تابىل ق ۇلىياس – سان قىرلى قالامگەر. ادەبيەتتەگى العاشقى جولىن ساتيرادان باستاعان جازۋشى كەيىن تاريحي تۇلعالار تۋرالى كولەمدى تۋىندىلارعا قالام تارتتى. اسىرەسە اۆتوردىڭ اتاقتى جىراۋ ءارى ەرجۇرەك تۇلعا «جيەمبەت باتىر» تۋرالى رومان-ەسسەسى مەن جيەنعالي تىلەپبەرگەنوۆ جايىنداعى «اڭىز ىزىمەن» اتتى رومانىن وقىرماندار جىلى قابىلدادى. سونداي-اق قالامگەردىڭ زەرتتەۋشىلىگى دە – ءبىر توبە. ونىڭ XX عاسىرداعى حالقىمىزدىڭ باسىنان وتكەن ءتۇرلى زۇلماتتى بەينەلەگەن «قانجوسا عاسىر» كىتابى مۇراعاتتىق دەرەكتەرمەن جازىلعان.
ءىس-شارا بارىسىندا تابىل ق ۇلىياستىڭ ونەگەلى ءومىرى, ادامي قاسيەتى, جۋرناليستىك قىزمەتى مەن شىعارمالارى تۋرالى ەستەلىكتەر ايتىلدى. جيىندى اتالعان ۋنيۆەرسيتەتتەگى فيلولوگيا فاكۋلتەتىنىڭ دەكانى, اقىن سەرىكزات دۇيسەنعازين جۇرگىزدى. كەشتە الدىمەن ءسوز العان بەلگىلى عالىم, جازۋشى تۇرسىن جۇرتباي قالامگەردى ەرتەدەن بىلەتىنىن ايتتى.
«ول كىسىنىڭ ەسىمىن مەكتەپتە وقىپ جۇرگەندە رەسپۋبليكالىق باسىلىمداردان ءجيى كەزدەستىرەتىنمىن. سوناۋ 60-80-جىلداردىڭ ورتاسىنداعى اقتوبە مەن تورعاي وڭىرىندەگى ادامداردىڭ تاعدىرىن, ولاردىڭ قۋانىشى مەن قايعىسىن وسى تابىل اعامىزدىڭ جازعاندارى ارقىلى ءبىلىپ جۇردىك. كەيىن پروزالىق شىعارمالارىمەن تانىستىم. قالامگەر كوزى تىرىسىندە قازاقتىڭ كوپتەگەن تۇلعاسىمەن جاقىن ارالاستى. سولار تۋرالى ايتاتىن قىزىقتى اڭگىمەلەرى كوپ ەدى. سونىڭ ءبىرى – اتاقتى عالىم يشانباي قاراقۇلوۆ بولاتىن», دەدى ول. ودان كەيىن اكادەميك ديحان قامزابەك ۇلى تابىل اعامىزدىڭ ءوزى باسقارىپ وتىرعان «قازاق گازەتتەرى» سەرىكتەستىگىنىڭ ارداگەرى رەتىندە دە قادىرى بولەك بولعانىن جەتكىزدى.
«بىلتىر ءبىزدىڭ بالالار باسىلىمدارىنىڭ بىرقاتارى ايتۋلى مەرەيتويلارىن اتاپ ءوتتى. تابىل اعامىز وسى باسىلىمدارعا وتكەن عاسىردىڭ 60-70-جىلدارى ۇزبەي جازىپ تۇرعان اۆتور رەتىندە دە ۇلكەن ورنى بار. بۇدان كەيىن تاۋەلسىزدىكتىڭ العاشى كەزەڭىندە تسەلينوگراد اتاۋىن اقمولاعا اۋىستىرۋعا دا زور ۇلەس قوستى. تاريحىمىزدى تۇگەندەۋگە دە ايانباي ەڭبەك ەتتى. رەسەيدەگى ورىنبور, ساراتوۆ قالالارىنداعى ارحيۆتەرگە بارىپ, اقتاڭداق جىلدارعا قاتىستى قانشاما قۇندى تاريحي مالىمەتتەر تاپتى. سونىڭ نەگىزىندە دەرەكتى شىعارمالار جازدى», دەدى عالىم.
جيىن اياسىندا پارلامەنت ءماجىلىسىنىڭ دەپۋتاتى مارات ءباشىموۆ, عالىم سەرىك نەگيموۆ, «حابار اگەنتتىگى» اق باسقارما توراعاسى كەمەلبەك ويشىباەۆ, اكادەميك كارىمبەك قۇرماناليەۆ, تاعى باسقا تانىمال ازاماتتار ءسوز الىپ, ارداقتى تۇلعانىڭ جان-جاقتى قىرىن اشىپ سويلەدى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اكادەميالىق ماسەلەلەر جونىندەگى پرورەكتورى ارداق بەيسەنباي اتالعان وقۋ ورىننىڭ رەكتورى ەرلان سىدىقوۆتىڭ ىزگى لەبىزىن وقىپ بەردى. بەلگىلى ءانشى, مەملەكەتتىك سىيلىقتىڭ لاۋرەاتى كەنجەعالي
مىرجىقباي اۋەلەتىپ ءان سالدى. قالامگەردىڭ جاڭا جيناقتارى تانىستىرىلدى. ءىس-شارا سوڭىندا جازۋشىنىڭ جارى كۇلاش ماحانوۆا وسى شارانى ۇيىمداستىرۋشىلار مەن جينالعان قاۋىمعا ريزاشىلىعىن ءبىلدىردى.
