قالانىڭ باس پوليتسەيى كارانتين رەجيمى كەزىندە شاھارداعى قىلمىستىڭ 51 پايىزعا ازايعانىن ايتادى. الايدا كولىككە ماس كۇيىندە وتىرىپ, ءرولدى تىزگىندەيتىندەر كەمىمەگەن. كەسىرىنەن جول ۇستىندە اجال قۇشاتىندار كورسەتكىشى وزگەرىسسىز قالىپ وتىر.
دەپارتامەنتتىڭ جىل باسىنان بەرگى اتقارعان جۇمىسىن سارالاعان باسشىنىڭ سوزىنە سۇيەنسەك, قاڭتاردان بەرى شىمكەنتتىك ءتارتىپ ساقشىلارى 112 العىس حات العان. ال, «تۇرعىنداردىڭ ايتقان راقمەتى ودان دا كوپ» دەيدى ەرالى جۇماحانبەتوۆ.
قىزمەتكەرلەر جۇمىسىنان ءمىن تاپپاعان جۇماحانبەتوۆ اشىلماعان قىلمىستىڭ دا قالماعانىن ايتادى. 8 جىل بۇرىن جاسالعان زاڭسىز ارەكەتتى دە اشكەرەلەدىك دەگەن ول قالادا بۇزاقىلىق كەمىگەنىن ايتادى. ماسەلەن, كوشەدەگى قىلمىس 12 پايىزعا, قوعامدىق قىلمىس 11 پايىزعا, جول اپاتى 8 پايىزعا ازايىپتى. بىراق, ماس كۇيىندە رولگە وتىراتىندار جانە جول اپاتىنان كوز جۇماتىندار كورسەتكىشى سول كۇيىندە قالعان.
باس پوليتسەي شەندىلەردىڭ كارانتين رەجيمىندەگى اتقارعان جۇمىسىن دا ۇمىتقان جوق. توتەنشە جاعداي كەزىندە 1800 قىزمەتكەر كەزەكشىلىكتە تۇرىپ, 350 ىندەت وشاعىن كۇزەتكەن. وسى ۋاقىتتا قالاداعى قىلمىس 51 پايىزعا ازايىپتى.
جىلدىڭ جارتىسىن جوعارى ساپادا اياقتادىق دەگەن ە. جۇماحانبەتوۆ ەندى شىمكەنتتەگى بەينەكامەرالاردى 2500-گە جەتكىزۋدى كوزدەپ وتىر. قازىرگى ۋاقىتتا قالادا 479 بەينەباقىلاۋ كامەراسى جۇمىس ىستەپ تۇر. جۋىق ارادا ولاردىڭ قاتارىنا تاعى 200 قوسىلماق.
