ايماقتار • 03 ماۋسىم، 2020

تارازدا ءورت سوندىرۋگە اتسالىسقان ازامات ماراپاتتالدى

60 رەت كورسەتىلدى

وتكەن جەكسەنبى كۇنى ساعات 16:45 شاماسىندا تاراز قالاسىنىڭ اراي-2 ىقشاماۋدانىنداعى كوپقاباتتى تۇرعىن ۇيدەگى پاتەردىڭ بىرىنەن ءورت شىققان. وسى ۋاقىتتا اۆتوكولىگىن تۇراققا قويىپ، ۇيىنە الاڭسىز بەت العان مۇحامەد ءالي ەسىمدى ازامات ءورت شىققان پاتەردى بايقاپ قالىپ، سولاي قاراي تۇرا جۇگىرەدى.

كەلگەن بەتتە وقيعا ورىن العان پاتەردىڭ ەسىگىن اشپاق بولعاندا، تەمىر ەسىك ق ۇلىپتاۋلى بولىپ شىعادى. ودان ءارى ول قىزىل جالىنعا ورانىپ جاتقان پاتەردىڭ بالكونىنداعى ءورتتىڭ ارى قاراي كورشى پاتەرلەرگە جايىلماۋى ءۇشىن، ءورت سوندىرۋشىلەر كەلگەنشە شۇعىل تۇردە №1 جەرتولەنى اشادى. ءسويتىپ ۇزىندىعى 40 مەترلىك شلانگانى سۋعا جالعايدى. اتالعان تۇرعىن ءۇيدىڭ جاۋاپتى ازاماتى بولعاندىقتان مۇحامەد ءاليدىڭ قالتاسىندا ۇنەمى بارلىق كىلت جۇرەدى ەكەن. وسى ۋاقىتتا جارى كامشات تا جانىنان تابىلىپ، جانۇشىرا قولعابىس ەتەدى. ودان ءارى ءورت شىققان بالكوندى باعىتتاي، سۋ شاشۋعا كىرىسەدى. وسى ساتتە كورشىلەرى كەلىپ جەتىپ، ءبارى ءورتتىڭ جەدەل سونۋىنە ءوز سەپتىگىن تيگىزەدى. تۇرعىندار ءتىلسىز جاۋمەن الىسىپ جاتقاندا، وزگە كورشىلەرى ءورت شىققان كىرەبەرىستەگى وزگە تۇرعىنداردى قاۋىپسىز ورىنعا كوشىرە باستايدى. وسى ساتتە ءورت سوندىرۋشىلەر دە جەتىپ، ءتىلسىز جاۋ ساعات 17:02-دە اۋىزدىقتالىپ، تولىعىمەن جويىلادى.

كەيىننەن انىقتالعانداي، ءورت اتالعان پاتەر بالكونىنا جينالعان اۆتوكولىك دوڭعالاقتارىنان باستالعان. كەيىننەن قىزىل جالىن پاتەر ىشىنە لاپ قويعان. بۇل كەزدە ۇيدە ەشكىم بولماعان ەكەن. ابىروي بولعاندا، زارداپ شەككەندەر تىركەلمەگەن جانە قازىرگى تاڭدا ءورتتىڭ شىعۋ سەبەبى مەن شىعىنى ناقتى انىقتالۋدا. بەيبىت كۇننىڭ باتىرىنىڭ ەرلىگى ەسكەرىلىپ، جامبىل وبلىسى توتەنشە جاعدايلار دەپارتامەنتى ءورت ءسوندىرۋ قىزمەتىنىڭ باستىعى، ازاماتتىق قورعاۋ پولكوۆنيگى ەرمەك مومباەۆ مۇحامەد ءاليدى العىس حاتپەن ماراپاتتادى. وقيعا ورىن العان جاعدايداعى ازاماتتىق بەلسەندىلىگى ءۇشىن شىنايى العىسىن ءبىلدىردى.

 

جامبىل وبلىسى

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار