سونداي-اق, كوممەرتسيالىق كومپانيالار تاراپىنان “سيمەنس قازاقستان” جشس, “Robert Bosch” - ءThermotechnىk Bosch جشس, ءWىrtgen ءىnternatىonal GmbH, C.ءىllىes&Co, الماتى ستروي ينسترۋمەنت جانە ءAllىanz قازاقستان ساقتاندىرۋ كومپانيالارى وكىلدەرى دە بىرگە بولدى. بۇگىندە وبلىستاعى 8 ءوندىرىس ورنى نەمىس ەلىمەن تۇراقتى ارىپتەستىك بايلانىس ورناتقان. قوناقتاردى جىلى قابىلداعان جامبىل وبلىسىنىڭ اكىمى ق. بوزىمباەۆ ولاردى وبلىس تاريحىمەن, ەكونوميكالىق جاعدايىمەن تانىستىردى. كەزدەسۋ بارىسىندا ءوزارا بايلانىستار تۋرالى بىرنەشە مەموراندۋمعا قول قويىلدى.
كوسەمالى ساتتىباي ۇلى. جامبىل وبلىسى.
زاڭگەر كوپ, ۆەتەرينار جوق. بيىلعى “جۇمىس جارمەڭكەسى” ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە ەكى كۇن بويى ءوتتى. العاشقى كۇنى جۇمىس بەرۋشىلەرگە وقۋ ورنى اۋىل شارۋاشىلىعىنا قاجەتتى جانە ينجەنەرلىك, ەكونوميستىك ماماندىقتاردى ۇسىندى. ال ەكىنشى كۇنى ولار وزدەرىنىڭ بولاشاق قىزمەتكەرلەرىن گۋمانيتارلىق, زاڭ جانە اقپاراتتىق تەحنولوگيا فاكۋلتەتتەرىنەن تاڭداۋعا مۇمكىندىك الدى. جىل سايىن ءداستۇرلى وتەتىن بۇل جارمەڭكەگە وبلىس اۋماعىنان سەكسەننەن اسا كاسىپورىن, مەكەمە باسشىلارى قاتىستى. ەكونوميكانىڭ دامۋىنا بايلانىستى “جۇمىس جارمەڭكەسىندە” سۇرانىسقا يە ماماندىق تۇرلەرى كوبەيىپ كەلەدى. سونىڭ اراسىندا سوڭعى جىلدارى مال دارىگەرى ماماندىعىن سۇرايتىندار وتە كوپ. مۇنان كەيىن بولاشاق فيلولوگتار مەن پروگرامميستەردى قىزمەتكە شاقىرعاندار دا بارشىلىق بولدى. ال زاڭگەرلەر مەن ەكونوميستەرگە وبلىستىڭ ەڭبەك رىنوگىندا ەشقانداي قاجەتتىلىك جوق.
ءنازيرا جارىمبەتوۆا. قوستاناي.
ۇزدىك ۇستازدار ماراپاتتالدى. وبلىستا ەكىنشى جىل قاتارىنان وتكىزىلىپ كەلە جاتقان قازاق ءتىلى مەن ادەبيەتى پاندەرىن وقىتاتىن ۇستازدار اراسىندا جوعارى ناتيجەگە جەتكەن ۇزدىك مۇعالىمدەر بايقاۋىنىڭ جەڭىمپازدارى مەن جۇلدەگەرلەرى انىقتالدى. وبلىس اكىمى تاعايىنداعان گرانت پەن “قازاق ءتىلى مەن ادەبيەتىنىڭ ۇزدىك مۇعالىمى” اتاعىن قازاق مەكتەپتەرى ۇستازدارى اراسىنان شالقار اۋدانىنداعى ءالىبي جانگەلدين اتىنداعى ورتا مەكتەپتىڭ مۇعالىمى سايا تولەۋوۆا, ال ورىس مەكتەپتەرى ۇستازدارى اراسىنان العا اۋدانى, شيباەۆكا ورتا مەكتەبىنىڭ مۇعالىمى بەرىك ورازوۆ يەلەنىپ, ءبىرىنشى دارەجەلى ديپلوم مەن ءبىر جىل بويى اي سايىن ەڭبەكاقىلارىنا قوسىلاتىن 50 مىڭ تەڭگە گرانتتى جەڭىپ الدى. ەكىنشى دارەجەلى ديپلومعا يە بولعان ءۇش ۇستازدىڭ ارقايسىسىنا ءبىر رەتتىك 170 مىڭ تەڭگە, ءۇشىنشى دارەجەلى ديپلوم العان بەس مۇعالىمنىڭ ارقايسىسىنا ءبىر رەتتىك 120 مىڭ تەڭگە اقشالاي سىيلىق تاپسىرىلدى.
ساتىبالدى ءساۋىرباي. اقتوبە وبلىسى.
ءداستۇرلى قايىرىمدىلىق اكتسياسى. “پەترو كازاقستان قۇمكول رەسورسيز” اق-تىڭ سپورتتىق-ساۋىقتىرۋ كەشەنىندە 300 جەتىم, مۇگەدەك جانە از قامتاماسىز ەتىلگەن وتباسىلارىنىڭ بالالارىنا ارنالعان ءداستۇرلى قايىرىمدىلىق اكتسياسى وتكىزىلدى. قايىرىمدىلىق شاراسىن اتالمىش قوعامنىڭ باسقارما توراعاسى فان تسزياچجۋن قۇتتىقتاۋ سوزبەن اشىپ, بۇدان سوڭ تەاترلاندىرىلعان كورىنىس قويىلىپ, ۇلتتىق سالت-ءداستۇر پاش ەتىلدى. بۇلدىرشىندەرگە ارنايى دايىندالعان سىيلىقتار تاراتىلىپ, قايىرىمدىلىق شاراسىن قالا ونەرپازدارى ءان شاشۋمەن ورنەكتەپ وتىردى.
ەركىن ءابىل. قىزىلوردا.
تۋعان جەرگە تاعزىم. جاقىندا اياگوز اۋدانىنىڭ اكىمى نۇرعالي ازىمباەۆ “تۋعان جەرگە تاعزىم” اكتسياسى اياسىندا ءبىر توپ ىسكەر ادامدارمەن جولىقتى. ولار وزدەرىنىڭ كىندىك قانى تامعان جەرلەرىنىڭ كوركەيۋى ءۇشىن قارجى اياماي, كومەك جاسايتىندارىن تىلگە تيەك ەتتى. ن.ازىمباەۆ بيىل اتقارىلاتىن شارالار جونىندە اڭگىمەلەدى. سونىمەن, اياگوزدىك ىسكەر جاندار جىل كولەمىندە 700 ميلليون تەڭگەنى اۋدان ەكونوميكاسى مەن مادەنيەتىنىڭ وركەندەۋىنە اۋداراتىن بولدى. نەسى بار, قۇپتارلىق باستاما.
وڭداسىن ەلۋباي. شىعىس قازاقستان وبلىسى, اياگوز اۋدانى.
كۇن تارتىبىندە ەكولوگيا ماسەلەسى. الماتى وبلىسى بويىنشا بالقاش-الاكول ەكولوگيالىق دەپارتامەنتىندە “يننوۆاتسيالىق جوبالاردى ەكولوگيالىق-ەكونوميكالىق باعىتتاۋ” جونىندە ارنايى ماسەلە قارالدى. جيىندا, سونىمەن قاتار, وندىرىستىك-ەكولوگيالىق باقىلاۋدى جۇزەگە اسىرۋ بويىنشا 2010-2014 جىلدارعا ارنالعان مەملەكەتتىك باعدارلاماداعى ەكولوگيالىق ساراپتامالارعا مونيتورينگ جۇرگىزۋ, وندىرىستىك قالدىقتار مەن ولاردى تۇتىنۋ تۋرالى ماسەلەلەر تالقىلاندى. وتكەن جىلى وسى ماسەلەلەرگە بيۋدجەتتەن 5,6 ملرد. تەڭگە ءبولىنىپ, ونىڭ 479,3 ملن. تەڭگەسى وبلىس, 5,1 ملرد. تەڭگەسى الماتى قالاسىنا بولىنگەنى, ەكولوگياعا قاتىستى باعدارلامالاردىڭ ورىندالعانى دا ايتىلدى.
كۇمىسجان بايجان. الماتى وبلىسى.
ەسكەرتكىش تاقتا ورناتىلدى. سولتۇستىكقازاقستاندىقتار ۇلى وتان سوعىسىنىڭ ارداگەرى, كسرو حالىق مۇعالىمى, “پاراسات”, “قىزىل جۇلدىز” وردەندەرىنىڭ يەگەرى گريگوري كۋبراكوۆتىڭ ەسىمىن مامليۋت ساناتوري-مەكتەپ ينتەرناتىنىڭ تۇڭعىش ديرەكتورى رەتىندە ۇلكەن قۇرمەتپەن اتايدى. ۇيىمداستىرۋشىلىق قابىلەت-قارىمى زور تالانتتى پەداگوگتىڭ 90 جىلدىق مەرەيتويى ول شيرەك عاسىرعا جۋىق باسشىلىق ەتكەن ءبىلىم ۇياسىندا كەڭىنەن اتالىپ ءوتتى. وعان وبلىس اكىمى سەرىك ءبىلالوۆ, مارقۇمنىڭ تۋعان-تۋىستارى, ارىپتەستەرى, شاكىرتتەرى قاتىستى. سانالى عۇمىرىن جاس ۇرپاق تاربيەسىنە ارناعان ونىڭ قۇرمەتىنە ەسكەرتكىش تاقتا ورناتىلدى. ايماق باسشىسى ۇجىمعا ءۇي كينوتەاترىن تارتۋ ەتتى. رەسەيدىڭ چەليابى وبلىسىندا تۇرىپ جاتقان قىزى ناتاليا ۆورونتسوۆا ايتۋلى شاراعا ارنايى كەلىپ, اكەسى جايلى تەبىرەنە سىر شەرتتى. ۇلى جەڭىستىڭ 25 جىلدىعى كەزىندە ونىڭ باستاماسىمەن ەگىلگەن اعاش كوشەتتەرى بۇگىندە مەكتەپ ماڭىن سايالى باققا اينالدىرعان.
ءومىر ەسقالي. سولتۇستىك قازاقستان وبلىسى.
