ءبىرىنشى سىنىپ وقۋشىلارى Egov.kz پورتالى ارقىلى قابىلدانادى

ايماقتار • 22 مامىر، 2020

ءبىرىنشى سىنىپ وقۋشىلارى Egov.kz پورتالى ارقىلى قابىلدانادى

454 رەت كورسەتىلدى

نۇر-سۇلتاندا قۇجات قابىلداۋ 1 ماۋسىمنان باستالادى دەپ حابارلايدى ەلوردا اكىمدىگىنىڭ رەسمي سايتى.

بالالاردى ءبىرىنشى سىنىپقا قابىلداۋ Egov.kz ەلەكتروندى ۇكىمەت پورتالى ارقىلى جۇزەگە اسىرىلادى. مەكتەپتەن مەكتەپكە، سىنىپتان سىنىپقا اۋىسۋدىڭ اۆتوماتتاندىرىلعان مەملەكەتتىك قىزمەتى ازىرلەندى، دەپ حابارلادى بۇگىن بريفينگتە نۇر-سۇلتان قالالىق ءبىلىم باسقارماسىنىڭ باسشىسى شولپان قادىروۆا.

اتا-انالارعا پورتالدىڭ ء«بىلىم» بولىمىنە كىرىپ، «ورتا ءبىلىم»، مەكتەپكە كىرىپ، قاجەتتى قۇجاتتاردى قوسا جولداي وتىرىپ ءوتىنىش بەرۋ جەتكىلىكتى. قۇجات تاپسىرۋ ءۇشىن كۇتۋدىڭ ەڭ ۇزاق ۋاقىتى – 15 مينۋت. مەملەكەتتىك قىزمەتتى ۇسىنۋ نىسانى – ەلەكتروندى. اتا-انانىڭ «جەكە كابينەتىنە» بالانى قابىلداۋ تۋرالى حابارلاما نەمەسە سەبەپتەرى كورسەتىلگەن دالەلدى باس تارتۋ كەلەدى. ول ءۇشىن نەبارى ءتورت-اق قۇجات كەرەك: بالانىڭ اتا-انالارىنان نەمەسە زاڭدى وكىلدەرىنەن ءوتىنىش (ەركىن نىساندا)، بالانىڭ تۋ تۋرالى كۋالىگىنىڭ كوشىرمەسى، 026/ۋ-3 «بالانىڭ دەنساۋلىق پاسپورتى» نىسانى بويىنشا دەنساۋلىق جاعدايى تۋرالى قۇجات، 063/ۋ نىسانى بويىنشا دەنساۋلىق جاعدايى تۋرالى قۇجات، سونداي-اق 3ح4 كولەمىندەگى ەكى فوتوسۋرەت. مەكتەپتىڭ قابىلداۋ كوميسسياسىنىڭ ەشقانداي قوسىمشا قۇجاتتاردى سۇراتۋعا قۇقىعى جوق ەكەنىنە تاعى دا نازار اۋدارعىم كەلەدى»، – دەدى ش.قادىروۆا.

ەرەكشە ءبىلىم بەرۋ قاجەتتىلىگى بار بالالاردى ءبىلىم بەرۋ ۇيىمدارىنا وقۋعا قابىلداۋ ءۇشىن پورتالعا قوسىمشا پەداگوگيكالىق-مەديتسينالىق-پسيحولوگيالىق كوميسسيانىڭ قورىتىندىسى ەلەكتروندى تۇردە (سكاننۇسقا، فوتو) زاڭدى وكىلدەردىڭ كەلىسىمىمەن ۇسىنىلادى. قۇجاتتاردى قابىلداۋ 1 ماۋسىمنان باستالادى. جاڭا وقۋ جىلىنا دايىندىق ماقساتىندا 17 تامىزدان باستاپ مەكتەپتەردە اتا-انالاردىڭ قالاۋى بويىنشا اقىسىز نەگىزدە جازعى مەكتەپ جۇمىسىن وتكىزۋ جوسپارلانۋدا.

سونىمەن قاتار بيىل ارنايى ءبىلىم بەرۋ ۇيىمدارىنا قابىلداۋ ەمتيحاندارى 2020 جىلدىڭ 18 ماۋسىمىنان باستاپ وتكىزىلەتىن بولادى.

قۇجاتتاردى قابىلداۋ 15 مامىردان 17 ماۋسىمعا دەيىن ەلەكتروندى فورماتتا جۇزەگە اسىرىلادى.

ء«بىز باسقارمانىڭ رەسمي سايتى مەن الەۋمەتتىك جەلىلەردە كەز كەلگەن وزگەرىستەر تۋرالى قوسىمشا حابارلايتىن بولامىز»، – دەدى ش. قادىروۆا. سونىمەن قاتار ول تەحنيكالىق جانە كاسىپتىك ءبىلىم بەرۋ ۇيىمدارىنا قابىلداۋ تۋرالى ايتتى.

بيىل كوللەدجدەرگە قۇجات قابىلداۋ اۆتوماتتاندىرىلعان جانە «ەلەكتروندى ۇكىمەت» ۆەب-پورتالى ارقىلى جۇزەگە اسىرىلادى. www.egov.kz پورتالىندا تالاپكەرلەر، اتا-انالار نەمەسە زاڭدى وكىلدەرى ءبىلىمى تۋرالى قۇجاتتىڭ ەلەكتروندى كوشىرمەسىن جانە فوتوسۋرەتتەرىن قوسا بەرە وتىرىپ، ەلەكتروندى نىساندا ءوتىنىش بەرە الادى. قاجەتتى مەديتسينالىق انىقتامالار ەلدى مەكەندەردى قوسپاعاندا، دەنساۋلىق ساقتاۋ مينيسترلىگىنىڭ اقپاراتتىق جۇيەسىنەن الىناتىن بولادى.

سونداي-اق قۇجاتتاردى پورتال ارقىلى تاپسىرۋ كەزىندە تالاپكەردىڭ جاتاقحانادا ورىن الۋ جانە تەگىن تاماقتانۋ مۇمكىندىگى بار. سەبەبى تالاپكەردىڭ جسن بويىنشا الەۋمەتتىك مارتەبەسى انىقتالادى. قابىلداۋ كوميسسيالارى قۇجاتتاردى قاراۋ قورىتىندىسى بويىنشا تالاپكەرلەرگە قۇجاتتاردى قابىلداۋ، كونكۋرس جانە ارنايى ەمتيحان وتكىزۋ كۇنى تۋرالى حابارلاما جىبەرەدى.

وسى جىلى اتتەستاتتاۋدىڭ جاڭا فورماتى بويىنشا مەكتەپكە دەيىنگى، قوسىمشا ءبىلىم بەرۋ پەداگوگتارى مەن تەحنيكالىق جانە كاسىپتىك ۇيىمداردىڭ پەداگوگتارى العاش رەت تەستىلەۋدەن وتەدى. تەستىلەۋدەن ءوتۋ ءۇشىن پەداگوگ ەلەكتروندى تىركەۋدەن وتەدى جانە ءوتۋ كۇنى مەن ۋاقىتىن دەربەس تاڭدايدى.

تەستىلەۋدەن ءساتتى وتكەننەن كەيىن قىزمەتتىڭ قورىتىندىلارىن كەشەندى تالدامالى جيناقتاۋ جۇرگىزىلەدى. ساراپشىلار توبى ە-پورتفوليو باعدارلاماسى بويىنشا قاشىقتان پەداگوگتىڭ اتتەستاتتاۋ كەزەڭىندەگى جۇمىسىنىڭ قورىتىندىسىنا باعا بەرە الادى.

«وقۋ جىلىنىڭ باسىندا اتتەستاتتاۋ كوميسسياسىنىڭ وڭ قورىتىندىسى بولعان جاعدايدا پەداگوگ ەڭبەكاقىعا 30-50% ۇستەماقى الادى»، – دەپ اتاپ ءوتتى ش. قادىروۆا.

تەستىلەۋگە ءوتىنىش بەرۋ شامامەن 23 مامىردان باستالادى.