«جۇمىسشى ماماندىقتار جىلىندا» كورسەتىلگەن قۇرمەتكە مەكەمەنىڭ مىڭنان استام قىزمەتكەرى ەرەكشە قۋانىپ, ايتجان باقىتجان ۇلىن ءبىراۋىزدان قۇتتىقتادى. جۇمىسىنا تىڭعىلىقتى, از ءسوزدى, جاس ماماندارعا قامقور, شاقىرتۋ تۇسكەندە ءتۇن ورتاسى دەمەي, اۋىر كابەلدەردى كولىگىنە تيەپ الىپ, الىس جولعا ءجۇرىپ كەتەتىن ايتجان اعانى ۇجىمداستارى قاتتى سىيلايدى.
وقشاۋلاۋشى ماماندىعى وڭاي ەمەس. قىس كۇندەرى ەلسىزدەگى جوعارى كەرنەۋلى جەلىلەردەگى وتكىزگىش سىمدار قاتىپ قالسا نەمەسە قىسقا تۇيىقتالۋدان جارىق وشسە, اۋدانداعىلار ايتجان كابەلشىنى ىزدەيدى. ونىڭ ۇستىنە, كەيىنگى جىلدارى اۋا رايى قۇبىلمالى بولىپ, ەلەكتر باعانالارىندا مۇز قاتۋىنان اپاتتى جاعدايلار جيىلەپ كەتتى. ەلەكتر جەلىلەرىنىڭ توزۋى دا كۇردەلى ماسەلەگە اينالعان. اقتوبە وبلىسىنداعى ەلدى مەكەندەردىڭ اراسى تىم الشاق, كەي اۋداندارعا جەتۋ ءۇشىن 7–8 ساعات ۋاقىت كەتەدى. كوكتايعاق پەن بوراندا ءجۇرۋ قانشا قيىن بولسا دا, ماماندار اپاتتى جاعدايدى تەز رەتتەۋگە تىرىسادى. ويتكەنى جارىقتىڭ ءوشۋى اۋرۋحانالار مەن مەكتەپتەر, بالاباقشالار مەن كوممۋنالدىق مەكەمەلەردىڭ جۇمىسىن توقتاتىپ تاستايدى. مۇنداي كەزدە جوعارى كەرنەۋلى كابەلدەردى بىرنەشە ەلەكتر مامانى جۇمىلىپ ءجۇرىپ الماستىرادى. كوكتايعاق پەن مۇزدا باعاناعا كوتەرىلگەندە قاۋىپسىزدىك ەرەجەلەرىن قاتاڭ ساقتاۋ قاجەت. سوندىقتان دا مۇنداي جاۋاپتى ىسكە ايتجان سياقتى تاجىريبەلى ماماندار جۇمىلدىرىلادى.
كەيىپكەرىمىز مۇعالجار اۋدانىنىڭ اششىساي اۋىلىندا دۇنيەگە كەلگەن. مەكتەپ بىتىرگەن سوڭ اۋىلدا تراكتورشى-مەحانيزاتور بولىپ ەڭبەك جولىن باستاپ, 1984–1986 جىلدارى اسكەري بورىشىن وتەپ قايتادى. ءتورت جىلدان سوڭ اۋدان ورتالىعى قاندىاعاش قالاسىنداعى ەلەكتر جەلىلەرى مەكەمەسىنە جۇرگىزۋشى بولىپ اۋىسادى. بىرەر جىلدان سوڭ مەكەمەنىڭ ەلەكتر سلەسارى بولىپ تاعايىندالىپ, كۇردەلى قۇرىلعىلارمەن جۇمىس ىستەۋدى, اپاتتى جاعدايلاردى جويۋ تاسىلدەرىن مەڭگەرەدى.
– ەنەرگەتيكا ماماندىعى تاجىريبەمەن كەلەدى. بۇل جۇمىس ادام مىنەزىن شىڭدايدى, توزىمدىلىككە باۋليدى. ەرەكشە ىجداعاتتىلىق قاجەت. سەبەبى ەلەكتر وتكىزگىشتەرىن, توزعان سىمداردى ساپالىسىنا الماستىرىپ تۇرماسا, كەز كەلگەن ۋاقىتتا ءورت شىعۋى ىقتيمال. ءبىز شاقىرتۋعا بارعاندا ەڭ اۋەلى جەلىلەردىڭ جاعدايىن تەكسەرىپ الىپ, سودان كەيىن عانا اقاۋلاردى جوندەۋگە كىرىسەمىز. قاۋىپسىزدىك ەرەجەلەرىن ساقتاماۋدىڭ, قىسقا تۇيىقتالۋدىڭ كەسىرىنەن شىققان ورتتەر قانشاما ادامنىڭ ءومىرىن جالمادى. سوندىقتان ەلەكتر جۇيەلەرىنە وتە اباي بولۋ كەرەك. توزعان جەلىلەردى كەزەڭ-كەزەڭىمەن جاڭالاپ وتىرۋ ماڭىزدى, – دەيدى مامان.
«ەنەرگوسيستەما» جشس مۇعالجار ەلەكتر جەلىلەرى ۋچاسكەسىندە جۇرگىزۋشى بولىپ ەڭبەك ەتە ءجۇرىپ, ول 2022 جىلى اقتوبە قالاسىنداعى باس كەڭسەگە اۋىستى. سودان بەرى وقشاۋلاۋ, قورعاۋ جانە سىناۋ قىزمەتىنىڭ 5-رازريادتى كابەلشى-جۇرگىزۋشىسى لاۋازىمىندا قىزمەت اتقارادى.
وتباسىندا سىيلى, اعايىن-تۋىسقا قامقور اكەنىڭ ۇل-قىزى بۇگىندە ءار سالادا ەڭبەك ەتىپ ءجۇر. ءۇش نەمەرەسى بار.
– بالالارىم ەنەرگەتيكا سالاسىن تاڭدامادى. قىزىم الماتى قالاسىندا تۇرادى. ۇلىم باۋىرجان – سپورتشى, قازاقستان بوكس فەدەراتسياسىنىڭ حالىقارالىق دارەجەدەگى تورەشىسى. جۇبايىمنىڭ جەكە كاسىبى بار, تىگىنشىلىكپەن اينالىسادى, – دەيدى كەيىپكەرىمىز.
ايتجان ىسقاق كەيىنگى تولقىن جاستارعا بىلگەنىن ۇيرەتۋدەن, مول تاجىريبەسىن بولىسۋدەن جالىقپايدى. ەنەرگەتيكا مەكەمەسى قازىر جاس ماماندارمەن تولىعىپ جاتىر. ۇجىمعا كەلگەن جاس ينجەنەرلەر مەن كوللەدج بىتىرگەن ماماندار ايتجان اعاسىنان اقىل سۇراۋدان تارتىنبايدى. ول جوعارى كەرنەۋ كەزىندە قاۋىپسىزدىك ەرەجەلەرىن ساقتاۋدى, باعانالارعا ارنايى بەكىتكىشتەرمەن شىعۋ تاسىلدەرىن ۇيرەتىپ, جانىندا جۇرگەن جاستاردى سىرتتاي باقىلاپ تۇرادى. قاتەسى بولسا, بىردەن ەسكەرتەدى. ونىڭ العاشقى شاكىرتتەرى دە قازىر تاجىريبەلى مامانعا اينالدى. سوعان قاراماستان ۇستازدىق پەن ازاماتتىقتى قاتار الىپ جۇرگەن قاراپايىم ەڭبەككەردىڭ ءالى دە ۇيرەتەرى كوپ.
اقتوبە وبلىسى
