بيىل العاشقى ءۇش ايدا كارتوچكامەن جاسالعان تولەم كولەمى ۇزدىكسىز وسكەن بولاتىن. ءساۋىر ايىندا بۇل وڭ ديناميكا كۇرت تومەندەپ, 18 پايىزعا, ياعني 1 763,7 ملرد تەڭگەگە قۇلدىرادى. سوعان قاراماستان, بىلتىرعىمەن سالىستىرعاندا كورسەتكىش 2,1 ەسە جوعارى ەكەنىن ايتا كەتۋ كەرەك. بىلتىر ءساۋىر ايىندا بۇل 839,7 ملرد تەڭگە بولعان ەدى.
رەسپۋبليكا بويىنشا قولما-قول اقشاسىز جاسالعان وپەراتسيالار كولەمى بويىنشا الدىڭعى ورىندا الماتى قالاسى تۇر. ودان كەيىنگى ورىنعا نۇر-سۇلتان مەن تۇركىستان وبلىسى جايعاستى. ءوسىم ديناميكاسى بويىنشا دا وسى ءۇش ءوڭىر كوش باستاپ تۇر.
– جالپى, حالىقتىڭ قولما-قول اقشاسىز تولەگەن «ورتاشا چەگىنىڭ» كولەمى ءساۋىر ايىندا 12 976 تەڭگەنى قۇرادى. ياعني ناۋرىز ايىنداعى 13,279 تەڭگەدەن ازداپ تومەندەگەنى بايقالدى. ال بانكوماتتان العان قاراجاتىنىڭ ورتاشا سوماسى – 50 875 تەڭگە, – دەلىنگەن قاۋىمداستىق تاراتقان اقپاراتتا. قازاقستاندىقتاردىڭ ۇنەمدەۋگە كوشكەنىن وسى كورسەتكىشتەرگە قاراپ بىلۋگە بولادى.
ءساۋىر ايىندا POS-تەرمينال ارقىلى جاسالعان تولەمدەردىڭ جالپى سوماسى 35,1 پايىزعا ازايىپ, 292,3 ملرد تەڭگەنى قۇراعانى انىقتالدى. ال ينتەرنەت ارقىلى تولەمدەر كولەمى 12,9 پايىزعا ازايىپ, 1 462,1 ملرد تەڭگە بولدى. وسىلايشا جالپى قولما-قول اقشاسىز جاسالعان تولەمدەردىڭ باسىم بولىگى, ياعني 82,9 پايىزى ينتەرنەت ارقىلى جاسالسا, 16,6 پايىزى POS-تەرمينال ارقىلى تولەنگەن.
قازاقستان قارجىگەرلەر قاۋىمداستىعىنىڭ حابارلاۋىنشا, ۋاقىت وتكەن سايىن POS-تەرمينال ارقىلى جاسالعان ترانزاكتسيا كولەمى قۇلدىراپ بارادى. سوڭعى 12 ايدا 18 پايىزعا تومەندەگەنى وسىنى كورسەتىپ وتىر.
حالىقتىڭ تولەم قابىلەتىنە ۇلتتىق ۆاليۋتانىڭ دوللارعا شاققانداعى باعامى دا اسەر ەتەتىنى تۇسىنىكتى.
كەشە Brent باررەلى 36 دوللاردان كوتەرىلگەن-ءدى. سايكەسىنشە KASE-ءنىڭ كۇندىزگى سەسسياسىندا ۇلتتىق ۆاليۋتامىز 411,6 تەڭگەدەن ساۋدالانا باستادى.
