ەكران ونەرى – قاشاندا زامانمەن ۇندەسىپ, قوعامداعى وزگەرىستەرگە سەرگەك جاۋاپ بەرەتىن سالا. كينو, انيماتسيا, تەلەۆيزيا جانە جاڭا مەديا فورمالارى تەك تەحنولوگيالىق جەتىستىكتەردىڭ ناتيجەسى عانا ەمەس, سونىمەن قاتار قوعامدىق سانا مەن رۋحاني احۋالدىڭ كورىنىسى.
جيىندا الدىمەن ءسوز العان ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى, قازاقستاننىڭ ەڭبەك سىڭىرگەن قايراتكەرى ارمان جۇدەباەۆ جاساندى ينتەللەكت مۇمكىندىگىن سىندارلى زەردەلەۋ – بۇگىنگى ءبىلىم جۇيەسىنىڭ باستى تالابىنىڭ ءبىرى ەكەنىن ايتتى. ودان كەيىن قازاق ۇلتتىق ونەر اكادەمياسىنىڭ عىلىمي جۇمىستار جونىندەگى پرورەكتورى قابىل حالىقوۆ پەن فاكۋلتەت دەكانى, PhD ءمادينا باكەەۆا ەكران ونەرىنىڭ تسيفرلىق داۋىردەگى ماڭىزى, شىعارماشىلىق جاۋاپكەرشىلىك جانە جاساندى ينتەللەكتىنىڭ سالاعا تيگىزەتىن ىقپالى جونىندە مازمۇندى پىكىرلەرىن ورتاعا سالدى. فاكۋلتەت دەكانى م.باكەەۆا ءوز سوزىندە بۇگىنگى جيىننىڭ جاساندى ينتەللەكت پەن كينو, تەلەۆيزيا جانە انيماتسيا سالاسىنىڭ توعىسىنداعى وزەكتى ماسەلەلەردى اشىق تالقىلاۋعا, سونداي-اق اتالعان باعىت بويىنشا ناقتى ۇسىنىستار ازىرلەۋگە جول اشاتىن ماڭىزدى الاڭ ەكەنىن جەتكىزدى. سونداي-اق سپيكەرلەر ەكران ونەرىنىڭ جاڭا تسيفرلىق داۋىردەگى رولىنە, جاساندى ينتەللەكتىنىڭ شىعارماشىلىق ويلاۋعا ىقپالىنا جانە كوركەمدىك جاۋاپكەرشىلىك ماسەلەسىنە توقتالدى.
جيىنعا قازاق كينوسىنىڭ دامۋىنا ەلەۋلى ۇلەس قوسىپ جۇرگەن رەجيسسەرلەر, پروديۋسەرلەر مەن سالا ساراپشىلارى قاتىستى. ايتالىق, تانىمال كينورەجيسسەر راشيد نۇعىمانوۆ ەكران ونەرىنىڭ ءتىلى مەن اۆتورلىق كوزقاراستىڭ ماڭىزىن ءسوز ەتتى. ونىڭ ايتۋىنشا, ەكران – ءداۋىردىڭ ايناسى, ال تەحنولوگيا تەك سول ايناعا قىزمەت ەتۋگە ءتيىس. ال بەلگىلى زاڭگەر, فيلوسوفيا عىلىمدارىنىڭ دوكتورى, قازاقستان كينوگەرلەر وداعى باسقارماسىنىڭ مۇشەسى تەمىرلان تولەگەنوۆ جاساندى ينتەللەكت كەڭىنەن قولدانىلىپ وتىرعان قازىرگى كەزەڭدە قۇقىقتىق نورمالاردىڭ وزەكتىلىگى ارتا تۇسكەنىن اتاپ ءوتتى. ول شىعارماشىلىق ءونىمدى قورعاۋ, ينتەللەكتۋالدىق مەنشىك پەن زاڭنامالىق جاۋاپكەرشىلىك ماسەلەلەرىنە ەرەكشە نازار اۋداردى.
سونىمەن قاتار «Unico Play» كومپانياسىنىڭ باس پروديۋسەرى انار ءجۇنىسوۆا تسيفرلىق پلاتفورمالار مەن ستريمينگ جۇيەلەرىنىڭ ەكران ونەرىنە اسەرى جونىندە بايانداما جاساسا, اكادەميا تۇلەگى, رەجيسسەر ەرنار نۇرعاليەۆ وتاندىق كينو وندىرىسىندەگى جاڭا ۇردىستەرمەن ءبولىستى. سونداي-اق ءال-فارابي اتىنداعى قازاق ۇلتتىق ۋنيۆەرسيتەتىنىڭ دوكتورانتى تولقىن ميركاسيموۆا جانە كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ اعا وقىتۋشىسى ايدوس سەيىتجان (ونلاين) بايانداما جاسادى.
كونفەرەنتسياعا شەتەلدىك سپيكەرلەر ونلاين قاتىستى. ماسەلەن, براتيسلاۆا ەكونوميكا جانە بيزنەس ۋنيۆەرسيتەتىنىڭ دوكتورى, قاۋىمداستىرىلعان پروفەسسور ياروسلاۆ كۋلتان (سلوۆاكيا), سانكت-پەتەربۋرگ مەملەكەتتىك كينو جانە تەلەۆيدەنيە ينستيتۋتىنىڭ پروفەسسور-وقىتۋشىسى انتون سميرنوۆ بايانداما جاسادى. ولار ءوز سوزدەرىندە جي ۇتىمدى پايدالانا بىلگەن ەكران ونەرىندەگى جاقسى تۋىندىلارمەن ءبولىسىپ, جەكە تاجىريبەلەرىنەن قىزىقتى ادىستەر ۇسىندى.
ودان كەيىن جيىن پانەلدىك سەسسياعا جالعاستى. مۇندا سپيكەرلەر جاساندى ينتەللەكت داۋىرىندەگى ەكران ونەرىنىڭ دامۋ باعىتتارىن جان-جاقتى سارالادى. تالقىلاۋ بارىسىندا تەحنولوگيالىق جاڭالىقتارمەن قاتار كاسىبي ەتيكا, اۆتورلىق جاۋاپكەرشىلىك جانە گۋمانيتارلىق ويلاۋدىڭ ماڭىزى ەرەكشە اتالدى. مامانداردىڭ پىكىرىنشە, جاساندى ينتەللەكت جاڭا قۇرالدار مەن وندىرىستىك تيىمدىلىك ۇسىنعانىمەن, شىعارماشىلىقتىڭ باستى تىرەگى – ادام فاكتورى بولىپ قالا بەرەدى. بۇدان سوڭ زاڭگەر, فيلوسوفيا عىلىمدارىنىڭ دوكتورى تەمىرلان تولەگەنوۆپەن ەكى ساعاتقا سوزىلعان جەكە اشىق سەسسيا ۇيىمداستىرىلدى. اشىق فورماتتا وتكەن بۇل كەزدەسۋدە سپيكەر جاساندى ينتەللەكت جاعدايىنداعى اۆتورلىق قۇقىق, شىعارماشىلىق ءونىمدى قورعاۋ جانە قۇقىقتىق جاۋاپكەرشىلىك ماسەلەلەرىنە كەڭىنەن توقتالدى.
سونداي-اق ماگيسترانتتار اراسىندا «ەكراندىق ونەردە جاساندى ينتەللەكت ىقپالى: پايداسى مەن قاۋپى» تاقىرىبىندا دەبات ءوتىپ, ۇزدىك قاتىسۋشىلار انىقتالدى. پىكىرسايىسقا تۇران ۋنيۆەرسيتەتى مەن ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ ماگيسترانتتارى قاتىسىپ, جاساندى ينتەللەكتىنىڭ ەكران ونەرىنە, مادەنيەت پەن شىعارماشىلىق ويلاۋعا اسەرى توڭىرەگىندە تارتىستى ويلارىن ورتاعا سالدى. سونىمەن بىرگە جيىن اياسىندا عىلىمي ماقالالار جيناعى تانىستىرىلدى. ءىس-شارا سوڭىندا بارلىق سپيكەرگە العىسحات پەن ەستەلىك سىيلىق تابىس ەتىلدى.
نازەركە نۇرتاس,
جۋرناليست
