ايماقتار • 03 ماۋسىم، 2020

تارازدا قوعامدىق كولىكتەر قاشاننان باستاپ جۇرەدى؟

565 رەت كورسەتىلدى

كوروناۆيرۋس ىندەتىنىڭ تارالۋىنا وراي، جامبىل وبلىسىنىڭ اۋماعىندا دا قوعامدىق كولىكتەردىڭ قىزمەتى توقتاتىلعان بولاتىن. قالاىشىلىك مارشرۋتتاردىڭ دا جۇرۋىنە شەكتەۋ قويىلدى. الايدا، جۋىردا وڭىردەگى بلوك-بەكەتتەر الىنىپ، بىرقاتار نىساننىڭ قايتا جۇمىس ىستەۋىنە رۇقسات بەرىلگەن ەدى. وسى ورايدا، جەرگىلىكتى اكىمدىككە تۇرعىندار تاراپىنان دا قوعامدىق كولىكتەردىڭ قاي كەزدەن باستاپ جۇرەتىندىگى تۋرالى ساۋالدار ءجيى ءتۇسىپ جاتىر.

بۇل ورايدا، جامبىل وبلىسىنىڭ اكىمدىگى جاقىن كۇندەرى تاراز قالاسىندا قوعامدىق كولىكتىڭ قىزمەتىن قايتا جانداندىرۋ جوسپارلانۋدا ەكەنىن مالىمدەدى. ءتيىستى شەشىمدى وبلىستىق جەدەل شتاب قابىلداعان. ول ءۇشىن تاسىمالداۋشى كومپانيالار مارشرۋتتىق اۆتوبۋستار مەن پاركتەردى قازاقستان رەسپۋبليكاسىنىڭ باس مەملەكەتتىك سانيتارلىق دارىگەرىنىڭ قاۋلىسىمەن بەلگىلەنگەن بارلىق سانيتارلىق-ەپيدەميولوگيالىق تالاپتارعا سايكەس كەلتىرۋى كەرەك. وسىدان كەيىن عانا اۆتوپاركتەر ءوز قىزمەتىن قايتا باستاۋعا رۇقسات الا الادى.

اتاپ ايتقاندا، اۆتوبۋس سالونىنا مەديتسينالىق ماسكا كيگەن جولاۋشىلار عانا كىرە الادى جانە جولاۋشىلاردىڭ اراقاشىقتىعى كەمىندە ءبىر مەتر بولۋى كەرەك. سونداي-اق، سالوننىڭ تولتىرىلۋى 50 پايىزدان اسپاۋى ءتيىس. سونىمەن قاتار، اۆتوپاركتەر اكىمشىلىگى پەرسونالعا جەكە قورعانۋ قۇرالدارىن پايدالانۋ بويىنشا نۇسقاۋ بەرۋدى، دەنە قىزۋىن ولشەۋ بويىنشا كۇندەلىكتى مەديتسينالىق تەكسەرۋدى ۇيىمداستىرۋى قاجەت. ءجىتى رەسپيراتورلىق ينفەكتسيا بەلگىلەرى بار قىزمەتكەرلەر جۇمىسقا جىبەرىلمەيدى. سونداي-اق، مارشرۋتتىڭ اياقتالۋى بويىنشا ايالداۋ كەزىندە كولىك قۇرالدارىنىڭ سالوندارىن بارىنشا جەلدەتۋ، دەزينفەكتسيالىق سۇلگىلەرمەن نەمەسە ەرىتىندىلەرىمەن تەرەزە، ەسىك تۇتقالارىن، ورىندىقتاردى جانە وزگە دە بەتتەردى ءسۇرتۋ كەرەك. اۋىسىم اياقتالعاننان كەيىن قوعامدىق كولىك مىندەتتى تۇردە دەزينفەكتسيالاۋدان ءوتۋى ءتيىس. ال، ايالداما كەشەندەرىن، اۆتوپاركتەردى وڭدەۋ كۇنىنە كەمىندە ءبىر رەت جۇرگىزىلۋى ءتيىس. ارنايى مونيتورينگتىك توپتار وسى سانيتارلىق تالاپتاردىڭ ساقتالۋىن قاداعالايدى. ەگەر اتالعان تالاپتار ورىندالعان جاعدايدا قوعامدىق كولىكتەر جۋىردا ءوز جۇمىسىن باستايدى.

 

جامبىل وبلىسى

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار