فيفا ماماندارى مەن قازاقستان فۋتبول فەدەراتسياسىنىڭ تەحنيكالىق ورتالىعىنىڭ جەتەكشىلەرى قاتىسقان ونلاين-كونفەرەنتسيادا Talent Development – Football Ecosystem Analysis باعدارلاماسىن ىسكە قوسۋ جولدارىنا توقتالدى.
اۋقىمى كەڭ باعدارلامانىڭ جەتەكشىسى – اتى الەمگە تانىمال باپكەر, قازىرگى تاڭدا فۋتبول قاۋىمداستىقتارىنىڭ حالىقارالىق فەدەراتسياسىنىڭ قىزمەتكەرى ارسەن ۆەنگەر. بىرنەشە جىلدان بەرى ول فيفا-نىڭ الەم فۋتبولىن دامىتۋ ءبولىمىن باسقاردى.
«باعدارلاما ارقىلى ءار بالا ءوزىنىڭ شەبەرلىگىن كورسەتە الادى. كوپتەگەن ەلدە ۇلتتىق قۇراماعا باسا نازار اۋدارادى. ۇلتتىق قۇرامانىڭ ويىنى ەلدەگى فۋتبولدىڭ دامۋ دەڭگەيىنە اسەر ەتەتىنى انىق. الايدا, جەتىستىككە ءبارى بىردەي جەتە بەرمەيدى. ەۋروپا مەن الەمنىڭ باسقا ەلدەرىندەگى فۋتبولدىڭ اراسىندا ۇلكەن ايىرماشىلىق بار. جاس دارىنداردى انىقتاپ, ولاردىڭ ءوسۋىن قامتاماسىز ەتۋگە باعىتتالعان جوبالار عانا جاعدايدى رەتتەي الادى», دەپ مالىمدەدى فيفا-نىڭ فۋتبولدى دامىتۋ ءبولىمىنىڭ باسشىسى ارسەن ۆەنگەر.
ارسەن ۆەنگەردىڭ Talent Development – Football Ecosystem Analysis باعدارلاماسىندا رايمونداس ستاتكياۆيچۋس جانە ەدۆيناس ەيمونتاستان باسقا دا كوپتەگەن مىقتى ماماندار بار. ولاردىڭ اراسىندا اقش ايەلدەر قۇراماسىن جاتتىقتىرعان ەيپريل حاينريحس پەن انگليا قۇراماسىنىڭ باس باپكەرىنىڭ مىندەتىن اتقارعان ستيۆ ماكلارەن بار.
«جوبانىڭ مىندەتى – فۋتبول مەكتەپتەرىنىڭ دارىندى تاربيەلەنۋشىلەرىن انىقتاپ, ولاردى دامىتۋ ءۇشىن قولايلى جاعداي جاساۋ. باعدارلام ەڭ الدىمەن قازاق فۋتبولىن زەرتتەيدى. دارىندى جاستاردىڭ شەبەرلىگىن ارتتىرۋ مەن تاربيەلەۋ جولدارى, سەلەكتسيا مەن ينفراقۇرىلىم ماسەلەلەرىن تولىق ۇعىنۋ كەرەك. ءار ۇلتتىق قاۋىمداستىقپەن جەكە جۇمىس جۇرگىزەمىز. جاستاردى دامىتۋ جولى كەيبىر ەلدەردە ۇقساس بولىپ كەلەدى. كەي جاعدايدا دارىندى جاستاردى ءارتۇرلى سەبەپتەرمەن كوزگە ىلىنبە قالىپ جاتادى. وسىنداي جاعدايلاردى ازايتۋعا تىرىسامىز», دەيدى فيفا ساراپشىسى ەدۆيناس ەيمونتاس.
«جاس تالانتتاردى ىزدەۋ ءۇش نەگىزگى بولىمنەن تۇرادى. دارىندى تاريبەلەنۋشىلەردى انىقتاۋ, ولاردىڭ ورتاسىن قالىپتاستىرۋ جانە جۇمىسقا كاسىبي بىلىكتىلىگى جوعارى باپكەرلەردى قابىلداۋ. باعدارلاما ءار ەلدەگى ءۇمىتى بار ويىنشىلاردى دامىتۋ ماقساتىندا جۇزەگە اسىرىلادى. زەرتتەۋ جۇمىستارىنىڭ اۋقىمى كەڭ. تالداۋ! ناتيجە! فۋتبولدىڭ دەڭگەيىن كوتەرۋدى قامتاماسىز ەتۋ ءۇشىن ۇلتتىق فۋتبول قاۋىمداستىقتارىمەن بەلسەندى ىنتىماقتاستىق كۇتىپ تۇر», دەپ اتاپ ءوتتى ستيۆ ماكلارەن.
فيفا-نىڭ رەسمي مالىمەتى بويىنشا, Talent Development – Football Ecosystem Analysis باعدارلاماسىنا نەگىزگى كريتەريلەر بويىنشا ىرىكتەلىپ الىنعان فۋتبول مەكتەپتەرى ەنەدى:
- وقۋ-جاتتىعۋ جيىنىن جۇرگىزۋ ءۇشىن جەكە نەمەسە ۇزاق مەرزىمدى جالعا الىنعان تۇراقتى سپورت عيماراتىنىڭ بولۋى;
- قازاقستاننىڭ ءارتۇرلى جاسوسپىرىمدەر قۇراماسىنا شاقىرتۋ العان ويىنشىلار سانىنىڭ كوپتىگى;
- كەم دەگەندە ءۇش جاس ەرەكشەلىگى بويىنشا تاربيەلەنۋشىلەر توبى بولۋى قاجەت. ونىڭ بىرەۋى 17 جاسقا دەيىنگى جاسوسپىرىمدەر قۇراماسىنىڭ كاتەگورياسىنا سايكەس كەلۋى ءتيىس;
- شتاتتا كەم دەگەندە ءۇش باپكەر بولۋى قاجەت;
- ديرەكتور باسقا كلۋبتا نەمەس وزگە قىزمەتتە بولماۋى ءتيىس;
- ۇلتتىق قاۋىمداستىق ۇيىمداستىراتىن بالالار مەن جاسوسپىرىمدەر اراسىنداعى جارىستارعا تۇراقتى قاتىسۋى قاجەت.
«فيفا-نىڭ جاھان فۋتبولىن دامىتۋ ءبولىمىن باسقاراتىن ارسەن ۆەنگەردىڭ فۋتبولشىلارمەن جەكە جۇمىس ىستەي الاتىن كەرەمەت مامان ەكەنىن بىلەمىز. اسىرەسە, دارىندى جاستاردىڭ جولىن تابا الادى. بەدەلدى ماماننىڭ تاجىريبەسى ارقىلى ۇسىنىلعان باعدارلامانىڭ ماڭىزى زور. ءار ەلگە ارنالعان جوبانىڭ تابىستى جۇزەگە اسىرىلاتىنىنا سەنىم مول», دەيدى قازاقستان فۋتبول فەدەراتسياسىنىڭ باس حاتشىسى ازامات ايتقوجين.
