاۆلودار وبلىسى
