«جەمقورلىقتى جويۋدىڭ ەڭ باستى كرەدوسى – ادىلدىك. جەمقورلىق ءسوزىنىڭ ءوزى ادىلەتسىزدىكتىڭ ءسينونيمى سياقتى. پرەزيدەنت ءوزىنىڭ سايلاۋالدى باعدارلاماسىندا ادىلەتتى قوعام قۇرۋ جايىندا ايتقان بولاتىن. بۇل رەتتە ادىلەت ۇعىمىنا نازار اۋدارۋ اسا ماڭىزدى. ويتكەنى ادىلەت بولعان جاعدايدا عانا قوعامدا سەنىم قالىپتاسادى», - دەدى دارحان قىدىرالى.
سونداي-اق ول ادىلدىك, جەمقورلىق تۋراسىندا جازعان بەلگىلى فيلوسوفتاردىڭ كىتاپتارىنان مىسالدار كەلتىردى.
«بىزدە ساياسي قىزمەتكەرلەر كوبىنەسە ماكياۆەلليدى وقىپ, ۇلگى تۇتادى. ال «ماكياۆەللي بيلىككە جەتۋ ءۇشىن قانداي بولماسىن قادامعا بارۋعا بولادى» دەيدى. مەنىڭشە, جەمقورلىقتىڭ ءبىر كۇشى وسىندا جاتىر. سەبەبى قياناتپەن, الداپ-ارباۋمەن بيلىككە نەمەسە ۇلكەن جەتىستىككە جەتۋگە بولادى دەگەندى وقىپ وسكەن جاستار, ارينە, ونداي قادامعا بارادى. ال ەندى ءدال وسىنداي كىتاپتار ءبىزدىڭ قوعامدا كوپ جازىلعانىن بىلەسىز. سونىڭ ءبىرى ءال-فارابي بابامىزدىڭ وسىدان مىڭ جىل بۇرىن جازىلعان «قايىرىمدى قالا تۇرعىندارى» كىتابى. سونداي-اق ءجۇسىپ بالاسۇعۇننىڭ «قۇتتى بىلىك» كىتابىندا دا مەملەكەتتىك قىزمەتكەردىڭ, پاتشانىڭ, ءۋازىردىڭ قانداي بولۋى كەرەكتىگى جازىلعان. اباي «قۇتتى بىلىكتى» وقىعان. سوندىقتان ونىڭ «عىلىم تاپپاي ماقتانبا» دەگەن ايگىلى ولەڭىندە ايتىلعانىنداي جەمقورلىقتىڭ ءبىر ۇشى قاناعاتسىزدىقتا, راقىمسىزدىق پەن ىنساپسىزدىقتا جاتىر», - دەدى ول.
بۇدان سوڭ, دارحان قىدىرالى باق وكىلدەرى قوعامداعى سىبايلاس جەمقورلىق ارەكەتتەرىن جازۋدا باتىل بولۋى كەرەكتىگىن ايتتى.
«سىبايلاس جەمقورلىق ىندەتى بارلىق سالادا كەزدەسەدى. قوعاممەن ەڭ كوپ ارالاساتىن جۋرناليستەر. ولار ءتۇرلى ماسەلەلەردى باق بەتتەرىندە ۇنەمى كوتەرەدى. سوعان بايلانىستى سىبايلاس جەمقورلىققا قارسى ءىس-قيمىل اگەنتتىگى دەرەۋ شارالار قابىلداپ, ءادىل شەشىمىن شىعارۋعا سەپ بولىپ جاتادى. ارينە مۇنداي جاعدايدا قوعامدا سەنىم ورنايدى. سول سەبەپتى جۋرناليستەر مۇنداي ولقىلىقتاردى جاريالاۋدا باتىل بولۋى كەرەك», - دەدى باسىلىم باسشىسى.
