1992 جىلى العاش رەت تاۋەلسىز قازاقستاننىڭ جاڭا مەملەكەتتىك رامىزدەرى بەكىتىلدى. قازاقستاننىڭ كوك بايراعى قازىر بۇۇ-نىڭ شتاب پاتەرىندە الەمنىڭ وزگە مەملەكەتتەرىنىڭ تۋلارىمەن بىرگە جەلبىرەپ تۇر.
قازاقستان پرەزيدەنتى شەتەلدەرگە ساپارمەن بارعاندا, سپورت تۇرلەرىنەن وتەتىن ءتۇرلى الەمدىك دودالار مەن وليمپيا ويىندارىندا سپورتشىلارىمىز جەڭىس تۇعىرىنا كوتەرىلگەن كەزدە مەملەكەتتىك ءانۇرانىمىز شىرقالىپ, كوك تۋىمىز كوككە كوتەرىلگەنىنە اقپارات قۇرالدارى ارقىلى تالاي كۋا بولدىق. بۇل كورىنىستەر رۋحىڭدى كوتەرىپ, كەۋدەڭە ماقتانىش سەزىمىن ۇيالاتادى. ەلتاڭبامىزدىڭ دا ايبىنى ەرەكشە. ونىڭ سيپاتىنان ەگەمەن ەلىمىزدىڭ شەجىرەسى مەن مەملەكەتىمىزدىڭ ماقسات-مۇراتى انىق اڭعارىلادى
مەن قوستاناي وبلىسىنداعى «دۋسلىق» تاتار-باشقۇرت ەتنومادەني بىرلەستىگىنە جەتەكشىلىك ەتەمىن. ءتۇرلى مەملەكەتتىك جانە تاريحي ماڭىزعا يە اتاۋلى مەرەكەلەر قارساڭىندا ءبىز وسكەلەڭ ۇرپاققا ەلىمىزدىڭ باستى نىشاندارى جايىندا, ولاردىڭ پايدا بولۋى, ءمانى مەن قادىر-قاسيەتى تۋرالى اڭگىمەلەپ وتىرۋدى داستۇرگە اينالدىردىق. مۇنداي كەزدەسۋلەردە «مەملەكەتتىك رامىزدەر» اتتى دەرەكتى فيلم قويىلادى. بۇل فيلمدە تاۋەلسىزدىگىمىزدى ايگىلەيتىن وتانىمىزدىڭ تۋى, ەلتاڭباسى, ءانۇرانى جونىندە جان-جاقتى باياندالىپ, رامىزدەردەگى ۇلتتىق تانىم مەن سالت-ءداستۇر سيپاتتارىنا جان-جاقتى تۇسىنىك بەرىلەدى.
ۇرپاققا وتانشىل رۋحتاعى تاربيە بەرۋ مەملەكەتىمىزگە, ونىڭ تاريحىنا, مەملەكەتتىك رامىزدەرىنە, تىلىنە قۇرمەتپەن قاراۋدان باستالادى. بۇل مىندەتتىڭ كۇردەلىلىگىن ەلباسى ناقتى پايىمداپ, «...بۇل مىندەت ءبىلىم بەرۋدىڭ, مادەنيەت ورگاندارىنىڭ, قوعامدىق ۇيىمداردىڭ, بۇقارالىق اقپارات قۇرالدارىنىڭ بارلىق جۇيەسىنە, ءاربىر وتباسىنا قاتىستى. ال ونى ەلدىڭ تۋىن, ەلتاڭباسىن, ءانۇرانىن قاستەرلەۋدەن, زاڭدى ۇكىمەتتى قۇرمەتتەۋگە تاربيەلەۋدەن باستاۋ كەرەك. ءاربىر ادام بالا كەزىنەن: قازاقستان – مەنىڭ وتانىم, ونىڭ مەن ءۇشىن جاۋاپتى ەكەنى سياقتى, مەن دە ول ءۇشىن جاۋاپتىمىن دەگەن قاراپايىم ويدى بويىنا ءسىڭىرىپ وسەتىندەي ەتكەن ءجون», دەيدى. «دۋسلىق» تاتار-باشقۇرت ەتنومادەني بىرلەستىگى قۇرىلعان 1995 جىلدان بەرگى شيرەك عاسىر بويى ەلباسىمىزدىڭ وسى ءسوزىن بۇلجىماس قاعيدا رەتىندە ۇستانىپ كەلەدى دەسەم, ارتىق ايتقاندىق ەمەس.
مەملەكەتتىك رامىزدەر – قازاقستاننىڭ وتكەنى مەن بۇگىنىن ءھام بولاشاعىن بايلانىستىراتىن قاسيەتتى ۇعىم. سوندىقتان ءاربىر وتانداسىمىزدىڭ كوك تۋىمىزعا, ەلتاڭبامىزعا, مەملەكەتتىك ءتىلىمىز بەن انۇرانىمىزعا دەگەن قۇرمەتى ەرەكشە سەزىلىپ تۇرۋى ءتيىس. رامىزدەر جاستاردىڭ وتانسۇيگىشتىك سەزىمىن وياتادى, پاتريوتيزمگە ۇندەيدى, باتىلدىققا تاربيەلەيدى. قازىر كوشەدە كەتىپ بارا جاتقان كەز كەلگەن بالانى توقتاتىپ, ءانۇراندى سۇراپ كورىڭىزشى, سايراي جونەلەدى. ءتىپتى مەملەكەتتىك ءتىلدى بىلمەيتىن بالانىڭ ءوزى ءانۇراندى جاتقا بىلەدى. بۇل جاستاردىڭ بويىندا مەملەكەتتىك رامىزدەرگە دەگەن ەرەكشە سۇيىسپەنشىلىكتىڭ, وتانشىلدىق سەزىمنىڭ تۇنىپ تۇرعانىن كورسەتەدى. مەن وسىعان قۋانامىن.
ريناد بەكتەميروۆ,
قوستاناي وبلىستىق تاتار-باشقۇرت ەتنومادەني بىرلەستىگىنىڭ توراعاسى
