جەكسەنبىدە جاريالانعان قىتايدىڭ PMI (ساتىپ الۋ جونىندەگى مەنەدجەرلەردىڭ يندەكسى) دەرەكتەرى بويىنشا وڭدەۋ ونەركاسىبىندەگى ساتىپ الۋ مەنەدجەرلەرىنىڭ رەسمي يندەكسى 50,6-عا دەيىن تومەندەگەنىن كورسەتتى. دەسەك تە دۇيسەنبىدە Caixin اگەنتتىگى شاعىن ەكسپورتتىق فيرمالاردىڭ كورسەتكىشى 49,4-تەن 50,7-گە دەيىن وسكەنىن تىركەگەن. كاسىپورىندار جونىندەگى بۇل دەرەكتەر «سارى قۇرلىقتاعى» ەكونوميكانىڭ قالپىنا كەلۋ ءۇردىسى باياۋ ءارى بىركەلكى ەمەس ەكەنىن ايعاقتايدى. نەگە دەسەڭىز, سولتۇستىك-شىعىس ايماقتاعى مەملەكەتتەردىڭ پەرسپەكتيۆالىق جوسپارلارى السىرەپ, توقىراپ جاتىر.
«سولتۇستىك-شىعىس ازيا ۆيرۋستى تەجەۋدە ايتارلىقتاي تابىسقا قول جەتكىزدى. بۇل ۇتقىرلىقتى جەدەل قالپىنا كەلتىرۋگە جانە ىشكى سۇرانىستىڭ ارتۋىنا جاقسى بولجام. الايدا, ولارعا ءالى دە تۇراقتانا قويماعان سىرتقى ورتامەن جانە جارتىلاي وتكىزگىشتى سەكتورداعى قۇلدىراۋمەن كۇرەسۋگە تۋرا كەلەدى», - دەيدى سينگاپۋرداعى Oxford Economics Ltd-نىڭ ءۇندىستان مەن وڭتۇستىك-شىعىس ازيا ەكونوميكالارى جونىندەگى ءبولىم باسشىسى پريانكا كيشورە.
Bloomberg ەكونوميستەرى نە دەيدى؟
«نارىقتىق ەكونوميكاسى قالىپتاسىپ كەلە جاتقان ەلدەردە وندىرىستىك ينديكاتورلار تومەندەگەنىنە قاراماستان جاڭعىرۋ بەلگىلەرى بايقالىپ جاتىر. قايتا اشىلۋ ءۇردىسى ءوڭىر ەكونوميكاسىنا وڭايعا سوقپاسى انىق. اسىرەسە, قازىر اقش پەن قىتاي اراسىنداعى شيەلەنىس ەكونوميكالىق ساياساتقا ۇلاسۋ قاۋپى باسىم بولىپ تۇرعان كەزەڭدە», دەدى Bloomberg-ءتىڭ ازيا بويىنشا باس ەكونوميستى چان شۋ.
سوڭعى ۋاقىتتاعى جوعارى جيىلىكتى كورسەتكىشتەر جاھاندىق سۇرانىستىڭ كۇرت وسكەنىن, سول سەكىلدى كوروناۆيرۋسقا قارسى ۆاكتسينا تابىلمايىنشا بارلىق ەلدەردەگى ەكونوميكانىڭ رەتتەلۋ بارىسى بىركەلكى بولمايتىنىن اڭعارتادى.
قىزمەت كورسەتۋ سەكتورىنا قاراعاندا, وندىرىستىك سەگمەنتكە جەڭىلدىكتەر ەندى بەرىلە باستادى. ايماق ۇكىمەتتەرى تەك قازىر عانا كارانتين رەجىمىن جەڭىلدەتىپ, تۇتىنۋشىلاردىڭ سۇرانىسىن ارتتىرۋعا بەلسەندى كىرىستى.
الەمدىك ساۋدانىڭ كوشباسشىلارىنىڭ ءبىرى سانالاتىن وڭتۇستىك كورەيادا مامىردا ەكسپورت ەكى ەسەگە تومەندەگەن. ساۋدا مينيسترلىگىنىڭ مالىمەتىنشە, بىلتىرعى سايكەس كەزەڭمەن سالىستىرعاندا, بيىل سىرتقى ساۋدانىڭ كولەمى 24%-عا ازايعان. ەكونوميستەر تەرىس سالدونى 25%-دىق دەڭگەيدە بولجاعان-دى.
كەڭ اۋقىمدى جاھاندىق سۇرانىس تۋىنداماسا, تاياۋدا «تاڭعى جۇپار ەلىنىڭ» ەكسپورتتىق سەكتورىندا وزگەرىستەر ورىن المايتىن سىندى.
«جاقىن ارادا تۇراقتى سۇرانىستىڭ بايقالۋى ەكىتالاي. بۇعان قوسا وندىرىستىك قۋاتتان تومەن وپەراتسيالىق مولشەرلەمەنىڭ ارتۋى تاياۋ بولاشاقتا ءوسىمنىڭ ايتارلىقتاي تەجەلەتىنىن كورسەتەدى», دەدى IHS Markit-ءتىڭ ەكونوميستى دجو حەيز.
ەندا كارران جانە ميشەل دجامريسكو,
Bloomberg
دايىنداعان:
جاقسىلىق مۇراتقالي
