ماسەلەن, بارلىق وڭىرلىك ورتالىقتا ەمدەلۋشىلەردىڭ دەنساۋلىعىن ساقتاۋ ماقساتىندا انتيرەتروۆيرۋستىق (ارۆ) پرەپاراتتار ۇزاققا جەتۋ ءۇشىن ارتىعىمەن قولعا بەرىلدى. وقشاۋلاۋعا تۋرا كەلگەن بارلىق مۇقتاجدارعا مەديتسينالىق قىزمەتكەرلەر ءدارى-دارمەكتەردى ۇيگە جەتكىزدى. ۇكىمەتتىك ەمەس قوعامدىق ۇيىمداردىڭ اۋتريچ-قىزمەتكەرلەرىمەن جانە ۆولونتەرلەرىمەن بىرگە جەكە قورعانۋ قۇرالدارىن – ماسكالاردى, قولعاپتاردى, سانيتايزەرلەردى جەتكىزۋدى دە قوسا ۇيىمداستىردى. جۇمىسىنان ايىرىلعان جانە ازىق-ت ۇلىككە مۇقتاج ادامداردىڭ ءتىزىمىن دارىگەرلەر اكىمدىكتەر مەن حالىقارالىق گۋمانيتارلىق ۇيىمدارعا جىبەردى.
– COVID-19 الدىنداعى تاۋەكەلدەر ءبىزدىڭ پاتسيەنتتەر ءۇشىن تەرىس مارتەبەسى بار ادامداردان ەش ايىرماشىلىعى جوق. بۇل ۆيرۋستىق جۇكتەمەنىڭ باسىلعان جاعدايىندا. كەرى جاعدايدا تاۋەكەلدەر ارتادى. سوندىقتان ءبىز ءۇشىن ايتۆ-مەن ءومىر سۇرەتىن ادامداردىڭ بارىنشا وقشاۋلانۋى وتە ماڭىزدى بولدى, – دەيدى قر دەنساۋلىق ساقتاۋ مينيسترلىگىنىڭ قازاق دەرماتولوگيا جانە ينفەكتسيالىق اۋرۋلار عىلىمي ورتالىعىنىڭ ديرەكتورى باۋىرجان بايسەركين.
جىل سايىن ەلىمىزدە ايتۆ-مەن ءومىر سۇرەتىن, انتيرەتروۆيرۋستىق تەراپياداعى ادامدار سانى ارتىپ كەلەدى. سوڭعى بەس جىلدا قامتۋ 36-دان 68 پايىزعا دەيىن ارتتى. ەمدەۋ سىزباسى دا جەتىلدىرىلىپ, زاماناۋي پرەپاراتتار ساتىپ الىنۋدا. بۇل ەمدەلۋشىلەردىڭ دەنساۋلىعىن ساقتاۋعا جانە ساپالى ءومىر ءسۇرۋىن قامتاماسىز ەتۋگە مۇمكىندىك بەرەدى.
بۇگىنگى تاڭدا قازاقستان رەسپۋبليكاسىندا ايتۆ-ينفەكتسياسىنىڭ ىندەتى شوعىرلانعان ساتىدا تۇر. سوڭعى مالىمەتتەرگە قاراعاندا ەل ازاماتتارى اراسىندا ايتۆ-ينفەكتسياسىن جۇقتىرۋ وقيعاسى كوبەيە تۇسكەنى انىقتالىپ وتىر. مامىر ايىنىڭ باسىندا قازاقستاندا ايتۆ-احۋالدى ادام سانى 37 860-قا جەتتى. وتكەن جىلدىڭ وسى كەزەڭىمەن سالىستىرعاندا ايتۆ جۇقتىرۋدىڭ جاڭا وقيعالارى 13 پايىزعا وسكەنى بايقالادى. ءبىر وكىنىشتىسى, ايتۆ-نىڭ جاڭا جاعدايلارى سانىنىڭ ارتۋى – شىعىس ەۋروپا مەن ورتالىق ازيا ەلدەرى ءۇشىن جالپى ۇردىسكە اينالىپ تۇر.
قازاقستاندا ايتۆ جۇقتىرعانداردىڭ باسىم بولىگىن (66 پايىز) ەر ازاماتتار قۇرايدى. سول سياقتى جاڭادان انىقتالعانداردىڭ دا باسىم بولىگى – 30-39 جاس ارالىعىنداعىلار – 39,5%. سوڭعى جىلدارى بۇل ينفەكتسيانىڭ جىنىستىق جولمەن جۇعۋى قايتادان بەلەڭ الىپ وتىر.
الماتى
