ايماقتار • 03 ماۋسىم، 2020

قاراعاندى وبلىسى: سپورت سالاسىندا – قارقىندى قۇرىلىس

203 رەت كورسەتىلدى

بيىلعى جىل قاراعاندى وبلىسىنداعى دەنە شىنىقتىرۋ جانە سپورت سالاسى ءۇشىن قاۋىرت شارۋا، قارىمدى جوبالارعا تولى بولعالى تۇر. مۇنىڭ مەملەكەت باسشىسى قاسىم-جومارت توقاەۆتىڭ ەلىمىزدە بۇقارالىق سپورتتى دامىتۋ جونىندەگى تاپسىرمالارىنان تۋىنداعان مىندەتتەرمەن تىكەلەي ۇندەسىپ وتىرعانىن ايتا كەتكەن ءلازىم.

وسى ورايدا، قاراعاندى وبلىسىندا شالعايداعى بىرنەشە اۋداندا جەرگىلىكتى تۇرعىنداردىڭ سالاماتتى ءومىر سالتىن  ۇستانۋىنا تىكەلەي ىقپال ەتەتىن دەنە شىنىقتىرۋ-ساۋىقتىرۋ كەشەندەرىنىڭ (دشسك) قۇرىلىس ەكپىندى تۇردە جۇرگىزىلىپ جاتىر.  مىسالى، وبلىستىق بيۋدجەت قاراجاتى ەسەبىنەن قارقارالى قالاسىندا 320 ورىندىق دشسك قۇرىلىسى باستالادى. وسى اۋداننىڭ ەگىندىبۇلاق كەنتىندە ءدال وسىنداي  كەشەننىڭ جوبالاۋ-سمەتالىق قۇجاتتامالارى ازىرلەنىپ جاتىر.

«اۋىل – ەل بەسىگى» باعدارلاماسى اياسىندا بۇقار جىراۋ اۋدانىنداعى بوتاقارا كەنتىندە 320 ورىندىق كەشەننىڭ قۇرىلىسى بيىل سالىنىپ، اقسۋ-ايۋلى سەلوسىندا سپورت مەكتەبى عيماراتىنىڭ قاسبەتى جوندەلدى.

2020 جىلعا ارنالعان «ەڭبەكپەن قامتۋدىڭ جول كارتاسى» بويىنشا رەسپۋبليكالىق بيۋدجەت ەسەبىنەن سەگىز سپورتتىق نىساننىڭ قۇرىلىسى باستالادى. مۇنىڭ ىشىندە اتاسۋ جانە نۇرا كەنتتەرىندەگى ءجۇزۋ باسسەيندەرى بار. سونداي-اق، قارساقباي اۋىلىندا 100 ورىندىق، ۇلىتاۋ اۋدانىنىڭ جەزدى كەنتىندە جانە اقتاس ەلدى مەكەنىندە 160 ورىندىق سپورتتىق ساۋىقتىرۋ كەشەندەرى سالىناتىن بولادى.

قاراعاندى سىندى ءىرى قالادا ءبىر يپپودرومنىڭ جوقتىعى كوپتەن بەرى ايتىلىپ كەلە جاتقان تۇيتكىلدى ماسەلەنىڭ ءبىرى ەدى. بيىل ونىڭ دا شەشىمى تابىلعانداي. بۇگىنگى كۇندە اتشابارعا ارنالعان 50 گەكتار جەر تەلىمىن راسىمدەۋ بويىنشا جۇمىستار ءجۇرىپ جاتىر. سونىمەن قاتار، وبلىس ورتالىعىندا بۇقارا حالىققا قاجەتتى بۇدان باسقا دا بىرقاتار سپورت نىساندارى بوي كوتەرمەكشى. مىسالى، قازىرگى ۋاقىتتا قۇرىلىسىنىڭ اياقتالۋى كەلەسى جىلعا دەپ  جوسپارلانعان ءۇش مىڭ ادام سىياتىن فۋتبول مانەجى مەن كۇرەس ورتالىعىنىڭ جوبالاۋ-سمەتالىق قۇجاتتامالارىنا تۇزەتۋلەر ەنگىزىلۋدە. ال كەنشىلەر استاناسىنداعى 50 مەترلىك ءجۇزۋ باسسەينىنىڭ قۇرىلىسىنا بيۋدجەتتەن 1 ملرد تەڭگە بولىنگەن.

1

قازىرگى ۋاقىتتا «شاحتەر» ستاديونىندا كۇردەلى جوندەۋ جۇمىستارى قىزۋ ءجۇرىپ جاتىر. ستاديوندا تريبۋناداعى ورىندىقتار اۋىستىرىلىپ، عيماراتتىڭ قاسبەتى ارلەندىرىلەدى. سونداي-اق، سپورت نىسانىنىڭ ىشىندەگى  شەشىنەتىن ورىندار، جۋىناتىن بولمەلەر جوندەۋدەن وتكىزىلەدى. بۇدان باسقا، ستاديوندا استىنان جىلىتىلاتىن جانە اۆتوماتتى سۋارۋ جۇيەسىمەن قامتاماسىز ەتىلەتىن كوگال توسەلەدى. ياعني، جۇمىس تولىق اياقتالعان سوڭ، فۋتبول الاڭى ءتورتىنشى ساناتقا ساي جانە قازاقستان فۋتبول فەدەراتسياسى مەن ۋەفا تالاپتارىنا سايكەس كەلەتىن بولادى.

وبلىستاعى ەكىنشى ءىرى قالا جەزقازعاندا ەسكەك ەسۋ سپورتى جونىندەگى سپورت مەكتەبىنىڭ ەسۋ بازاسىنىڭ دا جوبالاۋ-سمەتالىق قۇجاتتامالارى جاسالىپ، ساراپتامانىڭ وڭ قورىتىندىسى الىندى. نىساندى 2022 جىلى پايدالانۋعا بەرۋ جوسپارلانعان.

سپورتتاعى قۇرىلىسقا دەمەۋشىلەر دە دەن قويا باستادى. مىسالى، جەكە كاسىپكەرلەردىڭ ەسەبىنەن تەمىرتاۋ قالاسىندا دەنە شىنىقتىرۋ-ساۋىقتىرۋ كەشەنى، پريشاحتينسك ەلدى مەكەنىندە سپورتتىق ساۋىقتىرۋ كەشەنى، تەننيس ورتالىعى، ۇستەل تەننيسى ورتالىعى، ترياتلون-پارك سالىنىپ جاتىر.

وبلىستا بيىل بىرنەشە باسسەيننىڭ قۇرىلىسى باستالدى. اتاپ ايتار بولساق، شاحتينسك قالاسىندا، جاڭاارقا اۋدانىنداعى اتاسۋ كەنتىندە جانە نۇرا اۋدانىنداعى نۇرا كەنتىندە ءجۇزۋ باسسەيندەرىنىڭ قۇرىلىسى باستالىپ كەتتى.

9

قاراعاندى وبلىستىق دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلاەۆ بيىلعى جازدا قاراعاندىداعى تەننيس ورتالىعى، قارقارالى مەن تەمىرتاۋداعى دەنە شىنىقتىرۋ-ساۋىقتىرۋ كەشەندەرى پايدالانۋعا بەرىلەتىنىن ايتادى. ال جىلدىڭ سوڭىنا تامان جاڭاارقا اۋدانىنىڭ اتاسۋ كەنتىندەگى جاتتىعۋ زالى بار جابىق ءجۇزۋ باسسەينىنىڭ، قارساقباي كەنتىندەگى 100 ورىندىق دەنە شىنىقتىرۋ-ساۋىقتىرۋ كەشەنىنىڭ قۇرىلىسى اياقتالماقشى.

بۇگىنگى كۇندە اتالعان باسقارما تاراپىنان قۇرىلىس جۇمىستارىمەن اينالىسىپ جاتقان مەردىگەرلەرگە قويىلاتىن تالاپ كۇشەيگەن. ء«بىز ءۇشىن قۇرىلىستىڭ ساپالى جۇرگىزىلىگەنى وتە ماڭىزدى. سول سەبەپتى، ءدال قازىرگى ۋاقىتتا اۋقىمدى تۇردە ءجۇرىپ جاتقان جۇمىستاردىڭ بارىسىن ءجىتى نازاردا ۇستايتىن بولامىز»، دەيدى تەمىرحان ابىلاەۆ.

اتاپ وتەرلىك ءبىر جايت، بيىل وبلىستاعى سپورت نىساندارىن جوندەۋگە باسا ءمان بەرىلدى. ياعني، جول كارتاسى بويىنشا 14 جوبانى جۇزەگە اسىرۋ جوسپارلانعان. مىسالى، وبلىس ورتالىعىنداعى قىسقى سپورت تۇرلەرى مەكتەبىنىڭ شاڭعى بازاسى مەن روليكودرومى جوندەۋدەن وتكىزىلمەكشى. «قاراعاندى-ارەنا» مۇز سارايىنىڭ سۋ باسپالداقتارى مەن شاتىرى جوندەلەدى. ون ەكى سپورت مەكتەبىندە، ونىڭ ىشىندە جەزقازعان، ساران جانە تەمىرتاۋ قالالارىنداعى مەكتەپتەرىنىڭ عيماراتتارىندا، فۋتبول الاڭدارىن، توبەلەرىن، جۇگىرۋ جولدارىن، كيىم شەشەتىن جانە جۋىناتىن ورىنداردى، جىلىتۋ، ينجەنەرلىك جانە سۋ قۇبىرى جەلىلەرىن، پاندۋستاردى جوندەۋ سياقتى تاعى باسقا دا كوپتەگەن جۇمىستار اتقارىلماقشى. مۇنداي جۇمىستار ءاليا مولداعۇلوۆا اتىنداعى سپورتقا بەيىم، دارىندى بالالارعا ارنالعان وبلىستىق مەكتەپ-ينتەرنات-كوللەدجدىڭ تەمىرتاۋداعى فيليالىنىڭ كوپتەن بەرى جوندەۋ كورمەگەن جاتاقحاناسىندا دا جالعاسىن تاپقان.

سونداي-اق، «ەسكەك ەسۋ بويىنشا تەمىرتاۋ مبجورم» كمم جاتتىعۋ زالىنا، فۋتبول الاڭىنا جانە باسقا دا نىساندارىنا جوندەۋ جۇرگىزۋمەن قوسا جوبادا جەرگىلىكتى سۋ توعانىنداعى دايىندىق بازاسىن رەتكە كەلتىرۋ دە كوزدەلگەن. مۇندا جوندەۋمەن بىرگە جاعالاۋ جەلىلەرىن رەكونسترۋكتسيالاۋ دا قوسا اتقارىلادى، مۇنى جاتتىقتىرۋشىلار مەن سپورتشىلار تالاي جىلدان بەرى كۇتكەن بولاتىن. ⠀ «سپورت سالاسىنداعى قولعا الىنعان جوبالاردىڭ جۇزەگە اسۋى وبلىس باسشىلىعىنىڭ تىكەلەي نازارىندا. سول سەبەپتى، جاۋاپكەرشىلىكتىڭ جۇگىن سەزىنە وتىرىپ، ورتاق ءىستىڭ مۇددەسى ءۇشىن جەرگىلىكتى اكىمدىكتەرمەن، مەردىگەرلەرمەن تىعىز قارىم-قاتىناستا جۇمىس ىستەۋگە تۋرا كەلەدى»، دەيدى قاراعاندى وبلىستىق دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلاەۆ.

سوڭعى جاڭالىقتار

جەزقازعاندا دارىگەر جەتىسپەيدى

ايماقتار • بۇگىن، 16:22

اقش COVID-19 ۆاكتسيناسىن سىناپ كوردى

كوروناۆيرۋس • بۇگىن، 15:40

اككۋمۋلياتور ۇرلىعى اشىلدى

ايماقتار • بۇگىن، 11:09

بار مەن جوقتىڭ اراسى...

ايماقتار • بۇگىن، 07:55

قامشى فيلوسوفياسى

رۋحانيات • بۇگىن، 07:49

«ءبىز ونلاين كانيكۋلدا...»

ايماقتار • بۇگىن، 07:43

ەۋروكۋبوككە قاتىسادى

فۋتبول • بۇگىن، 07:30

بيىلعى ماۋسىمنان شەت قالا ما؟

حوككەي • بۇگىن، 07:28

ۇقساس جاڭالىقتار