نەگىزگى كاپيتالعا سالىنعان ينۆەستيتسيالار بويىنشا نىسانالى كورسەتكىشتەردىڭ ورىندالۋى تۋرالى ۇلتتىق ەكونوميكا ءمينيسترى ر. دالەنوۆ, ينۆەستيتسيالار تارتۋ بويىنشا اتقارىلىپ جاتقان جۇمىستار تۋرالى سىرتقى ىستەر ءمينيسترى م. تىلەۋبەردى, يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ, ەنەرگەتيكا ءمينيسترى ن. نوعاەۆ, اۋىل شارۋاشىلىعى ءمينيسترى س. وماروۆ, قىزىلوردا وبلىسىنىڭ اكىمى گ. ابدىقالىقوۆا, قاراعاندى وبلىسىنىڭ اكىمى ج. قاسىمبەك, ماڭعىستاۋ وبلىسىنىڭ اكىمى س. ترۇموۆ, شىمكەنت قالاسىنىڭ اكىمى م. ايتەنوۆ باياندادى.
وتىرىستا كوروناۆيرۋس ىندەتىنىڭ تارالۋ سالدارى اعىمداعى ەكونوميكالىق احۋالعا تۇزەتۋ ەنگىزىپ, ينۆەستيتسيا تارتۋ بويىنشا جۇمىستارعا تەرىس ىقپالىن تيگىزگەنى اتاپ ءوتىلدى. بيىل قاڭتار-ءساۋىر ايلارىندا قر نەگىزگى كاپيتالىنا سالىنعان ينۆەستيتسيالار 3 ترلن تەڭگەنى – جوسپارلانعان نىسانالى كورسەتكىشتەن 84% قۇرادى. وڭىرلەر بولىنىسىندە ەڭ كوپ — 30% استام ورىنداماۋ ماڭعىستاۋ جانە قىزىلوردا وبلىستارىندا, سونداي-اق الماتى جانە شىمكەنت قالالارىندا بايقالعان.
پرەمەر-مينيستر بۇعان دەيىن قويىلعان مىندەتتى — 2025 جىلعا قاراي نەگىزگى كاپيتالعا سالىناتىن ينۆەستيتسيالار كولەمىن ءجىو-ءنىڭ 30%-نا دەيىن جەتكىزۋ مىندەتىن ىسكە اسىرۋدىڭ ماڭىزدىلىعىن اتاپ ءوتتى. بۇدان ءارى الەمدە ينۆەستيتسيالار ءۇشىن باسەكەلەستىكتىڭ ارتۋى كۇتىلىپ وتىر, بۇل ەكونوميكانىڭ بارلىق سالالارىندا جاڭا ينۆەستيتسيالىق جوبالاردى ىسكە اسىرۋ, سونداي-اق ينۆەستيتسيالىق احۋالدى ودان ءارى جاقسارتۋ بويىنشا بەلسەندى شارالاردى قابىلداۋدى تالاپ ەتەدى.
«ۇكىمەت ەكونوميكانى جانداندىرۋ جۇمىستارىن باستادى. 2020 جىلدىڭ سوڭىنا دەيىن ەكونوميكالىق ءوسىمدى قالپىنا كەلتىرۋ بويىنشا كەشەندى جوسپار قابىلداندى. وعان سايكەس ينۆەستيتسيالار نەگىزگى درايۆەرلەردىڭ ءبىرى رەتىندە قاراستىرىلادى», — دەدى ا. مامين.
پرەمەر-مينيستر ينۆەستيتسيالىق ۇسىنىستاردى ازىرلەۋ ساپاسىن, مەملەكەتتىك ورگاندار مەن بارلىق مۇددەلى تاراپتاردىڭ جۇمىسىن ۇيلەستىرۋ دەڭگەيىن ارتتىرۋ, شەتەل كاپيتالىن جانە تەحنولوگياسىن تارتۋدىڭ جاڭا قۇرالدارىن ەنگىزۋ, ەكونوميكانىڭ باسىمدىقتى سالالارىن تارگەتتەۋ قاجەتتىگىن اتاپ كورسەتتى.
ۇكىمەت باسشىسى ورتالىق مەملەكەتتىك جانە جەرگىلىكتى اتقارۋشى ورگاندارعا قىسقا مەرزىم ىشىندە ەلىمىزدە جانە الەمدە ەكونوميكالىق احۋالدىڭ وزگەرۋىن ەسكەرۋمەن ينۆەستيتسيالىق جوبالار پۋلىن جانە نەگىزگى كاپيتالعا ينۆەستيتسيالار تارتۋ بويىنشا نىسانالى ينديكاتورلاردى وزەكتەندىرۋدى تاپسىردى.
