بۇگىنگى كۇنى ءداندى جانە بۇرشاق داقىلدارىنىڭ ەگىلۋى 91% (13,3 ملن گا), مايلى داقىلدار 90% (2,7 ملن), قاۋىن جانە كارتوپ 89,5% (422,3 مىڭ), قانت قىزىلشاسى - 93,2% -عا (20,5 مىڭ) اياقتالدى.
وسىعان دەيىن فەرمەرلەر ماقتا مەن كوپجىلدىق شوپتەردى سەبۋدى بىتىرگەن بولاتىن. ايتا كەتۋ كەرەك اتالعان داقىلداردى ەگۋ جوسپارلاعان ۋاقىتتان ەرتە اياقتالدى. ماقتا 125 مىڭ گەكتارعا (114%), جەمشوپ داقىلدارى 401 مىڭ گەكتارعا (138,9%) ەگىلدى.
وسى قارقىنمەن ەلىمىزدەگى كوكتەمگى دالا جۇمىستارى ساناۋلى كۇندە تولىعىمەن اياقتالادى دەپ كۇتىلۋدە.
توتەنشە جاعداي مەن كارانتين رەجيمىنە قاراماستان, ەگىن ناۋقانى ۋاقىتىندا باستالىپ, ساتىمەن جۇرگىزىلدى. پرەزيدەنت قاسىم-جومارت توقاەۆتىڭ جانە پرەمەر-مينيستر اسقار ءماميننىڭ تاپسىرماسىمەن اۋىل شارۋاشىلىعى مينيسترلىگى كوكتەمگى دالا جۇمىستارىن جەدەل قارجىلاندىرۋدى قامتاماسىز ەتتى. ارزان وتىندى, سۋبسيديالانعان مينەرالدى تىڭايتقىشتار مەن پەستيتسيدتەردى ۋاقتىلى جەتكىزۋدى ۇيىمداستىردى. «قازاگرو» ۇبح» اق, قارجى ينستيتۋتى «كەڭ دالا» جانە «قاراپايىم زاتتار ەكونوميكاسى» باعدارلامالارى بويىنشا جىلدىق 5 جانە 6%-بەن فەرمەرلەرگە نەسيە بەردى, سونىمەن قاتار, اۋىلشارۋاشىلىق تەحنيكالارى جەڭىلدەتىكپەن جالعا بەرىلدى.
سونداي-اق, ەلدە ەنگىزىلگەن توتەنشە جاعداي كەزەڭىندە اۋىل شارۋاشىلىعى مينيسترلىگى كوكتەمگى دالا جۇمىستارىمەن اينالىساتىن فەرمەرلەردى جانە تەحنيكالاردى بلوكپوستتاردان ەش كەدەرگىسىز ءوتۋىن قامتاماسىز ەتتى. قوسالقى بولشەكتەردى ساتاتىن جانە اۋىلشارۋاشىلىق تەحنيكالارىنا قىزمەت كورسەتەتىن كاسىپورىنداردىڭ جۇمىسى دا توقتاعان جوق.
