اتالعان جوبا اۋىل شارۋاشىلىعىن يندۋستريالىق جانە تسيفرلىق نەگىزدە دامىتۋعا باعىتتالعان مەملەكەتتىك ساياساتپەن تولىق ۇندەسەدى. زاماناۋي تەحنولوگيالارعا سۇيەنگەن جاڭا وندىرىستىك الاڭ قۇس شارۋاشىلىعىندا اۆتوماتتاندىرۋ مەن جاساندى ينتەللەكتىنى كەڭىنەن ەنگىزۋ ارقىلى سالا دامۋىنا ناقتى باعدار بەرىپ وتىر.
جاڭا فەرمادا وندىرىستىك ۇدەرىستەر تولىقتاي اۆتوماتتاندىرىلعان. قۇس قورالارىنداعى ميكروكليمات, اۋا اينالىمى, تەمپەراتۋرا مەن ىلعال دەڭگەيى جاساندى ينتەللەكتىگە نەگىزدەلگەن باسقارۋ جۇيەسى ارقىلى قاداعالانادى. مۇنداي تەحنولوگيا قۇستىڭ ءوسىپ-جەتىلۋىنە قولايلى جاعداي جاساپ قانا قويماي, ءوندىرىستىڭ تۇراقتىلىعى مەن تيىمدىلىگىن ارتتىرۋعا مۇمكىندىك بەرەدى.
كاسىپورىن برويلەر باعىتىندا جۇمىس ىستەيدى. بالاپاندار شەتەلدەن جەتكىزىلىپ, زاماناۋي تالاپتارعا ساي وسىرىلەدى. قازىر فابريكادا قۇس ەتىنىڭ جيىرمادان استام ءتۇرى وندىرىلەدى. كەيىنگى جىلدارى جۇيەلى تۇردە جۇرگىزىلگەن جاڭعىرتۋ جۇمىستارىنىڭ ناتيجەسىندە پايدالانۋعا بەرىلگەن بۇل نىسان – كاسىپورىنداعى جيىرما توعىزىنشى وندىرىستىك وبەكت. بيىل ۇشتوبە اۋماعىندا تاعى التى جاڭا قۇس قوراسىن سالۋ جوسپارلانعان, ولار ءۇشىن زاماناۋي جابدىقتار الدىن الا ساتىپ الىنعان. كومپانيا الداعى جىلدارى ءوندىرىس كولەمىن ەكى ەسەگە ۇلعايتۋدى ماقسات ەتىپ وتىر.
«اقنار» فابريكاسىنىڭ دامۋ جوسپارى كەزەڭ-كەزەڭىمەن جۇزەگە اسىرىلادى. الداعى جىلدارى ءوندىرىس كولەمىن 12 مىڭ تونناعا, ودان ءارى 17 مىڭ تونناعا دەيىن جەتكىزۋ كوزدەلىپ وتىر. بۇل ىشكى نارىقتى وتاندىق ونىممەن قامتاماسىز ەتۋگە, يمپورتقا تاۋەلدىلىكتى ازايتۋعا جانە باعا تۇراقتىلىعىن ساقتاۋعا مۇمكىندىك بەرەدى. قۇس شارۋاشىلىعى ازىق-ت ۇلىك قاۋىپسىزدىگىن قامتاماسىز ەتۋدەگى ستراتەگيالىق سالالاردىڭ ءبىرى ەكەنىن ەسكەرسەك, جوبانىڭ الەۋمەتتىك-ەكونوميكالىق ماڭىزى ايرىقشا.
بۇگىندە كاسىپورىندا 400-گە جۋىق ادام ەڭبەك ەتەدى. قىزمەتكەرلەر قاتارىندا بوتاقارا اۋىلىنىڭ تۇرعىندارىمەن قاتار, كورشىلەس ەلدى مەكەندەردەن كەلىپ جۇمىس ىستەيتىندەر دە بار. بۇل ءوندىرىس ورنىنىڭ اۋىلدىق ايماقتاردى تۇراقتى جۇمىسپەن قامتۋعا قوسىپ وتىرعان ناقتى ۇلەسىن كورسەتەدى.
جاڭا وندىرىستىك تسەحتى باسقارۋ جاۋاپكەرشىلىگى جاس مامان ليۋدميلا تۇرجانوۆاعا سەنىپ تاپسىرىلعان.
– قۇس شارۋاشىلىعىندا مەن التى جىلدان بەرى ەڭبەك ەتەمىن, الايدا وسىنداي زاماناۋي دەڭگەيدەگى ءوندىرىس ورنىن باسقارۋ – مەن ءۇشىن العاشقى تاجىريبە – دەيدى ليۋدميلا. – قازىر بارلىق ۇدەرىس جوسپار بويىنشا جۇرگىزىلىپ جاتىر, قۇستار قالىپتى ءوسىپ كەلەدى. قورادا 18 مىڭ قۇس بار.
جاس مامان اۆتوماتتاندىرىلعان جۇيەلەردى قولدانۋدى دا مەڭگەرگەن. «تەمپەراتۋرا نەمەسە ىلعال دەڭگەيى اۋىتقىپ قالسا, كومپيۋتەر بىردەن ەسكەرتۋ بەرەدى. ءبىز دەرەۋ ينجەنەرلەردى شاقىرىپ, بارلىق پارامەتردى رەتكە كەلتىرەمىز. مۇنداي تەحنولوگيالىق باقىلاۋ قۇستىڭ ءوسۋىن ءتيىمدى قامتاماسىز ەتۋگە عانا ەمەس, ءوندىرىستىڭ تۇراقتىلىعىن ساقتاۋعا دا سەپتىگىن تيگىزەدى», دەيدى ليۋدميلا.
وسىلايشا, جاس مامان جاۋاپكەرشىلىك پەن كاسىبي دايىندىقتى ۇيلەستىرە وتىرىپ, جاڭا تسەحتىڭ جۇمىسىن زاماناۋي ستاندارتتارعا ساي جۇرگىزىپ وتىر.
جاڭا تەحنولوگيالاردىڭ ەنگىزىلۋى جۇمىس ورىندارىنىڭ قىسقارۋىنا اكەلگەن جوق. كەرىسىنشە, تسيفرلىق جۇيەلەرمەن جۇمىس ىستەي الاتىن بىلىكتى ماماندارعا دەگەن سۇرانىس ارتتى. جاستاردى وندىرىستىك ۇدەرىسكە تارتۋ, زاماناۋي تالاپتارعا ساي كادر دايارلاۋ فابريكا باسشىلىعىنىڭ باسىم باعىتتارىنىڭ ءبىرى بولىپ وتىر.
سالا ساراپشىلارى مۇنداي جوبالاردى اگروونەركاسىپ كەشەنىن جاڭعىرتۋدىڭ ءتيىمدى ۇلگىسى رەتىندە باعالايدى. ولاردىڭ ايتۋىنشا, اۆتوماتتاندىرۋ مەن جاساندى ينتەللەكتىنى ەنگىزۋ وندىرىستىك تاۋەكەلدەردى ازايتىپ, سانيتارلىق قاۋىپسىزدىكتى كۇشەيتەدى ءارى ءونىم ساپاسىن بىرىزدەندىرۋگە جول اشادى. سونىمەن قاتار حالىقارالىق ستاندارتتارعا ساي كەلەتىن, باسەكەگە قابىلەتتى ءونىم وندىرۋگە مۇمكىندىك بەرەدى.
قاراعاندى قالاسىنداعى ساۋدا ورىندارىنىڭ قۇس ەتى ساتىلاتىن سورەلەرىنە كوز سالساڭىز, «اقنار» برەندىمەن شىعارىلاتىن ونىمدەر ءجيى ۇشىراسادى. ونىڭ ىشىندە قۋىرۋعا ارنالعان برويلەر ەتى, سورپاعا تۇتاس تاۋىق, جارتىلاي مۇشەلەنگەن نەمەسە تۋرالعان ونىمدەر, سان ەتى مەن قاناتتارى – مۇنىڭ ءبارى وتاندىق نارىقتا سۇرانىسقا يە تاۋارلار قاتارىندا.
«اقنار» قۇس فابريكاسىنىڭ نەگىزىن قالاۋشى ءارى قۇرىلتايشىسى ۆيكتور كولچەۆتىڭ ايتۋىنشا, كاسىپورىن ونىمدەرىنە دەگەن سۇرانىس تۇراقتى ءوسىپ كەلەدى. قاراعاندىلىقتاردىڭ كۇندەلىكتى تۇتىناتىن اسىنا اينالعان بۇل ونىمدەر بۇگىندە وبلىس اۋماعىمەن عانا شەكتەلمەي, سونداي-اق استانا, الماتى, تالدىقورعان, كوكشەتاۋ, پاۆلودار, ۇلىتاۋ سەكىلدى بىرقاتار وڭىرلەردىڭ ساۋدا جەلىلەرىنە تۇراقتى جەتكىزىلىپ وتىر.
فابريكا نەگىزىنەن قۇس ەتىن جانە جارتىلاي فابريكات ونىمدەرىن وندىرەدى. سونىمەن قاتار 2003 جىلدان باستاپ كاسىپورىن قۇراما جەم ءوندىرىسىن دە جولعا قويعان. بۇگىندە تاۋلىگىنە دارۋمەندەرگە باي 200 تونناعا جۋىق مال ازىعى دايىندالادى. جالپى, ءوندىرىس كولەمى جىلىنا شامامەن 9 مىڭ توننا قۇس ەتىن جانە 50 مىڭ توننا قۇراما جەمدى قۇرايدى.
قورىتا ايتقاندا, «اقنار» قۇس فابريكاسى سەكىلدى كاسىپورىن كوبەيگەن سايىن وتاندىق اگروبيزنەس نىعايىپ, اۋىل ەكونوميكاسىنىڭ تىرەگى بەكي تۇسەدى.
قاراعاندى وبلىسى
