جامبىل وبلىستىق توتەنشە جاعدايلار دەپارتامەنتى ءزىلزالالار قاۋىپ-قاتەرىن ازايتۋ جانە ازاماتتىق قورعاۋ سالاسىنداعى باقىلاۋ باسقارماسى سۋداعى قايعىلى وقيعالاردىڭ نەگىزگى سەبەپتەرىنىڭ ءبىرى – جابدىقتالماعان جەرلەردە شومىلۋ بولىپ تابىلاتىنىن ەسكەرتەدى. بيىل وكىنىشكە قاراي, وبلىستا 3 ادام سۋعا كەتكەن. مالىمەت بويىنشا 2 ادام بالىق اۋلاۋ كەزىندە سۋعا كەتسە, 1 ادام شومىلۋ كەزىندە قايتىس بولعان. وبلىستاعى سۋ ايدىندارىندا ادامداردىڭ قاۋىپسىزدىگى ءۇشىن وبلىستىق توتەنشە جاعدايلار دەپارتامەنتىنىڭ قىزمەتكەرلەرى جەرگىلىكتى پوليتسيا قىزمەتىنىڭ جانە يۋۆەنالدى پوليتسيا وكىلدەرىمەن بىرلەسىپ, كۇن سايىن وبلىستىڭ سۋ ايدىندارىندا پروفيلاكتيكالىق ءىس-شارالار جۇرگىزۋدە. رەيدتىڭ ناتيجەسى كورسەتكەندەي, تىيىم سالاتىن بەلگىگە قاراماستان, جاسوسپىرىمدەر توبى جابدىقتالماعان ورىنداردا شومىلۋدا.
جاز مەزگىلىنەن باستاپ سۋ ايدىندارىندا, «تالاس», «اسا» جانە «شۋ» وزەندەرىندە ازاماتتاردىڭ رۇقسات ەتىلمەگەن سۋعا شومىلۋ ورىندارىنا 95 رەيد جۇرگىزىلگەن. جۇرگىزىلگەن رەيدتە 13 ءتارتىپ بۇزۋشىلىق انىقتالعان. ناتيجەسىندە ءتارتىپ بۇزۋشىلارعا قازاقستان رەسپۋبليكاسى اكىمشىلىك-قۇقىقبۇزۋشىلىق تۋرالى كودەكسىنىڭ 440-بابى بويىنشا 111 مىڭ 120 تەڭگەگە ايىپپۇل سالىنعان. سونداي-اق, جاز مەزگىلىندە ەڭ كوپ تارالعان قۇقىق بۇزۋشىلىقتار جابدىقتالماعان جەرلەردە شومىلۋ, سپيرتتىك ىشىمدىكتەردى ءىشۋ, وت جاعۋ, جەكە قۇتقارۋ قۇرالدارىنسىز ءجۇزۋ قۇرالدارىن پايدالانۋ ەكەن.
رەيد بارىسىندا دەمالۋشىلارمەن سۋ نىساندارىنداعى ءجۇرىس-تۇرىس ەرەجەلەرى تۋرالى ءتۇسىندىرۋ اڭگىمەلەرى جۇرگىزىلەدى جانە ازاماتتارعا سۋداعى قاۋىپسىزدىك شارالارىن ساقتاۋ قاجەتتىلىگى تۋرالى ەسكەرتۋلەر, سونداي-اق, سۋ قويمالارىنىڭ جانىندا بالالاردى قاراۋسىز قالدىرماۋعا كەڭەستەر بەرىلەدى.
جالپى, رەيدتى سۋعا ءتۇسۋ كەزەڭى اياقتالعانعا دەيىن وتكىزۋ جوسپارلانۋدا.
جامبىل وبلىسى
