– پرەزيدەنتتىك كادرلىق رەزەرۆىنە قاتىسۋعا نە تۇرتكى بولدى؟ ىرىكتەۋ قالاي ءوتتى؟
– پرەزيدەنتتىڭ كادرلىق رەزەرۆى جاستار ءۇشىن الەۋمەتتىك ليفت, ءوز سالاسىندا جەتىستىككە جەتۋ مۇمكىندىگى دەپ بىلەمىن. مەنىڭشە, قازىرگى جۇيەدە بيۋروكراتيانىڭ ۇشقىنى ءالى دە بايقالادى. شەشىم قابىلداۋدا تىڭ كوزقاراستىڭ جەتىسپەيتىنى دە كوزگە ۇرىپ تۇرادى. جاستار جاڭا لەپ, وزگەرىس الىپ كەلەدى دەپ سەنەمىن. بۇل جاستاردىڭ مىندەتى دە. جوباعا قاتىسۋ – بەلسەندى ازاماتتىق پوزيتسيانىڭ ايقىن كورىنىسى. ياعني قاتىسۋشىلار – مەملەكەت تاعدىرىنا نەمقۇرايدى قارامايتىن ازاماتتار.
قاشاندا وتانىما قىزمەت ەتسەم دەپ ويلايتىنمىن. ەلىمە پايدا تيگىزسەم دەگەن ماقساتىم بولدى. سوندىقتان وسى جوبا ارقىلى ىزگى نيەتىمە جەتسەم ءارى باعىمدى سىناسام دەگەن شەشىمگە كەلدىم.
ىرىكتەۋ فورماتى مەن ءۇشىن تىڭ تاجىريبە بولدى. ۋاقىت شەكتەۋى دە قوسىمشا جاۋاپكەرشىلىك مىندەتتەيدى ەكەن. ەسەپتى قاي كەزدە دە جاقسى كورەتىنمىن. ءبىرىنشى كەزەڭنەن وتكەننەن كەيىن قىزىعۋشىلىعىم ارتا ءتۇستى. جوبانى تانىستىرۋ, سۇحباتتار دا جاقسى تاجىريبە بولدى. جوبادا جەكە قاسيەتتەرىمىزبەن قاتار توپتا جۇمىس ىستەي ءبىلۋىمىز دە سىناقتان ءوتتى. بۇل دا ماڭىزدى تالاپتاردىڭ ءبىرى دەپ بىلەمىن. ويتكەنى مەملەكەتتىك قىزمەت – بىرلەسكەن جۇمىس. ۇمىتكەردەن كوشباسشىلىق, اناليتيكالىق ويلاۋ, ورنىقتى شەشىم قابىلداي ءبىلۋ سياقتى قاسيەتتەر تالاپ ەتىلەدى. ءار كەزەڭى جاڭا اسۋ بولىپ, قىزىعۋشىلىعىم ارتىپ, بار ىنتامدى سالدىم.
– قازىر ەلىمىزدىڭ اۆياتسيا سالاسىنا جاۋاپتى ۇلكەن كومپانيادا قىزمەت جاسايسىز. وعان دەيىن قانداي قۇرىلىمداردا ەڭبەك ەتتىڭىز؟
– مەن 12 جىل بويى ازاماتتىق اۆياتسيا سالاسىندا قىزمەت ەتىپ كەلەمىن. جاي مامان بولىپ ەسىگىن اشقان قۇرىلىمنىڭ باسشىلىق قىزمەتىنە دەيىن ءوستىم, ماماندىق تاڭداۋدا جولىم بولدى دەپ ەسەپتەيمىن. ماماندىققا ادالدىق پەن قىزىعۋشىلىق مەنى اقش-تا ءبىلىم الۋعا جەتەلەدى. سان-ديەگوداعى ۋنيۆەرسيتەتتە ءبىلىمىمدى تولىقتىرىپ, تىڭ يدەيالارمەن ەلگە ورالدىم. جاڭا قىزمەتىمە دەيىن «كازاەروناۆيگاتسيا» كومپانياسىندا عىلىمي-تەحنيكالىق اقپارات ءبولىمىنىڭ جەتەكشىسى بولىپ قىزمەت اتقاردىم. ودان كەيىن ستراتەگيالىق جوسپارلاۋ ءبولىمى باسشىسىنىڭ ورىنباسارى لاۋازىمىنا تاعايىندالدىم.
– بۇل كادرلىق رەزەرۆكە وتكەننەن كەيىن قانداي ۇسىنىس بولدى؟
– بىرنەشە ۇسىنىس ءتۇستى. ايماقتارعا ءبىلىم باسقارمالارىنا جۇمىس ىستەۋگە شاقىردى. مەن باس تارتتىم, ويتكەنى اتالعان سالادا ەش تاجىريبەم جوق. ءوزىم بىلەتىن سالادا قىزمەت ەتىپ, بىلگەنىممەن بولىسكەن دۇرىس دەگەن ويدامىن.
– ولاي بولسا, قازىرگى جۇمىسىڭىز تۋرالى ايتىپ بەرسەڭىز.
– قاڭتاردان باستاپ ازاماتتىق اۆياتسيا كوميتەتى توراعاسىنىڭ ورىنباسارى لاۋازىمىن اتقارامىن. ۇجىممەن بۇرىننان تانىسپىن, ويتكەنى العاشقى ەڭبەك جولىم وسى قۇرىلىمدا باستالعان ەدى. مەن اۋەجايلار, اەروناۆيگاتسيا, اۆياتسيالىق قاۋىپسىزدىك, تاريفتەردى رەتتەۋ مەن باقىلاۋ ماسەلەلەرىنە جاۋاپتىمىن. جالپى, مەنىڭ ويىمشا, مەملەكەتتىك قىزمەتتىڭ قىزىعى كوپ. ويتكەنى جەكە سەكتورلارعا قاراعاندا مىندەتتەرى دە زور. قازىر اۋە كولىكتەرىنىڭ ينفراقۇرىلىمىن دامىتۋ, «نۇرلى جول», «100 ناقتى قادام» مەملەكەتتىك باعدارلامالارىنىڭ ىسكە اسىرىلۋىن قاداعالايمىن. شيراتىپ ايتار بولسام, «100 ناقتى قادام» ۇلت جوسپارىنداعى 68-قادامنىڭ, ياعني اۋە تاسىمالىن مەملەكەتتiك رەتتەۋ تيiمدiلiگiن ارتتىرۋ, بريتاندىق مودەلدى ەنگىزۋدىڭ جولدارىن قاراستىرىپ جاتىرمىن. قۇرىلىمدىق جۇمىستارعا كىرىسىپ كەتتىك, اۆياتسيالىق اكىمشىلىك قۇرىلدى. زاڭعا وزگەرىس ەنگىزىپ, حالىقارالىق ستاندارتتارعا ساي جۇمىس ىستەۋ جولعا قويىلعان. وسى ورايدا بريتانيانىڭ اۆياتسيالىق اگەنتتىگى كەلىسىم نەگىزىندە تەحنيكالىق كومەك كورسەتۋدە.
جاقىندا الماتى قالاسىندا ۇلكەن حاب قۇرىلىپ, شەتەلدىك كومپانيالارمەن كەلىسىم جاسالدى. ەندى الماتى حالىقارالىق اۋەجايىندا جاڭا تەرمينال سالۋ جوسپارلانۋدا. الماتى اۋەجايىن ۇلكەن حاب رەتىندە قالىپتاستىرۋدى ويعا الىپ وتىرمىز.
اشىق اسپان ساياساتى بويىنشا باسقا ەلدىڭ كومپانيالارىنا قازاقستان اۋە كەڭىستىگىندە ۇشۋ مۇمكىن بولدى. وعان قوسا وسكەمەندەگى اۋەجاي رەتكە كەلتىرىلىپ, تۇركىستان قالاسىندا اۋەجاي قۇرىلىسى باستالدى. قوسىمشا ينۆەستيتسيا تارتىلىپ, شىمكەنت قالاسىنداعى اۋەجايعا جاڭا تەرمينال سالىنىپ جاتىر.
ينفراقۇرىلىمدى دامىتۋ ماقساتىندا 2023 جىلعا دەيىن ەلىمىزدە 13 اەرودرومدى ىسكە قوسۋ جوسپارلانىپ وتىر. شالقار, قۇلسارى, ميالى, ۇلىتاۋ, ارقالىق, زايسان, ءۇشارال سياقتى اۋدانداردا اەرودرومدار سالۋ ارقىلى ەلىمىزدىڭ اۆياتسيا سالاسىن جانداندىرا تۇسپەكپىز. البەتتە, جوسپار كوپ, ماقساتىمىز ايقىن. دەگەنمەن تورتكۇل دۇنيەنى شارپىعان كوروناۆيرۋس ينفەكتسياسى سالدارىنان ءبىزدىڭ دە سالا تۇرالاپ تۇر. ازاماتتىق اۆياتسيانىڭ دا زارداپ شەككەنى انىق. حالىقارالىق اۋە قاتىناسىنىڭ كولەمى 98 پايىزعا قىسقاردى, ىشكى رەيستەر تۇگەلدەي توقتاتىلدى. مامىر ايىندا ىشكى رەيستەر اشىلىپ, جۇمىستار رەتتەلە باستادى.
توتەنشە جاعداي كەزىندە اۋەجايلارعا دا جەڭىلدىكتەر جاسالدى. ماسەلەن, ولار جارتى جىلعا سالىقتان بوساتىلىپ, اۋە كومپانيالارى دا بەلگىلى ءبىر سالىقتار تولەمەۋگە مۇمكىندىك الدى.
–كادرلىق رەزەرۆكە وتكەندەرمەن پىكىر الماسىپ, جاڭالىقتارىڭىزبەن ءبولىسىپ, تالقىلاپ وتىراسىزدار ما؟
– البەتتە! ءبارىمىز دوس بولىپ كەتتىك. ءوز قىزمەتىمىز تۋرالى ايتىپ, ءبىر-بىرىمىزدەن كەڭەس سۇراپ تۇرامىز. كادرلىق رەزەرۆكە وتكەن زامانداستارمەن جاقسى قارىم-قاتىناستامىز. دوس بولىپ كەتتىك دەسەك ارتىق ايتپاعان بولامىن. بۇل جوبانىڭ ارقاسىندا جاڭالىققا جاقىن, تىڭ يدەيالارعا تولى, جارقىن بولاشاققا سەنىمى مول ازاماتتارمەن تانىستىم.
جالپى, جوباعا قاتىسۋ بۇگىنگى تىرشىلىگىمە قايتا قاراۋعا, سارالاۋعا مۇمكىندىك بەردى. جۇمىسىما باعا بەرىپ, ءوزىمنىڭ ءالسىز نە مىقتى تۇسىمدى انىقتاي الدىم. كەمشىلىگىمدى تۇزەپ, ويىما وي قوسقانداي بولدىم. جاڭا ماقساتتارىمدى ايقىنداپ, وعان جەتۋدىڭ جولىن تاپقانداي بولدىم.
اڭگىمەلەسكەن
سۆەتلانا عالىمجانقىزى
«Egemen Qazaqstan»
