وتكەن اپتادا جاپوندىق Nissan Motor ءوندىرۋشىسى نەگىزىنەن ەۋروپا ايماعىندا جانە دامۋشى ەلدەردە 20000 قىزمەتكەرىن جۇمىستان شىعارۋ ويلاستىرىپ وتىرعانى بەلگىلى بولعان بولاتىن. ال بۇگىن فرانتسيانىڭ ەكونوميكا ءمينيسترى برۋنو لە مەر بۇقارالىق اقپارات قۇرالدارىنا Renault اۆتوكولىگىن شىعارۋ ۋاقىتشا توقتاتىلعانىن ايتتى. فرانتسيانىڭ ەكونوميكا جانە قارجى ءمينيسترى برۋنو لە مە بۇگىن جۋرناليستەرمەن كەزدەسكەن كەزدە شىنايى بولۋىمىز كەرەك ەكەنىن, تەك شىندىقتى ايتۋعا ءماجبۇر بولىپ وتىرعانىن ايتىپتى. «داعدارىستىڭ قانشالىقتى اۋىر ەكەنىن جاسىرعان ەمەسپىن جانە Renault-پەن بولعان جاعدايدى جاسىرمايمىن. الايدا مەن Renault-تىڭ ارتىندا وتە ءبىلىمدى ماماندار تۇرعانىن بىلەمىن. سول سەبەبى ءوندىرىستى توقتاتۋعا شەشىم قابىلدادىق. بۇل ۋاقىتشا تىنىس الۋعا مۇمكىندىك بەرەدى» دەپ اعىنان جارىلدى.
ءمينيستردىڭ بۇل مالىمدەمەسى فرانتسۋزدىق باق-تىڭ Renault باسشىلىعى ەلدەگى بىرنەشە ءوندىرىس ورىندارىن, سونىڭ ىشىندە پاريج ماڭىنداعى فلەن قالاسىنداعى زاۋىتتى جابۋ تۋرالى نيەت بىلدىرگەن جورامالدارىنان كەيىن پايدا بولدى. كومپانيا پاندەميادان بۇرىن قيىن قارجىلىق جاعدايعا تاپ بولدى, بىراق ونىڭ باستالۋىمەن بارلىق زاۋىتتارىن جابۋعا ءماجبۇر بولدى. ەۋروپادا ءساۋىر ايىندا كورپوراتسيانىڭ جاڭا اۆتوموبيلدەرىنىڭ ساتىلىمى 76% -دان استام تومەندەدى. ءاۆتووندىرۋشى بيلىكتەن 5 ميلليارد ەۋرو نەسيە بەرۋدى سۇرادى.
كەلەسى اپتادا فرانتسيا پرەزيدەنتى ەممانۋەل ماكرون فرانتسۋز وندىرۋشىلەرىنە قولداۋ كورسەتۋ جوسپارىن ۇسىنادى. بيلىك Renault ۇسىنعان تالاپتاردىڭ ءبىرى - ونىڭ ەۋروپاداعى ەلەكتروموبيلدەرگە ارنالعان اككۋمۋلياتور ءوندىرىسى باعدارلاماسىنا اكتسيونەر رەتىندە قاتىسۋى.
Peugeot جانە Total Energy Corporation دا جوباعا قاتىسادى. «2019 جىلدىڭ ءبىرىنشى جارتىسىندا, وتكەن جىلدىڭ وسىنداي كەزەڭىمەن سالىستىرعاندا, قازاقستاندا Renault كولىگىنىڭ ساتىلۋى ەكى ەسەگە ارتىپ, ونىڭ سانى ءتورت مىڭ اۆتوموبيلگە جەتتى» دەپ حابارلادى «ۆەدوموستي» اقپارات قۇرالى.
بەلورۋسيادا Renault اۆتوكولىگىنىڭ ساتىلۋى 29 پايىزعا ارتىپ, 2100 اۆتوموبيلگە جەتسە, رەسەيدە سەگىز پايىزعا تومەندەپ, 96 421 ءاۆتوموبيلدى قۇراعان. باسىلىمنىڭ مالىمەتىنە قاراعاندا, كەدەندىك ەلدەر اۋماعىندا رەسەيدە جاساپ شىعارىلعان Renault اۆتوكولىگىنىڭ ساتىلىمى جوعارى. ساراپشىلاردىڭ پايىمداۋىنشا, بۇل كەدەندىك باج سالىعىنىڭ بولماۋىمەن بايلانىستى.
Renault اۆتوكونتسەرنى 2018 جىلى ەاەو ەلدەرىنە وداق ەلدەرى اۋماعىنا ەكسپورتتى ەكى ەسەگە ارتتىرۋدى جوسپارلاعانىن, باستى يمپورتەر قازاقستان بولادى دەپ دەپ ۇمىتتەنىپ وتىرعانىن ايتقان. «اسم-حولدينگىنىڭ» مالىمەتىنە قاراعاندا, قازاقستاندا 2018 جىلى جەڭىل كولىك ساۋداسى ەكى ەسەگە ارتىپ, 153 665 ءاۆتوموبيلدى قۇراسا, ال Renault كولىگىنىڭ ساتىلۋى ءتورت ەسەدەن ارتىق ءوسىپ, 4920 اۆتوموبيلگە جەتكەن. بۇل كولىك ماركالارى ىشىندە سەگىزىنشى ورىن بولىپ تابىلادى.
2018 جىلى بەلارۋس ەلىنىڭ جەڭىل كولىك نارىعىندا ءوسىم 1/3 بولىپ, 23 991 ءاۆتوموبيلدى قۇراعان.
ال Renault كولىگىنىڭ ساتىلىمى 1,8 ەسەگە ارتىپ, 3305 ءاۆتوموبيلدى قۇراپ, جەتەكشى ورىندى يەلەنگەن.
