قولداعى مالىڭ اۋرۋ بولسا ونىڭ دەرتى ادامدارعا جۇقپاي قويمايدى. سوندىقتان قولداعى بارلىق جانۋارالاردىڭ دەنساۋلىعىن تەكسەرتىپ, ەمدەتىپ, بولۋى مۇمكىن اۋرۋلارعا قارسى ەم-دوم قولدانۋدىڭ ەشقاشان ارتىعى بولمايدى. اسىرەسە, ءبىز سياقتى مالدى كوپ وسىرەتىن اگرارلى ەلدىڭ حالقى مالدان جۇعاتىن دەرتتەرگە كوپ ۇشىرايدى. ءتىپتى دەرتتەر مالدان عانا ەمەس جالپى قولعا ۇيرەتىلگەن يت, مىسىق, قۇس سياقتى جاندىلاردان دا جۇعىپ جاتادى.
وسى ماسەلەر تۋرالى بەرىك الجانوۆپەن اڭگىمەلەسۋ بارىسىندا ءبىرشاما جايعا قاندىق. ۆەتەرينارلىق شارالار دەگەنىمىز بۇل ادامدار مەن مالداردىڭ دەنساۋلىعىن ساقتاۋ ءۇشىن جاسالاتىن شارالار كەشەنى. ونى ءبىز كوكتەمدىك جانە كۇزدىك دەپ ەكى كەزەڭگە ءبولىپ جاسايمىز. كوكتەمدىك شارالار ناۋرىز بەن ماۋسىم ارالىعىندا, ال كۇزدىك شارالار قىركۇيەكتەن قاراشا ايىنا دەيىن جاسالادى. وسى شارالاردىڭ بارىسىندا ءبىز مالدارعا ۆاكتسيناتسيا ەگۋمەن قاتار تۋبەركۋلەز, برۋتسەللوز جانە لەيكوز سياقتى دەرتتەردىڭ بارىن انىقتاۋ ءۇشىن قان الامىز, دەدى مامان. بۇل ءۇشىن ەپيزووتيكالىق مونيتورينگتىڭ دەرەكتەرىنىڭ نەگىزىندە ۆەتەرينارلىق شارالاردى جاساۋدىڭ جوسپارى جاسالادى. ونى جاساۋ بارىسىندا مالدىڭ سانى, پرەپاراتتاردىڭ نەشە رەت قولدانىلعانى سياقتى تولىپ جاتقان دەرەكتەرگە ءمان بەرىلەتىن كورىنەدى. تەكسەرىس مالدىڭ كىمنىڭ مەنشىگىندە ەكەنىنە قاراماي جاپپاي جاسالاتىن كورىنەدى.
سولتۇستىك قازاقستان وبلىسىندا وسى جۇمىستاردى اتقاراتىن مال دارىگەرلەرىنىڭ سانى – 292 ادام. بيىل ۆەتەرينارلىق شارالار قىستىڭ جىلىمىق بولۋىنا بايلانىستى اقپان ايىنان باستالىپتى. سونىڭ ىشىندە سۋ باسۋى مۇمكىن ايماقتارعا الدىمەن جۇرگىزىلگەن. ەگەر مالدىڭ بويىنان الەۋمەتتىك ماڭىزى بار, جوعارىدا اتالعان تۋبەركۋلەز, برۋتسەللوز سياقتى دەرتتەر انىقتالسا ونداي مالداردى 15 كۇننىڭ ىشىندە جويۋ مىندەتتەلەدى.
بۇگىنگى تاڭدا 2020 جىلعا بەلگىلەنگەن جوسپارداعى جۇمىستاردىڭ 95 پايىزى ورىندالدى, دەدى بەرىك ءالجانوۆ. تەكسەرىس بارىسىندا وبلىس بويىنشا 312 قارا مالدىڭ, 1 قويدىڭ بويىنان برۋتسەللەز جانە 3 سيىردان تۋبەركۋلەز انىقتالعان. ولاردىڭ ءبارى سويىلعان. دەگەنمەن, بيىل وسىنداي دەرتتەردىڭ بىلتىرعى جىلمەن سالىستىرعاندا ازايعانى بىلىنگەن. بۇل ۆاكتسينانى ۋاقىتىندا سالىپ, ەم-دوم جۇمىستارىنىڭ دەر كەزىندە جۇرگىزىلگەندىگىنىڭ ناتيجەسى.
قازىر وبلىس بويىنشا ۆەتەرينارلىق شارالاردىڭ وتكىزۋگە قولبايلاۋ بولاتىن ەشقانداي كەدەرگى جوق. دياگنوستيكالىق ورتالىقتار قالىپتى جۇمىس ىستەۋدە, ۆەتەرينارلىق پرەپاراتتاردىڭ تاپشىلىعى ەڭسەرىلگەن. بىراق كەيبىرىنىڭ ساپاسى تومەن بولىپ كەلەتىنى راس. سونىمەن بىرگە پرەپاراتتاردىڭ ساقتايتىن ورىندار قاجەتتى قۇرالدارمەن قامتاماسىز ەتىلگەن.
ارينە, بيىلعى پاندەميانىڭ ىلاڭى ۆەتەرينارلىق جۇمىستاردى جۇرگىزۋگە دە كەدەرگى بولعان. سونىڭ ىشىندە مال دارىگەرلەرىنىڭ ءجۇرىس-تۇرىسىنا شەكتەۋ قويىلعان. كەيبىر مال يەلەرى دە كورونوۆيرۋستى سىلتاۋراتىپ ولاردى قورالارىنا كىرگىزۋدەن باس تارتقان. وندايلاردىڭ بارىنە جەرگىلىكتى اكىمدىك قىزمەتكەرلەرىمەن بىرلەسە وتىرىپ ءتۇسىندىرۋ جۇمىستارى جۇرگىزىلگەن.
ال ۆەترينارلىق قىزمەتكەرلەر قاجەتتى قاۋىپسىزدىك شارالارىن ساقتاپ, وزدەرىمەن بىرگە مىندەتتى تۇردە بەتپەردە, انتيسەپتيك, قولعاپ, ارناۋلى كيىم الىپ جۇرگەن. ال ۆەتەرينارلىق شارالاردى جاساۋعا كەدەرگى كەلتىرگەن ادامدارعا قولدانىستاعى زاڭناماعا سايكەس 5 اەك مولشەرىندە ايىپپۇل سالىنادى. بىراق شارالار وزدەرى ءۇشىن ەكەنىن بىلگەن ادامدار اراسىنان كەدەرگى كەلتىرۋلەر بولماعان.
سولتۇستىك قازاقستان وبلىسى
