جاھاندىق ءباسى بيىك باسەكەلەردەن الەم جانە ازيا بىرىنشىلىگى, ازيا ويىندارى جانە تاعى باسقا دا حالىقارالىق دودالاردى ايتپاعاننىڭ وزىندە, ەلىمىزدىڭ سپورتشىلارى ءتورت جىلدا ءبىر كەلەتىن وليمپيا ويىندارىندا ءانۇرانىمىز 16 مارتە شىرقالىپ, 54 رەت تۋىمىز كوكتە جەلبىرەدى. قازاقستان گيمنى ەڭ العاش 1994 جىلى نورۆەگيانىڭ ليللەحاممەر قالاسىندا وتكەن XIX قىسقى وليمپيا ويىندارىندا شىرقالدى. بۇل ەلىمىزدىڭ تاۋەلسىز ەل رەتىندەگى قاتىسقان ءبىرىنشى وليمپياداسى ەدى. كوكشەتاۋ وبلىسىنىڭ تۋماسى ۆلاديمير سميرنوۆ ءبىر ءوزى قازاق ەلىنىڭ ءانۇرانىن شىرقاتىپ قانا قويماي, تاعى ءۇش مارتە تۋىمىزدى بيىككە كوتەردى. اق وليمپياداعا جينالعان 62 مەملەكەتتىڭ وكىلدەرى ءبىرىنشى رەت قازاقستاننىڭ ءانۇرانىن تىڭداپ, كوك بايراعىمىزعا كۋا بولدى. كەيىنگى جىلدارى كوك مۇز, اق قارداعى ويىنداردا تۋىمىز 5 رەت قانا بيىكتە جەلبىرەدى. 1998 جىلى ناگانودا ليۋدميلا پروكاشەۆا مەن ۆلاديمير سميرنوۆ جۇلدەگەرلەر قاتارىنان كورىندى. 2010 جىلى ۆانكۋۆەردە ەلەنا حرۋستالەۆا كۇمىس, 2014 جىلى سوچيدە دەنيس تەن جانە 2018 جىلى پحەنچحاندا يۋليا گالىشەۆا تۇعىردىڭ ءۇشىنشى ساتىسىنان كورىنىپ, كوك تۋ اۋەدە قالىقتادى.
جازعى وليمپيادالاردا ءانۇرانىمىز شىرقالماي, كوك تۋىمىزدىڭ كوتەرىلمەي قالعان كەزى بولعان جوق. ماسەلەن, 1996 جىلى مۇحيتتىڭ ارعى بەتىندە ۇيىمداستىرىلعان اتلانتاداعى جازعى وليمپيا ويىندارى مەن كەيىنگى ريو وليمپياداسىنا دەيىنگى ارالىقتا ءانۇرانىمىز 15 رەت الەمنىڭ ءتورت قۇرلىعىندا اۋەلەگەن ەكەن. اتاپ ايتار بولساق, اقش تورىندە بالۋان يۋري مەلنيچەنكو, بەسسايىسشى الەكساندر پارىگين مەن «بالقاش جولبارىسى» دەگەن لاقاپ اتقا يە بىلعارى قولعاپ شەبەرى ۆاسيلي جيروۆ, عاسىرلار توعىسىنداعى سيدنەي وليمپياداسىندا مارقۇم بەكزات ساتتارحانوۆ, ەرماحان يبرايموۆ جانە جەلاياق ولگا شيشيگينانىڭ ارقاسىندا ءانۇرانىمىز جاسىل قۇرلىقتا شىرقالدى. 2004 جىلى گرەكيانىڭ باس شاھارى – افينادا وتكەن وليمپيادادا بوكسشى باقتيار ارتاەۆتىڭ قۇرمەتىنە قازاقستاننىڭ ءانۇرانى ورىندالدى.
2008 جىلعى بەيجىڭدەگى جازعى وليمپيا ويىندارىندا ءسوزىن ەلباسى نۇرسۇلتان نازارباەۆ پەن جۇمەكەن ناجىمەدەنوۆ, ءانىن ۆالس كورولى ءشامشى قالداياقوۆ جازعان تاۋەلسىز قازاقستان تاريحىنداعى ەكىنشى ءانۇراننىڭ وليمپيادا تورىندە تۇڭعىش رەت شىرقالۋىنا باقىت سارسەكباەۆ سەبەپكەر. تۇلا بويىڭدى شىمىرلاتىپ, ەرەكشە قۋات بەرەتىن ءانۇرانىمىزدىڭ اۋەنى شىرقالعاندا قىتاي كوشەلەرىندە قازاق جانكۇيەرلەرىنىڭ قۋانىشىندا شەك جوق ەدى. وسى دودادا اۋىر اتلەت يليا يلين دە توپ جارىپ, قازاقستاننىڭ كوك بايراعىن جەلبىرەتكەن-ءدى. الايدا حالىقارالىق وليمپيادا كوميتەتى ءيليندى دوپينگ قولداندى دەپ ايىپتاپ, التىن مەدالىن كەرى قايتارىپ العان بولتىن.
2012 جىلعى لوندوندا الاۋى تۇتانعان XXX جازعى وليمپيا ويىندارىندا قازاقستاندىق سپورتشىلار 7 مارتە تۇعىردىڭ بيىك ساتىسىنان كورىنگەن-ءدى. جارىستىڭ العاشقى كۇنىندە ۆەلوسپورتشى الەكساندر ۆينوكۋروۆ وليمپيادا چەمپيونى اتانىپ, بارشا قازاق جۇرتىن قۋانتقانى ەسىمىزدە. جارىس جولىنا شىققان اۋىر اتلەتتەرىمىز زۋلفيا چينشانلو, مايا مانەزا, سۆەتلانا پودوبەدوۆا جانە يليا يلين ەل قورجىنىنا التىن جۇلدە سالىپ, ءانۇرانىمىزدى اۋەلەتكەن. بىراق تاعى دا سول دوپينگ ماسەلەسى كوتەرىلىپ, حوك لوندوندا باس جۇلدە العان زىلتەمىرشىلەرىمىزدىڭ ناتيجەلەرىن جوققا شىعارىپ, ەڭسەمىزدى تۇسىرگەنى راس. دەگەنمەن كەز كەلگەن جارىستا ورعىپ تا, قارعىپ تا سەكىرىپ جۇلدە الاتىن ولگا رىپاكوۆا بۇل جولى دا جۇرىسىنەن جاڭىلماي, لوندوندا كوك تۋىمىزدى بيىككە كوتەردى. ال وليمپيادانىڭ سوڭعى كۇنىندە بوكسشى سەرىك ساپيەۆ جارىس قوجايىنى فرەددي ەۆانستان التىن جۇلدەنى جۇلىپ الىپ, قازاق ەلىنىڭ ابىرويىن تۇماندى البيوندا اسقاقتاتتى.
2016 جىلى ريو تورىندە وتكەن وليمپيا ويىندارىندا دا ءۇش سپورتشىمىز دارا شىقتى. برازيليادا ەلىمىزدىڭ كوك بايراعىن ەڭ ءبىرىنشى ءجۇزۋ سپورتىنىڭ وكىلى دميتري بالاندين جەلبىرەتىپ, ءانۇرانىمىز اۋەلەدى. ونىڭ ءىزىن الا نيدجات راگيموۆ جۇرەگىنە قولىن قويىپ, ءانۇرانىمىزدى ارەناعا جينالعان بارشا جۇرتپەن بىرگە شىرقاپ تۇرىپ قۋانىشتان كوز جاسىن تىيا المادى. ودان كەيىن ءانۇراندى اسقاقتاتىپ, كوك تۋىمىزدى داڭقتى بوكسشى دانيار ەلەۋسىنوۆ كوتەردى. ماراپاتتاۋ راسىمىندە ءانۇراندى تەبىرەنە شىرقاعان ەلەۋسىنوۆتىڭ قۋانىشى الاش جانكۇيەرلەرىنىڭ قۋانىشىنا ۇلاسقان-دى.
جازعى وليمپيا ويىندارىندا بايراعىمىزدى ەكى رەت جەلبىرەتكەن وعلاندارىمىز دا جەتەرلىك. ماسەلەن, بوكسشىلاردان بولات ءجۇمادىلوۆ اتلانتا (1996) مەن سيدنەيدە (2000), ادىلبەك نيازىمبەتوۆ لوندون (2012) مەن ريو (2016), نىسانا كوزدەۋدەن سەرگەي بەلياەۆ (اتلانتا) وليمپياداسىندا ەكى رەت كۇمىس جۇلدە, ال يۆان دىچكو 2012 جانە 2016 جىل قولا مەدال ولجالاپ, ەكى وليمپيادادا تۋىمىزدى كوتەرگەن. ال تاعى ەكى ساڭلاعىمىز, ياعني بوكسشى ەرماحان يبرايموۆ (1996, قولا) پەن ۆەلوسپورت وكىلى الەكساندر ۆينوكۋروۆ (2000, كۇمىس) تورتجىلدىقتىڭ باستى دوداسىندا العاش تۋىمىزدى بيىكتە كوتەردى. ءتورت جىلدان كەيىن ە.يبرايموۆ سيدنەيدە, 12 جىلدان سوڭ ۆينوكۋروۆ لوندوندا ءانۇرانىمىزدى وليمپيادا ارەناسىندا شىرقاتقان-دى. بۇدان بولەك, تاعى 37 سپورتشىمىز قازاقستاننىڭ كوك تۋىن وليمپيادادا جەلبىرەتكەنىن ايتا كەتەيىك.
ارينە قازاق ەلىنىڭ وعلاندارى كەلەسى جىلى جاپون ەلىندە وتەتىن جازعى وليمپيا ويىندارىندا دا كوك تۋىمىزدى بيىكتە سامعاتىپ, اسەم ءانۇرانىمىزدىڭ اۋەنىن كۇنشىعىس ەلىندە دە شىرقاتادى دەپ سەنەمىز.
