ەڭ الدىمەن ە.ءبىرتانوۆ كوروناۆيرۋس ينفەكتسياسى بويىنشا اعىمداعى جاعدايعا توقتالدى. «بۇگىنگى كۇنى ەلىمىزدە كوروناۆيۋرس ينفەكتسياسىن 12124 ادام جۇقتىردى. ولارىڭ 77%-ى – سيمپتومسىز ناۋقاستار. سوعان قاراماستان بارلىق تىركەلگەن ازاماتتارعا تولىق مەديتسينالىق دياگنوستيكالىق كومەك مەملەكەت تاراپىنان تەگىن بەرىلەدى. ەم حالىقارالىق ارىپتەستەرمەن اقىلداسقان عىلىمي جۇمىستارعا نەگىزدەلگەن كلينيكالىق پروتوكول ارقىلى جۇرگىزىلەدى. بۇل پروتوكولدى ەلىمىزدىڭ ەڭ بەلگىلى عالىمدارى ازىرلەپ, بەكىتكەن. ەپيدەميا باستالعاننان بەرى 8 رەداكتسيادان ءوتتى. سول ەم-دومنىڭ ناتيجەسىندە 52% (6288) ناۋقاس جازىلىپ شىقتى. ال 5836 پاتسيەنت باقىلاۋدا», دەدى ول.
ەلىمىزدىڭ باس دارىگەرى جاقىندا عىلىمي زەرتتەۋ جۇمىستارىنىڭ نەگىزىندە ەلىمىزدە كوروناۆيرۋسقا قارسى شارالاردىڭ تاكتيكاسى وزگەرگەنىن جەتكىزدى. «جاڭا تاكتيكا حالىقارالىق ستاندارتتارعا دا ساي كەلەدى. ول – سيمپتومسىز ناۋقاستاردى اۋرۋحانالارعا جاتقىزباي, ءۇي كارانتينىنە الۋ. ولار جەرگىلىكتى ەمحانالارداعى ۋچاسكەلىك دارىگەرلەردىڭ باقىلاۋىندا بولادى. قازىرگى ۋاقىتقا دەيىن سونداي جەڭىل دەڭگەيدەگى ناۋقاستار ينفەكتسيالىق اۋرۋحانالاردا جاتىر. وسى اپتادان باستاپ وسى پروتوكولدى ەنگىزدىك. قازىر ستاتسيوناردا جاتقان 5836 ناۋقاستىڭ 59-ىنىڭ (1%) ءحالى ناشار. 600-دەي (10%) پاتسيەنتتىڭ جاعدايى ورتاشا دەڭگەيدە. تاعى 10%-ىنىڭ اۋرۋى جەڭىل بولسا, 78%-ى (4500 ادام) – سيمپتومسىز», دەدى ە.ءبىرتانوۆ.
كەيبىر وسىنداي اۋرۋ بەلگىلەرى ەش بايقالماعان ناۋقاستاردىڭ اۋرۋحاناعا جاتۋدان باس تارتىپ جاتقانىن ايتقان مينيستر: «مۇنى دۇرىس ءتۇسىنۋ كەرەك. ول ينفەكتسيانى باسقالارعا جۇقتىرۋى مۇمكىن. سوندىقتان ولاردىڭ اۋرۋحانادا نەمەسە ۇيدە ءوز-ءوزىن وقشاۋلاۋى وتە ماڭىزدى», دەدى.
