كەزدەسۋدى ۇجىمنىڭ مەڭگەرۋشىسى, ساياسي عىلىمىنىڭ دوكتورى, پروفەسسور گۇلميرا سۇلتانباەۆا اشىپ, كافەدرا تۇلەكتەرىن قۇتتىقتادى. قازۇۋ رەكتورى اكادەميك عالىمقايىر مۇتانوۆ ارنايى بەينە قۇتتىقتاۋ جولدادى. فاكۋلتەت دەكانى ساعاتبەك مەدەۋبەك تۇلەكتەرگە جىلى لەبىزىن ءبىلدىردى. ءال-ءفارابيدىڭ «ادامدار تەك بىرلەسە, ءبىر-بىرىنە كومەكتەسۋ ارقىلى عانا باقىتقا جەتە الادى», - دەگەن ناقىل سوزىندە قانشاما تەرەڭ وي, پاراساتتى يدەيا بار. رەكتور تۇلەكتەردى عۇلامانىڭ وسى يدەياسى اياسىندا ءبىر-ءبىرىن قولداي وتىرىپ, ۋنيۆەرسيتەت پەن قوعام دامۋىنا ۇلەس قوسۋعا شاقىردى.
ماسەلەن, تۇلەكتەردىڭ قولداۋىمەن كافەدرا بازاسىندا سوڭعى وقۋ جىلدارىندا اشىلعان «Qazaqstan», «Egemen Qazaqstan», ج.كەنجالين اتىنداعى ءباسپاسوز جانە جاڭا مەديا وقۋ-شىعارماشىلىق زەرتحانالار سەرىكتەس جۇمىس بەرۋشى ۇيىمداردىڭ قولداۋىمەن وقۋ تەحنيكالىق مۇمكىندىكتەردىڭ الاڭىنا اينالدى.
كەزدەسۋ بارىسىندا قازاقستان رەسپۋبليكاسى كونستيتۋتسيالىق كەڭەسىنىڭ توراعاسى, قازۇۋ تۇلەكتەر قاۋىمداستىعىنىڭ پرەزيدەنتى, زاڭ عىلىمدارىنىڭ دوكتورى, پروفەسسور قايرات ءماميدىڭ «تالىمگەرلىك: اركىم يە بولا الاتىن مۇمكىندىكتەر» جوباسى تانىستىرىلدى.
كافەدرانىڭ وسى ورايدا وقۋ-تەحنيكالىق بازاسىن جاڭالاۋدان باستاپ وقۋ ۇردىسىنە, ءبىلىم بەرۋ باعدارلامالارى, مەديا نارىققا بەيىمدەۋگە دەيىنگى تۇلەكتەرمەن ورىندالعان اۋقىمدى جوبالارى اتالدى. «Egemen Qazaqstan» گازەتىنىڭ الماتىداعى تىلشىلەر قوسىنى, «Qazaqstan» ۇلتتىق ارناسىنىڭ الماتى رەداكتسياسى مەن «قازاق گازەتتەرى» جشس بازاسىندا ءباسپاسوز جانە ەلەكتروندى باق كافەدراسىنىڭ فيليالدارى اشىلۋى وقۋ ءۇردىسىنىڭ مەديا وندىرىسكە بەيىمدەلۋىنە جول اشتى.
كافەدرانىڭ ءار جىلدارداعى ءبىتىرۋشى تۇلەگىنىڭ قازۇۋ ستۋدەنتىنە تالىمگەر بولۋ باستاماسىن قولداعان جوعارعى سوت توراعاسىنىڭ كەڭەسشىسى نۇرلان قالقا: «قايرات ابدىرازاق ۇلى ۇسىنعان جوباسىن ماعان وي سالىپ وتىر. ءبىز بۇل باعىتتاعى سەرىكتەستىكتىڭ ءۇش ناقتى قادامىن ايتساق. ءبىرىنشىسى, بيىلعى جىلى تالىمگەر بولۋ باستاماسىنا قۇقىقتىق جۋرناليستيكا سالاسىنا مامان دايارلاۋعا ۇلەس قوسامىز. ەكىنشى باستامامىز, ءباسپاسوز قىزمەتى ماماندارىن سوت سالاسىندا دايارلاۋ قاجەت. ستۋدەنتتەردىڭ سوتتاردىڭ ءباسپاسوز قىزمەتتەرىندە تاجىريبەدەن وتۋىنە كومەك بەرۋ ءىسىن جولعا قويساق. جوعارى كۋرس ستۋدەنتتەرىنىڭ اۋداندىق, وبلىستىق سوتتاردا تاجريبەدەن ءوتۋىن ۇيىمداستىرامىز. ءۇشىنشىسى, قۇقىقتىق سالاعا يكەمى بار ستۋدەنتتەرگە ارناپ, ونلاين شەبەرلىك سىنىپتارىن تۇراقتى ۇيىمداستىرامىز»,- دەپ بىرقاتار ۇسىنىستى اتاپ ءوتتى. جۋرناليستيكادا ماماندانۋ ماسەلەسىنە دە توقتالدى. سپورت نە قۇقىق سالاسىن الساق. ماسەلەن, سوت سالاسىن تەرەڭدەتىن جازعان, بارىمىزگە جاقسى تانىس ادىلدىكتى, ادىلەتتىلىكتى جۋرناليستيكانىڭ باستى قاعيداسىنا اينالدىرعان, زاڭ كۇشىنە مۇقتاج جاندارعا كەڭەس بەرگەن نۇري مۋفتاحتىڭ شەبەرلىگىن ايتۋعا بولادى. الەكساندر تاسبولات – زاڭنىڭ بۇگە-شۇگەسىنە دەيىن زەرتتەپ, ءبىر سالاعا ماماندانعان تانىمال جۋرناليست. زاڭ باپتارىن نە تەرميندەرىن جاي جازىپ, قويماي حالىققا ءتۇسىندىرىپ, بيلىك پەن قوعامنىڭ اراسىنداعى قۇقىقتىڭ دانەكەر بولدى.
كافەدرا تاراپىنان گۇلميرا سەرىكبايقىزى اتالعان ۇسىنىستار بويىنشا وقۋ جوسپارىندا جۋرناليستيكانىڭ قۇقىقتىق نەگىزدەرى بازالىق ءپان رەتىندە وقىتىلىپ وتىرعانىن, سالالىق جاعىنان تەرەڭدەتىپ وقىتاتىن باعدارلاما ازىرلەنەتىنىن اتاپ ءوتتى. جوعارعى سوتتىڭ ءباسپاسوز قىزمەتىمەن تالقىلانعان «قۇقىقتىڭ جۋرناليستيكا انىقتامالىعىن» باسپاعا جىبەرۋ قاجەتتىگى ايتىلدى. جۋرناليستەرگە كۇندەلىكتى زاڭ, قۇقىق, ەتيكا سالاسىندا كەزدەسەتىن تەرميندەر مەن پروتسەستەردى باق ماتەريالدارىندا قولدانۋعا ارنالعان ادىستەمەلىك قۇرال قاجەت. قۇقىقتىق مەديا سالاسىنداعى ۇكىمەتتىك جانە ۇكىمەتتىك ەمەس ۇيىمداردىڭ ۇسىنىسى نەگىزىندە فاكۋلتەتتە ستۋدەنتتىك مەديا كلينيكاسى اشىلسا, سالالىق ماماندار دايارلاۋعا ىقپالى ارتار ەدى دەيدى قاتىسۋشىلار.
فاكۋلتەتتىڭ 5 جىلدىقتان باستاپ 45 جىلدىق تۇلەكتەرىنە دەيىن بىرنەشە بۋىن وكىلدەرى قاتىسقان شارادا ءداستۇرلى مەديادان باستاپ تسيفرلىق مەديا نارىقتىڭ تالاپتارىنا ساي ماماندار دايارلاۋعا تۇلەكتەردىڭ ۇلەسى قارالدى. اتاپ ايتقاندا, تانىمال جۋرناليست, قوعام قايراتكەرى 45 جىلدىق تۇلەكتەر اتىنان ساۋىتبەك ابدراحمانوۆ, توپ مەديا مەنەدجەر ارمانجان بايتاسوۆتىڭ بەينە تىلەكتەرىمەن قاتار, شاراعا 15 جىلدىق تۇلەكتەر, ەسىمى ەلگە تانىس جۋرناليستەر رينات كەرتاەۆ, گۇلناز الىمگەرەي, مەيىرجان اۋەلبەك ۇلى, ميراس مۇقاش, PhD دوكتورلار جۇماعالي ەسەنبەك پەن الما سايلاۋقىزى قاتىسىپ, ارنايى شاكىرتاقى تاعايىندادى. «Kazakh TV» ارناسى اقپاراتتىق باعدارلامالار ءبولىمىنىڭ شىعارۋشى رەداكتورى مانشۇك شىمىرباي, جۋرناليست, جەتىسۋ ۋنيۆەرسيتەتىنىڭ وقىتۋشىسى نازىم دۋتباەۆا, «قازاق راديوسىنىڭ» جۇرگىزۋشىسى گۇلباعىش بوستان شارانىڭ سپيكەرلەرى رەتىندە كافەدرا ستۋدەنتتەرىنىڭ تالىمگەرى اتانىپ, جۋرناليستىك داعدىلارىن دامىتۋ ىسىنە ۇلەس قوسپاق.
«حابار» اق» 25 جىلدىعى, «قازاق راديولارى» جشس 100 جىلدىعى, «قازاقپارات» حالىقارالىق اقپاراتتىق اگەنتتىگى» اكتسيونەرلىك قوعامى 100 جىلدىعى قارساڭىندا كافەدرا مەن جۇمىس بەرۋشى سەرىكتەس ۇيىمدار اراسىنداعى شارالاردىڭ جوسپارلارى تالقىلانۋدا.
