قوعام • 01 ماۋسىم، 2020

بالالاردىڭ ءبىلىمى مەن قاۋىپسىزدىگىنە باسىمدىق بەرىلەدى (ۆيدەو)

137 رەت كورسەتىلدى

بۇگىن – باۋىر ەتىمىزگە بالايتىن، كوڭىلدىڭ گ ۇلىنە، كوزدىڭ نۇرىنا تەڭەيتىن بالالار كۇنى.

سۋرەتتى تۇسىرگەن ەرلان ومار، EQ

بيىل بالالار ءۇشىن دە ەستەن كەتپەس ەرەكشە سىني كەزەڭ بولدى. كارانتين شارالارى دالا بەزىپ، دوپ قۋار ويىن بالاسىن قۋىس ۇيگە قۋىپ تىقتى. بالدىرعاندارعا بالاباقشا، وقۋشىلارعا مەكتەپ ەسىگى تارس جابىلدى. تەرەزە الدىندا تەلمىرگەن تيتتەي جاندارعا ءتىپتى اۋلاعا شىعۋ مۇڭ بولدى. ويتكەنى رۇقسات جوق! ىندەت ۇلكەنگە دە، كىشىگە دە ىزەت كورسەتپەيدى. بالانىڭ بالاقايى دا، قالاقايى دا بار ەكەنىن ۇقتىرعان وسى ءبىر سىندارلى ساتتە اتا-انالار قاۋىمى مۇعالىمدەر مەن تاربيەشىلەر ەڭبەگىنىڭ قانشالىقتى ماڭىزدى ەكەنىن ۇعىندى. ويتكەنى توتەنشە توقسانعا بالانعان ءتورتىنشى توقساندا ساباقتى بالا عانا ەمەس، اتا-انا دا وقىدى. قاشىقتان وقىسا دا ەشكىم ءبىلىم الۋدان قاعىس قالعان جوق. تەلەارنا دا، ينتەرنەت تە، باعدارلامالار دا وسى رەجىمگە جۇمىلدىرىلدى. 

مەملەكەت باسشىسى قاسىم-جومارت توقاەۆ قالىپتاسقان جاڭا احۋال ءبىلىم جۇيەسىن تۇبەگەيلى رەفورمالاۋدى تالاپ ەتەتىن كەشەگى سوزىندە ەل مەكتەپتەرى جاقسى جابدىقتالىپ، سىنىپتاعى وقۋشىلار سانىنىڭ كوپ بولماۋى ەسكەرىلۋىن، 2025 جىلعا قاراي، 650 ورىندىق جانە ودان دا كوپ وقۋشىعا ارنالعان 800 جاڭا مەكتەپ، اۋىلدارداعى تىرەك مەكتەپتەر ءۇشىن 114 ينتەرنات، 700-دەن اسا سپورت زالىن سالۋ جوسپارلانىپ وتىرعانىن ايتتى. پرەزيدەنتتىڭ پاراساتتى پايىمى الداعى ەل ەكونوميكاسىنىڭ دامۋى تىكەلەي ءبىلىم مەن عىلىم جۇيەسىنە تاۋەلدى ەكەنىن دە جاسىرمادى.

بىلتىر ەلىمىزدە 402 مىڭنان استام ءسابي دۇنيەگە كەلدى، بۇل 2009 جىلمەن سالىستىرعاندا 12،9 پايىزعا كوپ. قازاقستانداعى حالىق سانى ءوسىمىنىڭ 19 ملن-عا جەتكەنى بەلگىلى. ەلىمىزدە انا مەن بالاعا مەملەكەتتىك قامقورلىقتىڭ ارتىپ كەلە جاتقانىن اڭداۋعا بولادى.

بيىل بالالاردىڭ جازعى دەمالىسى جىلداعىدان وزگەشە بولاتىنى داۋسىز. لاگەرلەر مەن دەمالىس ورىندارى قاۋىپسىزدىك شارالارىن ساقتاۋعا بايلانىستى بالالاردى قابىلداۋ ەرەجەلەرىنە وزگەرىستەر ەنگىزەدى. ەڭ باستىسى، توتەنشە توقساندا ءتورت كوزى تۇگەل وتىرىپ كومپيۋتەرگە تەسىلگەن بالالار مەن اتا-انالار جاز ماۋسىمىن ويداعىداي وتكىزىپ، الداعى وقۋ جىلىنا تىڭ كۇش-قۋات جيناپ كەلەتىنى كامىل.

سوڭعى جاڭالىقتار

ۇقساس جاڭالىقتار