بۇۇ باس اسسامبلەياسىنىڭ بۇرىشتاماسىنا سايكەس, مەرەكە 2002 جىلى بۇكىل الەم بويىنشا قىزمەت اتقارىپ جۇرگەن بىتىمگەرلەردىڭ ءتيىستى جانقيارلىعىنا باعا بەرۋ ءۇشىن جاريالاندى. بۇل كۇن جالپى بەيبىتشىلىك پەن قاۋىپسىزدىككە قول جەتكىزۋگە باعىتتالعان قىزمەتتىڭ ناتيجەلەرىن بىلدىرەدى.
بىتىمگەرلەر تەك قانا قورعاۋشىلار ەمەس, ولار سونىمەن قاتار جاسامپاز. ولاردىڭ مىندەتتەرىنە داعدارىستى جاعدايلاردى شەشۋ مەن بەيبىتشىلىكتى قولداۋ كىرەدى.
قازبات قازاقستاندىق بىتىمگەرشىلىك باتالونى 2002 جىلى قازاقستان قارۋلى كۇشتەرىنىڭ بىتىمگەرشىلىك ميسسيالارىنا قاتىسۋى ءۇشىن قۇرىلدى. 2003 جىلدىڭ تامىز ايىندا قازبات ينجەنەرلىك-ساپەرلىك جاساعى كواليتسيانىڭ تۇراقتاندىرۋ كۇشتەرى قۇرامىندا يراكقا جىبەرىلدى. 2008 جىلدىڭ قازان ايىنا دەيىن بىرنەشە روتاتسيا وتكىزىلدى, يراكتاعى بىتىمگەرشىلىك ميسسيادا 250-دەن استام قازاقستاندىق اسكەري قىزمەتشى قىزمەت اتقاردى. ولار مينالى الاڭداردى زالالسىزداندىرىپ, جارىلىس قاۋپى بار زاتتاردى جويدى.
كەيىن كوت-د'يۆۋار جانە باتىس ساحاراداعى بەيبىتشىلىكتى قولداۋ جونىندەگى بۇۇ ميسسيالارىنا اسكەري باقىلاۋشىلار رەتىندە قاتىستى. ايتا كەتۋ كەرەك, باتىس ساحاردا ءالى كۇنگە دەيىن ءبىزدىڭ التى بىتىمگەر قىزمەت اتقارادى, ونىڭ ىشىندە ەكى ايەل اسكەري قىزمەتشى بار.
2018 جىلدان باستاپ قازاقستان بىتىمگەرشىلىك الەۋەتىن ىسكە اسىرۋدىڭ جاڭا مۇمكىندىگىنە يە بولدى. تاريح بەتتەرىندە العاش رەت بۇكىل بولىمشە, ءبىرىنشى بىتىمگەرشىلىك روتاسى «ليۆانداعى بۇۇ ۋاقىتشا كۇشتەرى» ميسسياسىنا قاتىسۋعا باعىتتالدى. بۇگىنگى تاڭدا ءۇشىنشى بىتىمگەرشىلىك روتاسى قىزمەت اتقارۋدا, ونىڭ ورنىنا ءتورتىنشى روتا دايىندىق جۇرگىزۋدە. قازاقستاندىق كونتينگەنت ءۇندى باتالونىنىڭ قۇرامىندا ءوز جاۋاپكەرشىلىگى ايماعىندا مىندەتتەردى ورىندايدى. اتاپ ايتقاندا جەرگىلىكتى جەردى پاترۋلدەۋدى, باقىلاۋ بەكەتتەرىن ۇيىمداستىرۋدى, حالىققا كومەك كورسەتۋدى جۇزەگە اسىرادى, سونداي-اق ميسسيا شتابى وتكىزەتىن بارلىق ءىس-شارالارعا قاتىسۋ.
قازاقستاندىق بىتىمگەرلەر وزدەرىن ناعىز كاسىبي ماماندار رەتىندە كورسەتە ءبىلدى. ولار تاماشا جاۋىنگەرلىك دايارلىقتى, كەز كەلگەن قويىلعان مىندەتتەردى شەشۋدە توزىمدىلىك پەن ازىرلىكتى كورسەتۋدە, بۇل بۇۇ ميسسياسىنىڭ باسشىلىعىمەن دە جوعارى باعالانادى.
قازاقستاندىق بىتىمگەرلەر قىزمەتىنىڭ ۇيىمىن قورعانىس ءمينيسترى جوعارى باعالادى. ول اسكەري قىزمەتشىلەرگە بەيبىتشىلىك پەن قاۋىپسىزدىكتى قامتاماسىز ەتۋ جولىندى قىزمەتتەرىنە ساتتىلىك, سونداي-اق, دەنساۋلىق پەن اماندىق تىلەدى.
قازاقستاندىق بىتىمگەرلەردىڭ جەتىستىكتەرى اسكەري قىزمەتشىلەر ميسسيا قۇرامىنا كىرۋ ءۇشىن وتەتىن دايارلىقتىڭ ساپاسىمەن تىكەلەي بايلانىستى. قازاقستان قارۋلى كۇشتەرىندە بىتىمشىلەردى دايارلاۋمەن قورعانىس مينيسترلىگىنىڭ بىتىمگەرشىلىك دايارلىق ورتالىعى, ميناسىزداندىرۋ ورتالىعى جانە اسكەري مەديتسينا ورتالىعى اينالىسادى. نۇسقاۋشىلار بولاشاق بىتىمگەرلەردى جان-جاقتى دايىندايدى. اسكەري قىزمەتشىلەر پسيحولوگيالىق تەستىلەۋدەن, مەديتسينالىق تەكسەرۋدەن وتەدى, حالىقارالىق ستاندارتتارعا سايكەس اعىلشىن ءتىلى تەستتەرىن جانە قازاقستان قۇرلىق اسكەرلەرىنىڭ بىتىمگەرشىلىك بولىمشەلەرىنىڭ جاۋىنگەرلىك دايارلىق باعدارلاماسى بويىنشا, تەوريالىق جانە پراكتيكالىق دايىندىقتان تاپسىرادى. ميسسيادان كەلگەندەردە ءوز تاجىريبەلەرىمەن بولىسەدى.
ۇلتتىق بولىمشەنىڭ بىتىمگەرشىلىك ميسسياعا قاتىسۋى حالىقارالىق قاۋىپسىزدىكتى نىعايتۋعا ۇلەس قوسۋعا مۇمكىندىك بەرەدى جانە ەلدىڭ حالىقارالىق قوعامداستىقتىڭ جاۋاپتى مۇشەسى رەتىندەگى بەدەلىن نىعايتۋعا قىزمەت ەتەدى.
