قوعام • 03 ماۋسىم، 2020

ءتاستۇيىن

11 رەت كورسەتىلدى

ەلىمىزدەگى وڭدەۋ ونەركاسىبىنىڭ قۋاتتى سالاسى «اگروماشحولدينگKZ» جانە «سارىارقااۆتوپروم» ماشينا جاساۋ زاۋىتتارىنا ۇكىمەت باسشىلارى، مينيسترلەر، شەتەلدىك قوناقتار ءجيى ات باسىن بۇرادى. سوندا زاۋىت باسشىلارى – ەر ازاماتتاردىڭ اراسىندا قازاقتىڭ ءتاستۇيىن، الماستاي وتكىر قارا قىزى جۇرەدى. جانە دە زاۋىت جاعدايىن، شىعارعان ونىمدەرى مەن ەكونوميكالىق ماسەلەلەر جونىندە كوبىنە سول قىز ايتىپ بەرەدى.

اۋىل شارۋاشىلىعى تەحني­كالارىنىڭ تيىمدىلىگى، ارتىق­شى­­لىعى، قۇراستىرىلاتىن ما­شي­نالار جۇمىسىنىڭ جەرگى­لىك­­­تەن­دى­رىلۋ كولەمىن ۇلعايتۋ، قو­سال­­­قى بولشەكتەرىنىڭ سەرۆيسىن ۇيىم­­داستىرۋ دەيسىز بە، مالىمەتتىڭ بار­لىعىن جۇيە-جۇيەسىمەن جايىپ سالادى. وزىنە وتە سەنىمدى ءارى اڭگى­مە­لە­سىپ تۇرعان ادامداردى ءۇيىرىپ، اۋىزىنا قاراتادى. مۇنداي كەزدە «اگروماشحولدينگKZ» اكتسيو­نەرلىك قوعامىنىڭ ۆيتسە-پرەزي­دەنتى دينارا شۇكىجانوۆانىڭ مالى­مەتتەرىن ايىزى قانىپ تىڭ­دا­عان دەلەگاتسيا مۇشەلەرى دە، انتالاپ اقپارات اڭدىعان جۋرناليستەر دە ىلعي ەر ازاماتتاردىڭ اراسىنداعى جالعىز ايەلدىڭ تەحنيكا جاعدايىن سونشالىقتى جاقسى بىلەتىنىنە، ونىڭ تەحنيكا شىعاراتىن زاۋىت باس­شى­لىعىندا جۇرگەنىنە تاڭ­دا­نىپ تا قالار ەدى. ءىرى ءوندىرىستىڭ نا­رىق­تاعى كەمەسىن باعىتتاپ وتىرۋ، قايراڭداپ قالماۋىن الدىن الا ويلاستىرۋ دا وڭاي شارۋا ەمەس. قا­عىلەز قىز زاۋىتپەن ارىپتەس بولۋدى ويلاعان شەتەلدىك ءىرى كومپانيالارمەن كەلىسىمدەر جاساۋدا دا ۇتىمدى قادامدار جاساپ كەلەدى.

نەگىزى ادام مىنەزى جۇرە كەلە وزگەرمەيدى، ول تۋا بىتەدى. دينارا امان­جولقىزىن بىلەتىندەر وسى ويعا توقتايدى. ول بالا كەزىنەن شي­راق بولدى. مەكتەپتى «التىن بەلگىمەن»، ا.بايتۇرسىنوۆ اتىن­داعى قوستاناي مەملەكەتتىك ۋني­ۆەر­سي­تەتىن جانە حالىقارالىق بيزنەس ۋنيۆەرسيتەتىن «قىزىل ديپلوممەن» ءبىتىردى. قوستاناي ۋنيۆەرسيتەتىن بىتىرگەن سوڭ، «نۇر وتان» پارتياسى وب­لىستىق فيليالىنىڭ سوكولوۆ-سا­رىباي كەن ءوندىرۋ بىرلەستىگى اۋدان­دىق ۇيىمىندا ماركەتينگ ءبولى­مىنىڭ مامانى قىزمەتىنەن باس­تا­­دى. از ۋاقىت بولسا دا قوستاناي قا­­لا­لىق اكىمدىگىندە باس مامان بولىپ ىستەپ، تاجىريبە جينا­دى، ىسىلدى. امەريكا قۇراما شتات­تا­رىنا بارعان ساپارىنان سوڭ، دينارا ءوزىن كاسىپكەرلىكتەن كورگىسى كەل­دى. «اگروماشحولدينگKZ» اك­تسيو­­نەرلىك قوعامىنا ءباسپاسوز حات­شىسى بولىپ كەلگەندە، دينا­را­نىڭ ۋنيۆەرسيتەتتى بىتىر­گەنىنە ەكى جىل عانا بولعان ەدى. سول ەكى جىلدىڭ وزىندە جاس قىز تالماي ىزدەنۋمەن بولدى. ول قانداي جۇ­مىس­تا بولسا دا وعان اسا كوڭىلى تۇ­راق­­تامايتىن، ءوزىنىڭ مۇمكىندىگىن تولىق پايدالانباعانداي، ورنىن تاپپاعانداي سەزىم بيلەيتىن. ال ماشينا جاساۋ زاۋىتىنداعى جاڭا قىزمەتكە ول قۇلشىنا كىرىستى، ءوزىنىڭ بۇل جۇمىستى الىپ كەتە الاتىنىنا تولىق سەندى. اڭگىمە بۇقارالىق اقپارات قۇرالدارىمەن جۇمىستا ەمەس، تۇپكى ماقسات، قىزمەتتىڭ ماز­مۇنى جاڭا كاسىپورىننىڭ جۇ­مى­سىن جولعا قويۋ، ءونىمىنىڭ ساپاسىن كوپشىلىككە تاراتۋ، وتكىزۋ بولاتىن. بىزگە نارىقتىڭ سوڭىن الا كەلگەن ماركەتينگ ماماندىعىنىڭ قىر-سىرى ديناراعا ءمالىم، ول مۇنى كەز كەلگەن وڭدەۋ كاسىپورنىنىڭ بولاشاعىمەن بايلانىستىراتىن.

دەگەنمەن وعان العاشقىدا بار­­لى­عى دا وڭاي بولدى دەسەك، ار­تىق­تاۋ كەتەرمىز، ءسىرا. دينارا كەلگەن­دە «اگروماشحولدينگKZ» زاۋى­تى كومباين قۇراستىرۋدى ەندى باس­تا­عان ەدى. زاۋىت پرەزيدەنتى ونى تسەحقا اكەلدى دە، «سەن الدىمەن بۇل جەر­دەن نە شىعاتىنىن، ول قالاي وندى­رىلەتىنىن ءبىلۋىڭ كەرەك. مىنە، مەحانيكالىق تسەح، كومباين دا، تۇقىم سەپ­كىش تە، گال­ۆانيكا دا – ءبارى وسىن­دا. وسىلاردىڭ ءار تەتى­گىن ءبىلۋىڭ كەرەك، ساعان ءبىر اپتا ۋا­قىت بەرەمىن» دەدى دە كە­تىپ قال­­دى. م­ا­­شي­نا جا­­ساۋ تەك قوس­­­تاناي ءۇش­ىن عانا ەمەس، جالپى ەلى­مىز ەكو­­نو­مي­كا­­سىن­دا­­عى جاڭا سالا. اۋىل شار­ۋا­­­ش­ىلىعى تەح­ني­­­كا­لا­­رى­­نىڭ ءار تەتىگىن ءبىلۋ ءۇشىن مەحانيكتەر مەن ين­­جە­نەرلەر 4-5 جىل با­سىن قاتىرىپ وقىماي ما؟ پرەزيدەنت بولسا وعان ءبىر اپتا ۋاقىت بەر­دى. ءجۇزۋ بىل­مەيتىن ادامدى تە­ڭىز­گە لاقتىرىپ جى­بەرگەندەي كۇي كەشتى، زاۋىت باس­شى­سىنىڭ ارتىنان سوس­­­­تيىپ قاراپ تۇرىپ قالدى. بىراق بويىن تەز جيناپ الدى، «قايتسەم دە وسى تسەحتان ءبارىن دە ءبىلىپ شىعامىن» دەگەن وزىنە ىشتەي ءتاستۇيىن ءسوزىن دە بەرىپ ۇلگەردى.

ارينە وعان وڭاي بولعان جوق، تسەح­تاعى ءبىر مامان تۇسىندىرسە، ەكىن­­شىسى «باسىمدى قاتىرما» دەپ قۋىپ جىبەردى. ەكى اپتا شاما­سىن­دا «ەمتيحان» تاپسىردى. ءدال ينجەنەردەي بولماسا دا، شامالاپتى، مەحانيكالىق تسەحتاعى قۇراس­تىرىلىپ جاتقان اۋىل شار­ۋا­­شى­لى­عى تەحنيكالارىنىڭ تەتىك­تە­رىن جاتقا سوقتى. كوز مايىن تا­ۋىس­قان ەڭبەگى جانعانداي بولدى، بى­راق...

– مەن مامان رەتىندە كاسىپو­رىن­عا قاجەتتىگىمدى باسشىلارعا دا­لەل­­دەۋ ءۇشىن ءبىر جىلداي ۋاقىت كەرەك بولدى. سەبەبى ول كەزدە ءباسپا­سوز حاتشىسى دەگەن قىزمەتتىڭ ءىرى وندىرىستەرگە ەندى ەنىپ جاتقان كەزى، كوبىنە تۇسىنىكسىز بولعان شى­عار. ەكىنشىدەن، باسشىلىقتاعى ەر كىسىلەر ماعان بىلىكتى مامان رە­تىندە ەمەس، ايەل دەپ قارادى. تەح­ني­كا جۇرگەن جەردە ايەل ەمەس، ەر ادام ءجۇرۋى ءتيىس دەگەن قاتىپ قال­عان تۇسىنىك شەڭبەرىنەن ولار دا ۋاقتىلى شىعا المادى، – دەيدى دينارا امانجولقىزى. ءبىر ءىستى قولىنا السا، اياعىنا دەيىن جەت­كىز­بەي قويمايتىن تابان­دى­لى­عى دينارانى تەك جەڭىس جولىنا جە­تە­لەدى. ول ماشينا جاساۋ ىسىن­دەگى باسشىلارمەن، ماماندار­مەن ءتۇسى­نىسۋ، جۇمىس قارىم-قاتىناسى ما­دەنيەتىن جولعا قويۋ ءۇشىن ۋا­قى­تى­نىڭ باسىم بولىگىن سارت-سۇرت ەتىپ جاتاتىن تسەحتاردا وتكىزدى.

زاۋىت بىردەن بۇگىنگى قالىپقا كەلگەن جوق. قيىندىقتاردىڭ بارلىعىنان دا ءوتتى. ءتىپتى العا باسا الماي، كەيىن شەگىنۋگە جول قالماي، اڭتارىلعان كەز دە بولماي قالعان جوق. زاۋىت باسشىلارى كىمنىڭ كىم ەكەنىن وسىنداي ساتتەردە تانىدى. كرەاتيۆتىك باستامالاردى ءجيى كوتەرەتىن ديناراعا كاسىپورىننىڭ كادر ءبولىمى سەنىپ تاپسىرىلدى. ول الدىمەن كاسىپورىندا ءوزىنىڭ كومانداسىن قۇردى. «جالعىز اعاش ورمان ەمەس»، قانشا بىلىكتى بولسا دا ءبىر ادام ەشتەڭە دە شەشە المايدى.

– مەن كوماندامدى جيناعاندا كوپ ويلاندىم. ماعان ءبىرازى مامانداردى ورتالىقتان شاقىرۋدى ۇس­ىندى. بىراق ولار ءبىزدىڭ ءالى قار­جىسى جوق كومپانيا ءۇشىن قىم­باتقا تۇسەتىن ەدى. سوندىقتان مەن كومانداما ءوزىم سياقتى بۇل سا­لانىڭ مامانى ەمەس، بىراق ءوز بە­تىنشە وقۋدان جالىقپايتىن، وزىنە وتە جاۋاپتى، الدىنا ماقسات قويا الاتىن ادامداردى جينادىم. ءبىزدىڭ كوماندانىڭ وندىرىستەن شىقپاي، وسىندا تۇنەگەن ساتتەرىمىز جەتەرلىك. ماماندار جيناعاندا ولاردى تاڭداۋدان قاتەلەسپەپپىن، نەگىزى ادام تانيتىن قابىلەتىم بار. ءوزىمنىڭ تاڭداعان كومانداممەن جەتى جىلدان بەرى جۇبىمىز جازىلماي بىرگە كەلەمىز، – دەيدى دينارا.

 بىلىكتى ماماندار جەتىسپەيتىن كاسىپورىن قانداي ءونىم شىعارىپ، ۋاقىتقا ىلەسە الۋشى ەدى؟ ول كەزدە جاڭا سالاعا ەڭبەك نارىعىنان دايىن ينجەنەر-ماماندار تابۋ شومەلەدەن ينە ىزدەۋمەن بىردەي بولاتىن. سوندىقتان دينارا باستاعان كوماندا كورپوراتيۆتىك ۋنيۆەرسيتەت قۇرۋ كەرەكتىگىن كوتەردى. ونىڭ سىرتىندا تەحنيكالاردى قۇراستىرۋ ءىسىن جەرگىلىكتەندىرەتىن، ياعني ولار­دى بويايتىن، دانەكەرلەيتىن، ۇساق جۇمىستارىن اتقاراتىن 500 بىلىكتى مامان-جۇمىسشىنى تابۋدى ماقسات ەتىپ قويدى. كوشەدەن كىم كورىنگەندى تاعى الۋعا بولماي­دى. ءىرى كاسىپورىندارداعى جۇ­مىس­­شىلارمەن اڭگىمە جۇرگىزدى، ۋك­رايناعا بارىپ، بانكروت بولعان زاۋىتتاردىڭ جۇمىسشىلارىن شاقىرۋ ءۇشىن «كىمگە جۇمىس كەرەك؟» دەپ، پلاكات ۇستاپ تۇرعان كەزدەرى دە بولدى.

– جيناعان جۇمىسشىلاردى «ۋاز»، «اۆتوۆاز» سياقتى رە­سەي­دىڭ ءىرى زاۋىتتارىندا ءبىر قاي­تارا وقىتىپ الدىق. جۇمىس­شى­لارىم زاۋىتتا وقۋدا بولعاندا، مەن سول زاۋىتتىڭ باسقا تسەحتا­رىن ارالاپ كەتەمىن دە، مامان جۇمىسشىلارىن بىرتىندەپ قوس­تا­ناي­عا جۇمىسقا شاقىردىم، وسىنداي قۋلىققا دا باردىق، – دەيدى دينارا وتكەن كۇندەردى ەسكە الىپ. از جىلدا-اق قۇراستىرعان اۋىل شارۋاشىلىعى تەحنيكالارى ەلىمىزدىڭ ديقاندارىن قامتاماسىز ەتكەن «اگروماشحولدينگKZ» زاۋىتى جۇمىسىنىڭ جاندانۋىنا دينارا كومانداسىنىڭ قوسقان ۇلەسى از ەمەس. ىلعي كرەاتيۆتى ويلايتىن جاستار وزدەرى جاساعان ءار قادامى زاۋىتقا تەك پايدا كەلتىرۋى كەرەك دەگەن ۇستانىممەن جۇمىس ىستەيدى.

– سىرتتان مامان شاقىرۋ وتە قىمبات. ءبىز ءوزىمىزدىڭ كادر­لار­دى ءوسىرۋدى ماقسات ەتەمىز. سىرت­تان كەلگەن ءبىر ادامعا قارجى شاش­قانشا، ءوزىمىزدىڭ ون مامانعا تولە­گەنىم ارتىق. مىسالى، ءبىزدىڭ زەر­گەر دەڭگەيىندەگى كەرەمەت دانە­كەر­لەۋ­شىلەرىمىز بار، سولار ءوزىمىزدىڭ جۇمىسشىلاردى ۇيرەتەدى، ولارعا ساراڭسىماي، ۇستەمەاقى تولەپ وتىرامىز. جۇمىستى ۇيىمداستىرا بىلسەڭ بىلىكتى ماماندار ءوز ارامىزدان شىعادى. سىرتتىڭ جىلتى­را­عىنا قىزىعۋ – وسالدىق، ويتكەنى ول ساعان قارجىعا، قىمباتقا تۇسەدى، ءوز سورپاڭا پىسكەندەي قايدان بول­­­سىن. ال جۇمىسقا بار ىنتاسىن سالمايتىن، السىزدەرمەن ءبىز جىل­­دام قوشتاسامىز، ءبىر كۇن دە ۇستا­ماي­مىز، – دەيدى دينارا تاق-تاق سويلەيتىن ادەتىمەن.

2016 جىلى دينارا شۇكىجانوۆا 32 جاسىندا «اگروماشحولدينگKZ» اكتسيونەرلىك قوعامى باسقارماسىنىڭ دامۋ جونىندەگى ديرەكتورى، ودان كوپ ۋاقىت وتپەي-اق ءبىرىنشى ۆيتسە-پرەزيدەنت لاۋازىمىنا كوتەرىلدى. بۇگىندە قارشىعا مىنەز قىز تۇتاس كومپانيا قامىن ويلايدى، جۇ­مىس­شىلارعا جاعداي جاساۋى، زاۋىت­تىڭ ءونىمى نارىقتى بيلەۋى ءۇشىن جا­ۋاپتى جۇمىستار اتقارادى. دينا­را جاۋاپكەرشىلىكتى باستى ورىن­عا قويادى. كەز كەلگەن باسشىدا جا­ۋاپ­­كەرشىلىك بولعاندا ول الدىمەن ىزدەنەدى، وقيدى، تاجىري­بەسىن مو­لاي­تادى، بىلىكتىلىگىن شي­را­تادى جانە جۇمىسشىلارعا قامقور­لىق­پەن قارايدى. «جۇمىس­شىلارعا قالاي جاعداي جاساساڭ – ولاردان قاي­تارىم دا ءدال سولاي بولادى». باسشى دينارانىڭ ۇستانىمى بۇل. جاۋاپكەرشىلىك بار جەردە ار-ۇيات تا، قىزمەتتەگى تازالىق تا بار. ەلدى، جەردى ءسۇيۋدىڭ دە ءتۇپ نەگى­زى جاۋاپكەرشىلىكتە جاتىر. «وتان­دى ءسۇيۋ – يماننان» دەگەن ءسوزدىڭ تور­كى­نى دە وسى بولسا كەرەك.

ەلىمىز ەكونوميكاسىنداعى ەڭ ءبىر تۇتقالى ماشينا جاساۋ سالاسىنىڭ دامۋىنا وسىلاي تەر توگىپ جۇرگەن دينارانىڭ سۇتتەي ۇيىعان وتباسى بار، جولداسى ونىڭ تالابىن قولداپ، ارقاشان كومەگىن ايامايدى، قىزعالداقتاي قىزى ءوسىپ كەلەدى. ء«ۇي سالسام، ەسىكتىڭ الدىنا جيدەك ەگىپ، تاڭقۋراي تەرسەم» دەگەن وي دا جۇمىس اراسىندا ءجيى ەسىنە تۇسەدى. وتباسىنىڭ بەرەكەسىن ويلاعان، ءوزى قازىعىنا اينالعان ءار ايەلدىڭ ارمانى دا بۇل. ول دوستارىنا «قو­لىم­نان كەلمەيتىندى ارماندامايمىن» دەپ ازىلدەيدى. دينارانىڭ تۇلعاسى بولار ەلدىڭ جاستارى ۇلگى تۇتار بەتپەردە دەرلىك. ونىڭ ەسىمىن «قازاقستاننىڭ 100 جاڭا ەسىمى» قاتا­رىنان كورگەندە وسىنداي وي تۇي­دىك.

 

 

قوستاناي

 

سوڭعى جاڭالىقتار

ماڭگىلىك مۇرا تاعىلىمى

اباي • بۇگىن، 10:01

قحل كەستەسى جاريالاندى

حوككەي • بۇگىن، 08:16

تايجان مۇراسى توزبايدى

رۋحانيات • بۇگىن، 08:15

95 جاسىندا كۋالىك الدى

وقيعا • بۇگىن، 08:11

جەمقورلار اللەياسى كەرەك پە؟

ساياسات • بۇگىن، 08:03

ەكپەنى وزدەرىنە سالدىردى

قوعام • بۇگىن، 08:00

پاندەميا كەزىندەگى پەرزەنتحانا

مەديتسينا • بۇگىن، 07:57

جاڭا ماۋسىمداعى وزگەرىستەر

فۋتبول • بۇگىن، 07:37

قاتەرلى ماۋسىم

الەم • بۇگىن، 07:26

ۇزدىك 8 كوماندا انىقتالدى

فۋتبول • بۇگىن، 07:20

قۇلقىن ءھام قۇلدىق

قوعام • بۇگىن، 07:15

ءتىلسىز جاۋدىڭ تاقسىرەتى

ايماقتار • بۇگىن، 07:08

تەگىن ءدارى-دارمەك كىمگە تيەسىلى؟

مەديتسينا • بۇگىن، 06:50

شاراپاتى مول «شەت-كومەك»

ەكونوميكا • بۇگىن، 06:39

ۇقساس جاڭالىقتار