ازىرشە ۇكىمەت سپورتتىق ءىس-شارالاردى وتكىزۋگە, جابىق كەشەندە جاتتىعۋ جۇمىستارىن جاساۋعا رۇقسات بەرگەن جوق. ەگەر سپورت عيماراتتارى اشىلار بولسا, تۇرعىنداردىڭ سپورت كەشەندەرىنە اعىلاتىنى راس. سوندىقتان دا ەلدە سپورت زالدارىنا دەگەن سۇرانىس ارتادى. وڭىرلەردەگى سپورت عيماراتتارىن ايتپاعاننىڭ وزىندە ەلورداداعى كەشەندەر قانشالىقتى تالاپقا ساي؟ سپورتپەن شۇعىلدانامىن دەگەن ءاربىر استانالىق تۇرعىنعا قولجەتىمدى مە؟
جالپى ەلباسى نۇرسۇلتان نازارباەۆ تا, پرەزيدەنت قاسىم-جومارت توقاەۆ تا وزدەرىنىڭ ءار جولداۋىندا ۇنەمى بۇقارالىق سپورتتى دامىتۋ كەرەكتىگىن باسا ايتىپ, وسى سالاعا جاۋاپتى مينيسترلىككە, قالا, وبلىس اكىمدەرىنە ناقتى تاپسىرمالار بەرىپ كەلەدى. ماسەلەن, قاسىم-جومارت كەمەل ۇلى 2019 جىلدىڭ 2 قىركۇيەگىندەگى «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا ەلىمىزدە بۇقارالىق سپورتتى دامىتۋعا بايلانىستى كەشەندى باعدارلاما قابىلداۋ كەرەكتىگىن جەتكىزدى. «ۇلت دەنساۋلىعىن بەكەمدەۋ ماسەلەسى دە وتە وزەكتى. بارلىق جاس ساناتتارى اراسىندا بۇقارالىق سپورت تۇرلەرىن ناسيحاتتاي بەرۋ كەرەك. بالالار ءۇشىن سپورتتىق ينفراقۇرىلىمنىڭ بارىنشا قولجەتىمدى بولۋىن قامتاماسىز ەتۋ كەرەك. بۇقارالىق سپورتتى دامىتۋ – پيراميداعا اينالۋى ءتيىس. ونىڭ باسىنا چەمپيوندار شىقسا, ونىڭ نەگىزىندە ءبىز ساۋ ءارى سانالى ۇرپاقتى, مىقتى ۇلتتى قالىپتاستىرامىز. بۇل باعىتتى زاڭنامالىق تۇرعىدا جالعاستىرىپ, بۇقارالىق سپورتتى دامىتۋدا كەشەندى باعدارلاما قابىلداۋ كەرەك», دەدى مەملەكەت باسشىسى قازاقستان حالقىنا جولداۋىندا.
كوللاجدى جاساعان قونىسباي شەجىمباي, «EQ»
وسى ماقساتتا ەلوردامىزدا جىل سايىن ءارتۇرلى سپورت الاڭدارى سالىنىپ, تۇرعىندار يگىلىگىنە بەرىلۋدە. سونىمەن قاتار سالاماتتى ءومىر سالتىن ناسيحاتتاۋ ماقساتىندا, جاستاردى سپورتقا باۋلۋ ءۇشىن ەلوردادا كوپشىلىككە ارنالعان سايىستار مەن سپورتتىق فەستيۆالدار ءجيى وتكىزىلىپ تۇرادى. بۇگىندە باس قالادا ەرەسەكتەرگە دە, بالالارعا دا سپورتپەن شۇعىلدانۋعا ارنالعان ءىرىلى-ۇساقتى 600-دەن استام سپورت نىسانى جۇمىس ىستەپ تۇر.
سونىڭ ءبىرى – «استانا» سپورت كەشەنى. بۇل سپورت نىسانى قالا تۇرعىندارىنا باسسەين مەن جاتتىعۋ زالىن ۇسىنادى. سونىمەن قاتار بالالار سكالودروم, فۋتبول جانە باسكەتبول مەن ۆولەيبول ۇيىرمەلەرىنە جازىلىپ, ۇلكەندەر جاعى ويىن الاڭدارىن جالعا الىپ, جاتتىعۋلارىنا بولادى. سپورتتىق سەكتسيالاردان كيكبوكسينگ, كاراتە, بوكس جانە تاعى باسقا ۇيىرمەلەر جۇمىس ىستەيدى.
سپورت كەشەنىندە جاتتىعۋ مەن باسسەين زالى بار. بالالار ءۇشىن جاتتىعۋ زالىنا جازىلۋ ايىنا ورتا ەسەپپەن 4500 تەڭگە بولسا, ەرەسەكتەر ءۇشىن 8 500 تەڭگە. ءجۇزۋ باسسەينىندە بالالار توپپەن جاتتىقسا ايىنا 13 000 تەڭگە, ال جەكەلەي جاتتىقسا 18 000 تەڭگە تولەيدى. ۇلكەندەر ءۇشىن توپپەن جاتتىعۋ 18 000 تەڭگە, جەكەلەي جاتتىعۋ ءۇشىن 20 000 تەڭگە.
2011 جىلى پايدالانۋعا بەرىلگەن رەسپۋبليكالىق «سارىارقا» ۆەلوترەگى – ۆەلوشاباندوز شلەمى تۇرىندە جاسالعان, ەرەكشە سپورت عيماراتى, الەمدەگى ەڭ ۇزدىك سپورت كەشەندەرىنىڭ ءبىرى رەتىندە تانىلعان. ۆەلوترەكتىڭ ىشىنە جاتتىعۋ زالى, ترەك, مۇز سىرعاناعى, تاەكۆوندو, گيمناستيكا, ويىن زالى جانە شاعىن فۋتبول الاڭدارى كىرەدى. جاتتىعۋ زالىنا 5 جاسقا دەيىنگى بالالارعا كىرۋ تەگىن. ال مەكتەپ وقۋشىلارىنا, ستۋدەنتتەرگە جانە زەينەتكەرلەرگە ءبىر جولعى كەلۋگە 50 پايىز جەڭىلدىك قاراستىرىلعان.
«سارىارقا» كەشەنىندە باسسەيىنگە ءتۇسۋ ءۇشىن ەرەسەكتەرگە ارنالعان توپتىق ساباق 18 000 تەڭگە (اپتاسىنا 3 رەت), ال بالالارعا ارنالعانى 15 000 تەڭگە (اپتاسىنا 3 رەت). سونداي-اق وسى باعاعا جاتتىعۋ زالىنا دا كىرە الاسىز. ۆەلوسپورت جانە بەگوۆەل سەكتسيالارىنا جازىلۋدىڭ ءبىر رەتتىك قۇنى – 2 000 تەڭگە بولسا, توپپەن جاتتىعۋ ايىنا 22 مىڭ تەڭگەگە دەيىن. تاەكۆوندو سپورتىن جەكە ۇيرەنەمىن دەگەندەرگە – 25 000 تەڭگە (12 ساباق), توپپەن جاتتىعامىن دەگەندەرگە – 10 000 تەڭگە (اپتاسىنا 3 رەت). سونىمەن قاتار 4-5 جاستاعى قىزدار كوركەم گيمناستيكامەن دە اينالىسا الادى.
«الاۋ» مۇزايدىنى نۇر-سۇلتان تۇرعىندارى جاز مەزگىلىندە دە سپورتپەن شۇعىلدانۋ ءۇشىن ورتالىق اشقان. مۇزايدىن سارايى قىسقى ۋاقىتتا سپورت- سۇيەر قاۋىمعا مىناداي قىزمەت تۇرلەرىن ۇسىنادى: كونكيمەن سىرعاناۋ (حوككەي الاڭى), روليكپەن سىرعاناۋ (400 مەترلىك كونكيمەن جۇگىرۋ جولى), ال جازدا باتۋت, ۇستەل تەننيسى, بادمينتون, بيليارد جانە شاعىن گولف. ءبىر كۇندىك تولىق بيلەتتىڭ باعاسى – 1000 تەڭگە, ال جەڭىلدىك بيلەتى – 500 تەڭگە. سونىمەن قاتار 7 جاسقا دەيىنگى بالالارعا, I جانە II توپ مۇگەدەكتەرى, كوپ بالالى وتباسىنان شىققان, كامەلەتكە تولماعان بالالار جانە بالالار ۇيلەرىنىڭ تاربيەلەنۋشىلەرىنە كەشەنگە كىرۋ تەگىن. وقىتۋشىلار, ستۋدەنتتەرگە جەڭىلدىك بيلەتى قاراستىرىلعان.
قاجىمۇقان مۇڭايتپاسوۆ اتىنداعى ستاديوننىڭ ەسىگى جاز ماۋسىمىندا جەڭىل اتلەتيكا مەن فۋتبولعا اۋەس جاندارعا ءاردايىم اشىق. كەز كەلگەن قالا تۇرعىنى جەڭىل اتلەتيكا جانە فۋتبولمەن تەگىن اينالىسا الادى. ق.مۇڭايتپاسوۆ اتىنداعى ورتالىق ستاديوندا حالىقارالىق ستاندارتقا سايكەس (105ح68م) تابيعي كوگالدى فۋتبول الاڭى بار جانە ول 12 250 ورىندى تريبۋنامەن جابدىقتالعان. فۋتبولدان باسقا, ستاديوندا 400 مەترلىك جۇگىرۋ جولى, ۇزىندىققا, بيىكتىككە سەكىرەتىن ارنايى ورىندار بار.
ىشكى ىستەر مينيسترلىگىنە قارايتىن «الاتاۋ» سپورت كەشەنى قالا تۇرعىندارىنا وليمپيالىق باسسەين, جۇگىرۋ جولى, ەكى شاعىن فۋتبول, ۆولەيبول الاڭى, بىرنەشە جەكپە-جەك سپورت تۇرلەرى, جاتتىعۋ زالىن جانە بىرقاتار بي ۇيىرمەلەرى قىزمەتىن ۇسىنادى. ماسەلەن, ءبىر ساعات باسسەينگە ءتۇسۋ ءۇشىن ەرەسەكتەرگە – 1 200, 15 جاسقا دەيىنگى بالالارعا – 650 جانە ستۋدەنتتەرگە – 800 تەڭگە. ال جاتتىعۋ زالىنا كىرۋدىڭ ءبىر رەتتىك جۇگىرۋ جولاعىن قوسا ەسەپتەگەندە قۇنى (2 ساعات) ەرەسەكتەرگە – 1 250, 16 جاسقا دەيىنگىلەرگە – 800 جانە ستۋدەنتتەرگە – 900 تەڭگە. سونىمەن قاتار 1 ساعات ۇستەل تەننيسىمەن شۇعىلدانعىڭىز كەلسە – 950 تەڭگە, ءبىر ساعاتقا فۋتبول الاڭىن كۇندىزگى ۋاقىتتا جالداعىڭىز كەلسە – 20 000, كەشكى ۋاقىتقا 25 000 تەڭگەڭىز بولۋى كەرەك. ال ۆولەيبول الاڭىنا كۇندىز 15 مىڭ, كەشكى ۋاقىتقا 17 مىڭ تەڭگە تولەيسىز.
«داۋلەت» سپورت كەشەنىندە ۇلكەن تەننيستەن دارىستەر جۇرگىزىلەدى. بۇگىندە ەلىمىزدەگى ەڭ ۇلكەن تەننيس ورتالىعىندا بالالار جەكەلەي جانە توپ بولىپ جاتتىعادى. بۇل جەردە تەننيستىڭ الىپپەسىن ۇيرەتۋدەن باستاپ, ءتۇرلى جارىستارعا دايىنداپ شىعارادى. سونداي-اق قالا تۇرعىندارى قالاعان ۋاقىتىندا كورتتى جالعا الا الادى.
سپورت كەشەندەرى ءۇشىن ستاندارتتى ءجۇزۋ, فيتنەس, دزيۋدو, ايكيدو, دجيۋ-دجيتسۋ, ءوزىن ءوزى قورعاۋ سياقتى سپورت تۇرلەرىمەن «قازاقستان» سپورت سارايىندا اينالىسۋعا بولادى. ءجۇزۋ ۇيىرمەسىنە ءبىر اي قاتىسۋ ءۇشىن مەكتەپ جاسىنداعى بالالار مەن ستۋدەنتتەرگە 5000 تەڭگە, ال ۇلكەندەرگە 10 000 تەڭگە كولەمىندە اقى بەلگىلەنگەن. بۇلشىق ەتىڭىزدى دامىتىپ, دەنەڭىزدىڭ سىمباتتى بولۋىن قالاساڭىز جانە ادەمى بەينەلەۋشى قوزعالىستار ۇيرەنگىڭىز كەلسە فيتنەس ستۋدياسىنا جازىلۋعا بولادى. باعاسى – 7 مىڭ تەڭگە. بالالاردى بي توپتارىنا قابىلداۋ 4, 5 جاستان جۇرگىزىلەدى. بي ۇيىرمەسىنەن شىعىس, الەم حالىقتارىنىڭ, بالالار, كلۋبتىق بيلەر, ستريپ پلاستيكا, BreakDance, يوگا, شوۋ بالەت (سالتاناتتى كەشتەردە بيلەۋ) ءبيىن ۇيرەنە الادى. ايلىق باعاسى 10 000 تەڭگە شاماسىندا. «قازاقستان» سپورت كەشەنى بۇگىندە ەلوردانىڭ سپورتتىق جانە قوعامدىق ومىرىندە ماڭىزدى ءرول اتقارادى. دەگەنمەن, قازىرگى تاڭدا اتالعان سپورت كەشەنىندە رەكونسترۋكتسيا جۇرگىزىلىپ جاتىر.
سونداي-اق سۋ سپورتى تۇرلەرىنە اۋەس جاندار ءجۇزۋ, سۋعا سەكىرۋ, اكادەميالىق ەسۋ, بايداركا مەن كانوە ەسۋ, جەلكەندى سپورتقا مامانداندىرىلعان «تولقىن» سپورت مەكتەبىنە بارۋىنا بولادى. بىراق قازىرگى ۋاقىتتا بۇل سپورت كەشەنىندە دە اۋقىمدى رەكونسترۋكتسيا جۇرگىزۋ جوسپارلانعان.
مىنە, ەلوردا تۇرعىندارى سپورتشىلار مەن حالىق يگىلىگى ءۇشىن سالىنعان سپورتتىق عيماراتتاردى ءوز يگىلىكتەرى ءۇشىن وسىلايشا پايدالانا الادى. سونداي-اق قازىرگى تاڭدا نۇر-سۇلتانداعى ءار تۇرعىن ءۇي كەشەنىنىڭ اۋلاسىندا سپورت الاڭقايلارى بار. ەلوردادا سالاماتتى ءومىر سالتىن ۇستانامىن دەگەن جانعا بارلىق جاعداي جاسالعان, تەك وزىڭىزدە ىنتا مەن جىگەر بولسىن!
