بۇگىن قالا اكىمى مۇرات ايتەنوۆ ەلتايعا ارنايى بارىپ, تۇرعىزىلىپ جاتقان ۇيلەردىڭ قۇرىلىسىمەن تانىستى. قالا باسشىسى تۇرعىن ءۇي قۇرىلىسىن سالۋدا ەلىمىزدە كوش باستاپ جۇرگەن اتالمىش قۇرىلىس مەكەمەسىنە العىسىن جەتكىزدى.
وسى ايدىڭ سوڭىندا اياقتالۋى جوسپارلانعان ۇيلەردىڭ ولشەمى 11ح11 مەتردى قۇرايدى. ال اۋماعى 112.36 شارشى مەتر. سونىمەن قاتار, قابىرعاسى گازابلوكتان, شاتىرى پروفناستيلدەن بولادى. جوبا بويىنشا ىشكى جانە سىرتقى ارلەۋ جۇمىستارى دا جۇرگىزىلەدى.
مۇرات دۇيسەنبەك ۇلى سۋ باسىپ وتكەن اۋلالار مەن كوشەلەردى ارالاپ كورىپ, ونداعى تۇرعىندارمەن كەزدەستى. ءوز كەزەگىندە اكىم سۋ تاسقىنىنان شىعىنعا ۇشىراعان تۇرعىندارعا «شىمكەنت قايىرىمدى قالا» الەۋمەتتىك قورىنان ءتيىستى كومەك كورسەتىلەتىنىن جانە بارلىق قۇرىلىس جۇمىستارى اياقتالعان سوڭ تۇرعىن الاپتاعى باس كوشەگە اسفالت جول توسەلەتىنىن ايتىپ ءوتتى.
كەزدەسۋ بارىسىندا تۇرعىن جاڭاباەۆ باتىرحان قولداۋ كورسەتىپ جاتقان بارشا قىزمەتكەرلەرگە العىسىن ءبىلدىرىپ, كەزىندە دەمەۋشىلەر ەسەبىنەن سالىنعان توعىس وزەنىنەن وتەتىن ەلتايداعى ەكىنشى كوپىردى جوندەپ بەرۋىن سۇرادى. وسى رەتتە, قالا اكىمى كوپىر سالۋ بويىنشا ءتيىستى جۇمىستار جۇرگىزىلەتىنىن جانە قارجى ءبولۋ بويىنشا ماسليحاتقا ۇسىنىس حات ەنگىزىلەتىنىن جەتكىزدى.
ارالاۋ قورىتىندىسى بويىنشا اكىم تابيعي اپاتتىڭ الدىن الۋ جانە بولدىرماۋ ماقساتىندا سالا جەتەكشىلەرىنە قاشىرتقى كانالدار جۇيەسى جوباسىن ازىرلەۋدى تاپسىردى.
