كونفەرەنتسيادا پىكىر بىلدىرگەن مامانداردىڭ مالىمدەۋىنشە, كارانتيننەن كەيىن جەكەمەنشىك 4428 مەكتەپكە دەيىنگى ءبىلىم بەرۋ مەكەمەسى جۇمىسىن توقتاتۋى مۇمكىن. بۇل 339 مىڭعا جۋىق بالا بالاباقشاعا بارا المايدى دەگەن ءسوز. ونسىز دا بالاقايلاردى مەملەكەتتىك بالاباقشامەن قامتۋ ماسەلەسى كۇيىپ تۇرعاندا بۇل جاعدايدى ودان ءارى ۋشىقتىرادى. بۇعان وسى جىلدىڭ 12 مامىرىنان باستاپ مەملەكەتتىك تاپسىرىس تەك ناقتى بالالاردىڭ سانى ءۇشىن تولەنەتىندىگىمەن بايلانىستى. ال قازىر بالاباقشالاردا كەزەكشى توپتا نەبارى 15 بالا تاربيەلەنۋى كەرەك دەگەن تالاپ بار. ال توپتاعى ساناۋلى بالاعا كورسەتىلەتىن قىزمەكە قاراماستان بالاباقشا قۇرىلتايشىلارى قىزمەتكەرلەرگە تولىق كولەمدەگى اقى تولەۋگە مىندەتتى.
«اتامەكەن» ۇكپ باسقارما توراعاسىنىڭ ورىنباسارى ولجاس ورداباەۆ جەكەمەنشىك بالاباقشا قۇرىلتايشىلارى, ۇزدىكسىز ءبىلىم بەرۋ قاۋىمداستىعى, سونداي-اق, Biliminvest قاۋىمداستىعى وكىلدەرى قاتىسقان باسقوسۋدا:
– سوڭعى ەكى اپتا كولەمىندە جەكەمەنشىك بالاباقشالار قارجى ماسەلەسىنە قاتىستى ءوز پروبلەمالارىن ايتىپ شاعىمدار تۇسىرۋدە. بۇل ماسەلەلەر ۋاقىت وتە شەشىلەدى دەگەن ءۇمىت بارىمىزدە بولعان. الايدا جەكەمەنشىك مەكتەپكە دەيىنگى ۇيىمدارعا مەملەكەتتىك تاپسىرىستار تەك مەكەمە قىزمەتىن پايدالانعان بالا سانىنا قاراي بەرىلەدى جانە قىزمەتكەرلەرىن قارجىمەن قۇرىلتايشىلار وزدەرى قامتۋى كەرەك دەگەن تالاپ تا بار ەكەن. ال شىعىندى اتا-انالار وتەي الا ما؟ ارينە, جوق. ونىڭ ۇستىنە, كوپتەگەن قازاقستاندىقتار بالاباقشاعا بالالارىن جىبەرۋدەن باس تارتۋدا. بۇعان قارجى ماسەلەسى مەن ەلدەگى كارانتين سەبەپ, – دەدى.
توتەنشە جاعداي تۋىنداعانعا دەيىن مەملەكەتتىك تاپسىرىس بويىنشا جۇمىس ىستەگەن جەكە مەكتەپكە دەيىنگى ۇيىمدار جالاقى, كوممۋنالدىق قىزمەتتەر, جالداۋ جانە سالىق تولەمدەرىنەن قوماقتى قارىزدار جيناپ, جۇمىس ىستەۋگە ءماجبۇر بولعان. ويتكەنى «پەداگوگ مارتەبەسى تۋرالى» زاڭىنىڭ الەۋمەتتىك كەپىلدەمەسى كاسىپكەردىڭ موينىندا. بۇل جەكە بالاباقشالاردى جان باسىنا قارجىلاندىرۋ ادىستەمەسىنىڭ ەنگىزىلۋىمەن دە بايلانىستى بولىپ وتىر.
وسىعان وراي ۇزدىكسىز ءبىلىم بەرۋ قاۋىمداستىعىنىڭ اقمولا وبلىستىق فيليالى ديرەكتورىنىڭ ورىنباسارى شولپان ۋتەگەنوۆا:
– ءبىز 2014 جىلدان بەرى جان باسىنا شاققاندا 23 869 تەڭگە كولەمىندە ءار بالاعا قارجى الىپ كەلدىك. جىل سايىنعى قىمباتشىلىق ماسەلەسى ەسكەرىلمەدى. تەك 2017 جىلى جاڭا ادىستەمە قابىلداندى. بىراق ول ءالى كۇنگە ىسكە اسىرىلمادى. ەندى ونى دا مەملەكەت توپتاعى بالا سانىنا قاراي بەرەر بولسا, جەكەمەنشىك بالاباقشالار جابىلا باستايدى. ونىڭ ۇستىنە, قىزمەتكەرلەردى ماتەريالدىق قولداۋ قۇرىلتايشى موينىنا جۇكتەلدى. بۇل نەگىزسىز. ءبىز اتا-انالار قالتاسىنان وتەلەتىن قارجىنى 16 مىڭ تەڭگەدەن اسىرۋعا قۇقىعىمىز جوق. وعان قوسا, قازىر اتا-انالار دا بالالارىن بالاباقشاعا بەرۋدەن قورقادى, – دەدى.
قوسا كەتۋ كەرەك, مەكتەپكە دەيىنگى ءبىلىم بەرۋ سالاسىندا جەكەمەنشىك بالاباقشالاردىڭ 60%-دان كوبى اتا-انا تولەمى ەسەبىنەن مەملەكەتتىك تاپسىرىسسىز جۇمىس ىستەيدى.
